ទីតានិកជាឈ្មោះនាវាដែលគេចាត់ទុកអស្ចារ្យបំផុត ឡូយបំផុតនាដើមសតវត្សទី២០បានលិចកណ្តាលមហាសាគរក្នុងដំណើរលើកដំបូងរបស់ខ្លួនពីអឺរ៉ុបទៅអាមេរិកនាថ្ងៃមួយពាក់កណ្តាលខែមេសា ឆ្នាំ១៩១២។ រំលឹកអនុស្សាវរីយ៍ទឹកភ្នែក១០០ឆ្នាំ របស់ទីតានិក (៤/១៩១២-៤/២០១២) ទស្សនាវដ្តីអង់គ្លេសឈ្មោះHistory ដែលទើបបោះពុម្ពថ្មីៗបានចុះផ្សាយអត្ថបទមួយរាយការណ៍ពីមនុស្ស១០នាក់ រួចជីវិតនៅពេលនោះ ដោយសារដំណាក់កាលចុងក្រោយសម្រេចចិត្តមិនជិះទីតានិក។ ការសម្រេចចិត្តរបស់ពួកគេ មានមូលហេតុខុសៗគ្នាដូចតទៅ ៖
១-Milton Hershey
Milton Hershey ជាអាជីវកល្បីល្បាញដោយសារស្ករសូកូឡាផលិតចេញពីរោងចក្រHerchey របស់គាត់ឈ្ងុយឆ្ងាញ់ជាងគេក្នុងលោក ។ គាត់ក៏ជាសប្បុរសជនមួយរូបចូលចិត្តការងារមនុស្សធម៌ផងដែរ ។ Milton Hershey ចំណាយ៣០០ដុល្លារកក់ថ្លៃបន្ទប់មួយលើនាវាទីតានិកសម្រាប់ដំណើរត្រឡប់ទៅអាមេរិក ។ទោះដូច្នេះក្តី គាត់មិនបានជិះនាវានោះទេ ព្រោះមានការងារបន្ទាន់ត្រូវត្រឡប់ទៅវិញមុនកំណត់នៃការចេញដំណើររបស់ទីតានិក ដើម្បីដោះស្រាយការងារអាជីវកម្មរបស់ខ្លួន ។ គាត់ចេញពីអឺរ៉ុបមុន៣ថ្ងៃ ដោយជិះនាវា America ហើយក៏បានទៅដល់គោលដៅដោយសុវត្ថិភាព ។
២-Rev -J -Stuart Holden
គាត់ជាបព្វជិតកាតូលិកមានឋានៈប៉ាស្ទ័រនៅវិហារ St Paul ទីក្រុងឡុង ប្រទេសអង់គ្លេស ។ តាមផែនការ J Stuart Holden ត្រូវធ្វើដំណើរតាមទីតានិកទៅអាមេរិកចូលរួមសន្និបាតអភិរក្សគ្រឹស្តសាសនានាថ្ងៃទី២០ មេសា ឆ្នាំ១៩១២ នៅ Carnegie Hall ។ ប៉ុន្តែផែនការនេះត្រូវប្តូរព្រោះសុខៗស្រាប់តែភរិយាធ្លាក់ខ្លួនឈឺចៃដន្យ ។ ថ្ងៃទី៩ មេសា មុនមួួយថ្ងៃត្រូវឡើងជិះនាវាទីតានិក គាត់ប្រញាប់ត្រឡប់ទៅផ្ទះមើលថែទាំភរិយា ជាហេតុជួយឱ្យគាត់រួចជីវិត ។
៣-JP Morgan
មិនដឹងជាមានរឿងហេងស៊យយ៉ាងម៉េចទេ បន្ទប់ពិសេសមួយកន្លែងលើនាវាទីតានិកត្រូវផ្លាស់ប្តូរម្ចាស់ដល់ទៅ៣នាក់ភ្លាមៗ សុទ្ធតែលំដាប់អ្នកមានធំនៅអាមេរិក (រួមមានHenry Clay Fricd, JP Morgan និង J-Horace Harding ) ។ Henry Clay Frick អ្នកមានទ្រព្យសម្បត្តិស្តុកស្តម្ភម្នាក់នាដើមសតវត្សទី២០ ដោយក្តាប់ទីផ្សារផលិតដែកមួយទាំងមូល បានកក់បន្ទប់ពិសេសលើនាវាទីតានិក សម្រាប់ខ្លួនឯងនិងប្រពន្ធត្រឡប់ទៅអាមេរិក ប៉ុន្តែចៃដន្យពេលធ្វើដំណើរកម្សាន្តនៅអឺរ៉ុបប្រពន្ធជួបគ្រោះថ្នាក់បាក់ជើង ត្រូវដេកពេទ្យព្យាបាលរយៈពេលយូរក្នុងប្រទេសអីុតាលី ។ នេះជាមូលហេតុគាត់ផ្ទេរបន្ទប់ដែលកក់នោះឱ្យJP Morgan អ្នកមានធំម្នាក់ខាងវិស័យហិរញ្ញវត្ថុ ។ ប៉ុន្តែបុរសទីពីររូបនេះបន្ទាប់មកក៏ប្តូរចិត្តមិនចង់ជិះនាវាទីតានិក ព្រោះចង់នៅអឺរ៉ុបមួយរយៈទៀត ។ គាត់ផ្ទេរឱ្យទៅ J Horace Harding ជាអ្នកមានខាងវិស័យធនាគារនាសម័យនោះ ។ ដឹងអីដូចពីរនាក់មុនដែរ Harding បោះបង់បន្ទប់នោះទៀត ងាកទៅកក់បន្ទប់នាវា Mauretania សម្រាប់ធ្វើដំណើរត្រឡប់ទៅអាមេរិកនៅពេលក្រោយទៅវិញ ។ បន្ទប់ពិសេសដែលអ្នកមានទ្រព្យ៣នាក់បោះបង់បន្តបន្ទាប់នោះ ចុងក្រោយបង្អស់ធ្លាក់ទៅលើលោកJ Bruce ប្រធានសមាគមនាវា White Star ។
៤-Alfred Vanderbailt
ជាសមាជិកក្នុងមហាគ្រួសារមានទ្រព្យសម្បត្តិស្តុកស្តម្ភមួយ Alfred Vanderbailt មិនត្រឹមតែជាអ្នកជំនួញមានបទពិសោធពេញខ្លួនប៉ុណ្ណោះទេ ថែមទាំងជាអ្នកកីឡាអាជីពផងដែរ។ ចំណង់ចំណូលចិត្តសំខាន់របស់គាត់គឺជិះសេះប្រមាញ់សត្វព្រៃជាមួយមិត្តភក្តិ។ ថ្ងៃទី៩ មេសា ឆ្នាំ១៩១២ ពេលកំពុងកម្សាន្តនៅអឺរ៉ុបជាមួយភរិយា ស្រាប់តែគាត់សម្រេចចិត្តមិនទៅអាមេរិកដោយជិះនាវាទីតានិក ទោះកក់សំបុត្រទុកហើយក៏ដោយ ។ ប៉ុន្តែអ្នកឯទៀតរួមទាំងភរិយាគាត់ផងនៅតែចង់ត្រឡប់ទៅអាមេរិកដោយជិះនាវាទីតានិកដ៏ល្បីល្បាញអស្ចារ្យ ។ ទីបំផុតទាំងអស់គ្នាឯកភាពកាត់ក្តីតាមរយៈការបោះកាក់ ។ លទ្ធផលគឺអ្នកមិនគួរជិះនាវាទីតានិក ហេតុនេះAlfred Vanderbailt និងមនុស្សក្នុងគ្រួសារក៏បានរួចជីវិត ។ ប៉ុន្តែAlfred Vander bailt ខ្លួនឯង៣ឆ្នាំក្រោយជួបគ្រោះអស់ជីវិតទាល់តែបានពេលគាត់ត្រឡប់ទៅអឺរ៉ុបម្តងទៀតរកទិញសេះនិងឆ្កែប្រមាញ់បម្រើបំណង់ចំណូលចិត្តប្រមាញ់សត្វរបស់ខ្លួន ។ នាវាLusitania ដែលគាត់ជិះត្រូវមីនរបស់នាវាចម្បាំងអាល្លឺម៉ង់លិចនៅឆ្នេរសមុទ្រប្រទេសអៀរឡង់ ។
៥-David Blair
David Blair តិច ឬច្រើនបានអរគុណសមាគមនាវា White Star ដែលសង្គ្រោះជីវិតខ្លួនពីការលិចនាវាទីតានិក ។ គាត់បានទទួលការតែងតាំងជាកាពីទែនរងនាវាទីតានិកពេលនាវាចេញដំណើរពីទីក្រុងបែលហ្វាសទៅថែម
ថុន ។ ប៉ុន្តែពេលនាវាធ្វើដំណើរទៅអាមេរិក គាត់អត់បានទៅជាមួយគេ ។ មូលហេតុមកពីសមាគមនាវា White Star សម្រេចចិត្តឱ្យកាពីទែន Henry Wilde អ្នកមានបទពិសោធពេញខ្លួនខាងនាវាចរណ៍ដែលកំពុងដឹកនាំនាវាOlympic នោះបញ្ជាទីតានិកវិញ ចំណែកគាត់ត្រូវផ្លាស់ទៅនាវាOlympic សិន ។ វាពិតជាហេងសម្រាប់គាត់ តែស៊យសម្រាប់ Henry Wilde ។ ព្រោះតែការផ្លាស់ប្តូរមនុស្សបន្ទាន់ពេកនាពេលនោះដែរ ដែលធ្វើឱ្យទីតានិករងគ្រោះ ព្រោះDavid Blair ពេលទៅនាវាOlympic បានយកចង្កោមកូនសោប៉មត្រួតពិនិត្យជាប់ខ្លួនភ្លេចប្រគល់ឱ្យFrederick Fleet អ្នកជំនួយការងារខ្លួនលើនាវាទីតានិក ហើយក៏ភ្លេចកែវយឹតក្នុងបន្ទប់ខ្លួនទៀត ។ លុះនាវាទីតានិកចេញដំណើរមួយសន្ទុះទើបFredericd Fleet ឆ្លេឆ្លាព្រោះគ្មានឧបករណ៍អ្វីសម្រាប់ធ្វើការ ។ ដូច្នេះហើយទើបFrederied Flect ពុំអាចមើលដឹងពីចម្ងាយថាខាងមុខមានផ្ទាំងទឹកកកធំសម្បើម ទម្រាំតែដឹងច្បាស់អ្វីៗហួសពេលអស់ទៅហើយ ។
៦-Edgar Selwyn
Edgar Selwyn ជាសិល្បករល្បីល្បាញមួយរូបរបស់អាមេរិកនាសតវត្សទី២០ ជាអ្នកដឹកនាំរឿងផង ផលិតហ្វ៊ីលភាពយន្តផង ។ កេរ្តិ៍ឈ្មោះគាត់ត្រូវបានគេស្គាល់ច្រើនបំផុតពេលគាត់ស្ថាបនារោងមហោស្រពមួយដាក់ឈ្មោះតាមត្រកូលខ្លួនឯងថា«រោងមហាស្រព Selwyn» (សព្វថ្ងៃជារោងមហាស្រពAmerican Airliner ) ក្នុងឆ្នាំ១៩១៨ ។ Edgar Selwyn មានគម្រោងត្រឡប់ទៅអាមេរិកតាមនាវាទីតានិក តែមិនយូរប៉ុន្មានគាត់លុបចោលគម្រោងនោះវិញ ព្រោះត្រូវទៅជួបអ្នកនិពន្ធអង់គ្លេសម្នាក់ឈ្មោះArnold Bennett នាថ្ងៃទី១៩ មេសា ឆ្នាំ១៩១២ ដែលទើបនិពន្ធបានប្រលោមលោកថ្មីមួយគួរឱ្យចាប់អារម្មណ៍ ។ ដោយសារមានការសម្រេចចិត្តបែបនេះទើបគាត់មិនបានលិចលង់កណ្តាលមហាសាគរជាមួយនាវាទីតានិក ។
៧-Jame Martin Gray
Jame M-Gray ជាបព្វជិតកាតូលិកឋានៈខ្ពស់មួួយរូប ទទួលមុខងារប្រធានវិទ្យាស្ថាន Moody Bible ។ គាត់មានផែនការទេសនាក្នុងពិធីប្រគល់សញ្ញាបត្ររបស់វិទ្យាស្ថានអង់គ្លេសផង អាមេរិកផង ។ ពេលនោះបុព្វជិតHarold មិត្តភក្តិគាត់នៅអស់គ្លេស ឃាត់គាត់ឱ្យនៅអង់គ្លេស៤-៥ថ្ងៃទៀតសិនចាំនាវាទីតានិកចេញដំណើរសឹមទៅអាមេរិកជាមួយនាវាទីតានិក ប៉ុន្តែគាត់មិនព្រម ព្រោះប្រញាប់ទៅ អាមេរិកទេសនាឱ្យទាន់ពេលពួកនិស្សិតត្រូវប្រឡងចេញទៀត ។ ហេតុនេះគាត់ជិះកប៉ាល់ផ្សេងធ្វើដំណើរទៅអាមេរិកមុនការចេញដំណើររបស់នាវាទីតានិកមួយសប្តាហ៍ ។
៨-Norman Craig
Norman Craig ជាសមាជិកសភាស្កុតលែន និងជាទីប្រឹក្សាស្តេចផង ។ គាត់ទិញសំបុត្រនាវាទីតានិក ដើម្បីធ្វើដំណើរកម្សាន្តនៅអាមេរិក ។ ពេលទីតានិកលិចកណ្តាលមហាសាគរសម្លាប់មនុស្សជាង១.៥០០នាក់ បណ្តាលឱ្យមានការភ្ញាក់ផ្អើលញាប់ញ័រពេញចក្រភពអង់គ្លេស ពួកមិត្តភក្តិគាត់ខ្លះគិតថាគាត់ស្លាប់ ខ្លះទៀតសង្ឃឹមថាគាត់ប្រហែលបានទទួលការសង្គ្រោះទាន់ពេលរួចពីស្លាប់ ។ ប៉ុន្តែតាមពិតគាត់អត់ជិះនាវាទីតានិកផងបានអីស្លាប់? Norman Craig និយាយថា«ខ្ញុំមិនដឹងប្រាប់អ្នករាល់គ្នាថាម៉េច
ទេ ។ ខ្ញុំប្រាប់បានត្រឹមតែនៅពេលហៀបឡើងជិះនាវាទីតានិក ស្រាប់តែមានអ្វីមួួយបណ្តាលឱ្យចិត្តខ្ញុំធុញទ្រាន់ការកម្សាន្តតាមនាវា ហើយក៏ឈប់ធ្វើដំណើរទៅវិញ »។
៩-Baron M-von Bethmann
ឆ្នាំ១៩១២ អ្នកមានទ្រព្យសម្បត្តិស្តុកស្តម្ភ៣រូប គឺBaron M-von Bethmann , P.de La Vielestreaux និង Maurice Brevard សម្រេចចិត្តរួមគ្នាធ្វើដំណើរកម្សាន្តជុំវិញពិភពលោក ។ ពេលកំពុងធ្វើទស្សនកិច្ចមជ្ឈមណ្ឌល ឧស្សាហកម្ម និងពាណិជ្ជកម្មនៅឈីកាហ្គោ សហរដ្ឋអាមេរិក ពួកគេបានទទួលព័ត៌មានថាខ្លួនមានសំណាងខ្ពស់ដោយសារមិនជិះនាវាទីតានិក ។
«មុនដំបូងពួកខ្ញុំត្រៀមធ្វើដំណើរតាមនាវាទីតានិក តែចុងក្រោយសម្រចចិត្តជិះកប៉ាល់ផ្សេងមកអាមេរិកមុនទីតានិក ។ មូលហេតុមានរឿងដូច្នេះ ព្រោះក្នុងចំណាយពួកខ្ញុំបីនាក់មានម្នាក់មិនចង់រង់ចាំជិះទីតានិក ដោយនិយាយថា ការរង់ចំាជាការចំណោមពេលចោលដ៏គួរឱ្យស្តាយ ។ ទីបំផុតពួកខ្ញុំឯកភាពគ្នាបោះកាក់កាត់សេចក្តី ។ ការបោះកាក់ពេលនោះបង្ហាញថាពួកខ្ញុំគួរធ្វើដំណើរភ្លាមកុំចាំជិះទីតានិក ។ បើគ្មានការបោះកាក់ពិតជាអ្វីៗចប់អស់រលីងទៅហើយ» ។
១០-Robert Bacon
ឯកអគ្គរដ្ឋទូតអាមេរិកប្រចាំប្រទេសបារំាងលោក Robert Bacon បានទិញសំបុត្រធ្វើដំណើរតាមនាវាទីតានិកសម្រាប់គ្រួសារដែលរួមមានខ្លួនឯង ប្រពន្ធនិងកូនស្រី ។ ប៉ុន្តែការធ្វើដំណើររបស់ពួកគេត្រូវពន្យារពេលដោយហេតុការតែងតាំងឯកអគ្គរដ្ឋទូតថ្មីយឺតយ៉ាវ ។ ទាល់តែដល់ថ្ងៃទី២០ មេសា ឆ្នាំ១៩១២ ទើបគ្រួសារលោកBacon បានចេញដំណើរដោយជិះនាវាS.S Franee វិញ៕
ចែករំលែកព័តមាននេះ