ខេត្តកណ្តាល ៖ លោកនាយកសាលាបឋមសិក្សាហ៊ុន សែនចំបក់ ខណៈទៅជួយទាញប្អូនថ្លៃរបស់គាត់ដែលកាប់ដើមឫស្សីពេលមេឃកំពុងភ្លៀង ហើយត្រូវចរន្តអគ្គិសនីឆ្លងតាមដើមឫស្សីនោះឆក់ ស្រាប់តែបែរជាឆក់ស្លាប់ខ្លួនឯងទៅវិញ ឯប្អូនថ្លៃគ្រាន់តែរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង៥ល្ងាចថ្ងៃទី១៥ ឧសភា ២០១២ នៅក្នុងភូមិត្រពាំងទួល ឃុំសំរោងលើ ស្រុកអង្គស្នួល ។
លោកនាយកសាលាដែលស្លាប់នេះឈ្មោះចឹក ជឿង អាយុ៦២ឆ្នាំ មានទីលំនៅក្នុងភូមិខាងលើ ឯបុរសជាប្អូនថ្លៃដែលរងរបួសធ្ងន់ឈ្មោះភុន ស៊ីម អាយុ៥៣ឆ្នាំ ជាកសិករ មានទីលំនៅក្នុងភូមិជាមួយគ្នា ។ តាមប្រភពព័ត៌មានឱ្យដឹងថា បុរសជាប្អូនថ្លៃបានឡើងកាប់ដើមឫស្សីដែលទ្រេតគងលើខ្សែកាបភ្លើងស្រាត ហើយខណៈនោះមេឃកំពុងធ្លាក់ភ្លៀងផង ប៉ុន្តែដោយសារដើមឫស្សីត្រូវទឹកធ្វើឱ្យចរន្តអគ្គិសនីឆ្លង ក៏ឆក់បុរសជាប្អូនថ្លៃនោះបណ្តាលរបូតដៃ ប៉ុន្តែអត់ធ្លាក់ដល់ដីទេ ដោយសារជាប់ជើងនឹងប្រគាបដើមឫស្សី ហើយក្បាលសំយុងចុះក្រោមដូចគេចងព្យួរ ។
ប្រភពដដែលបានបន្តទៀតថា ពេលឃើញបែបនេះលោកចឹក ជឿង បានឡើងទៅជួយប្អូនថ្លៃ ហើយក៏ត្រូវចរន្តអគ្គិសនីឆក់បណ្តាលឱ្យធ្លាក់មកដីទាំងពីរនាក់ តែលោកបានស្លាប់ភ្លាមៗ ឯប្អូនថ្លៃរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ៕
ចែករំលែកព័តមាននេះ