ខេត្តព្រះសីហនុ ៖ កម្មករ កម្មការិនីប្រមាណ២០០នាក់ នៃរោងចក្រ ជី ជី ស៊ី នៅតំបន់សេដ្ឋកិច្ចពិសេស ស្ថិតក្នុងភូមិពូធឿន ឃុំបិតត្រាំង ស្រុកព្រៃនប់ បាននាំគ្នាធ្វើការតវ៉ានៅមុខរោងចក្រ កាលពីព្រឹកថ្ងៃទី១៦ ឧសភា ដោយទាមទារឱ្យខាងរោងចក្រគោរពសិទ្ធិការងារកម្មករ កម្មការិនី ព្រោះនៅក្នុងព្រះរាជពិធីបុណ្យចម្រើនព្រះជន្មព្រះមហាក្សត្រក៏ខាងរោងចក្របង្ខំឱ្យធ្វើការ ដោយពុំមានថ្ងៃឈប់សម្រាក ដែរ មិនត្រឹមតែប៉ុណ្ណោះ ខាងរោងចក្របានតម្រូវឱ្យកម្មករ កម្មការិនីធ្វើការបន្ថែមម៉ោងទៀត ។
កម្មការិនី ស្រី មុំ និយាយថា តាមច្បាប់ការងារនៅថ្ងៃឈប់សម្រាក កម្មករ កម្មការិនីទាំងអស់ត្រូវមានសិទ្ធិឈប់សម្រាក ជាពិសេសថ្ងៃបុណ្យចម្រើនព្រះជន្មព្រះមហាក្សត្រ ដែលក្នុងប្រតិទិនតម្រូវឱ្យឈប់សម្រាករយៈពេល៣ថ្ងៃ ។ ផ្ទុយទៅវិញ ខាងរោងចក្រមិនអនុញ្ញាតឱ្យឈប់ទេ ថែមទាំងបង្ខំឱ្យពួកគេធ្វើការបន្ថែមម៉ោងច្រើនទៀត ហេតុដូចនេះហើយទើបពួកគេសម្រេចចិត្តធ្វើការតវ៉ា។ ដោយឡែកភាគីខាងរោងចក្របានឱ្យដឹងថា ដោយសារតែតម្រូវការរបស់អតិថិជន ដាក់កំណត់ថ្ងៃយកទំនិញ ទើបខាងរោងចក្រត្រូវតែបង្ខំចិត្តឱ្យកម្មករធ្វើការបន្ថែមក្នុងថ្ងៃឈប់សម្រាក ។
លោក កែវ ឧត្តម ប្រធានស្តីទីមន្ទីរការងារ និងបណ្តុះបណ្តាលវិជ្ជាជីវៈខេត្តឱ្យដឹងថា រហូតមកដល់ពេលនេះកម្មករ កម្មការិនីទាំង២០០នាក់បានត្រឡប់ទៅលំនៅឋានវិញហើយ បន្ទាប់ពីមានការសម្របសម្រួលពីមន្ត្រីមន្ទីរការងារខេត្ត ដោយតម្រូវឱ្យរោងចក្រ ជី ជី ស៊ី អនុវត្តតាមច្បាប់ការងារ ហើយប្រសិនបើចង់ឱ្យធ្វើការបន្ថែម ត្រូវសួរកម្មករ កម្មការិនីជាមុនសិន បើពួកគេសុខចិត្តនោះ ទើបរោងចក្រអាចធ្វើការបាន ។ លោកបានបន្តថា លោកបានធ្វើការណែនាំខាងរោងចក្ររួចហើយដែរ ទាក់ទិនទៅនឹងសកម្មភាពនាពេលនេះ ៕
ចែករំលែកព័តមាននេះ