ប៉ូលិសខណ្ឌចំការមនបើកករណី បង្ក្រាបជនខិលខូចលក់ប័ណ្ណពន្ធផ្លូវ ក្លែងក្លាយតំលៃថោក តាមកន្លែងលាងរថយន្ត
ដោយ ៖ អប្សរា
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ០៨:៥៧
ជោគជ័យ
ប័ណ្ណពន្ធផ្លូវដែលមន្ត្រីពន្ធដារពិនិត្យឃើញថាក្លែងក្លាយ
រាជធានីភ្នំពេញ ៖ ស្របពេលអគ្គនាយកដ្ឋានពន្ធដារកំពុងមមាញឹក ក្នុងការប្រមូលពន្ធផ្លូវលើមធ្យោបាយយានយន្តគ្រប់ប្រភេទនៅទូទាំងព្រះរាជាណាចក្រកម្ពុជា ស្រាប់តែមានជនខិលខូចឆក់ឱកាសលួចផលិតប័ណ្ណពន្ធផ្លូវរថយន្តក្លែងក្លាយដើរលក់នៅតាមទីតាំងលាងរថយន្ត ។ ជាក់ស្តែងនៅកន្លែងលាងរថយន្តមួយកន្លែង ស្ថិតនៅតាមផ្លូវលេខ៩៥ សង្កាត់បឹងត្របែក ខណ្ឌចំការមន ជាប់ពាក់ព័ន្ធនឹងការទទួលទិញលក់ប័ណ្ណពន្ធផ្លូវក្លែងក្លាយ ដែលមានតំលៃថោកជាងប័ណ្ណពន្ធផ្លូវត្រឹមត្រូវជិតពាក់កណ្តាល ។ តាមសមត្ថកិច្ចនគរបាលខណ្ឌចំការមនបានឱ្យដឹងថា មន្ត្រីពន្ធដារនៅសាខាពន្ធដារខណ្ឌចំការមន បានទទួលប័ណ្ណពន្ធផ្លូវឆ្នាំ២០១០ ពីប្រជាពល រដ្ឋដែលទទួលទិញលក់នៅកន្លែងលាងឡាន មួយយកទៅឱ្យជួយពិនិត្យ ព្រោះសង្ស័យថា ក្លែងក្លាយ ។ ប័ណ្ណពន្ធផ្លូវនោះមានអ្នកលក់ដូរស្ងាត់ៗថោកជាងការចូលបង់ពន្ធផ្លូវត្រឹមត្រូវជាមួយភ្នាក់ងារពន្ធដារ ។ បន្ទាប់ពីមន្ត្រីពន្ធដារពិនិត្យប័ណ្ណពន្ធផ្លូវនោះមកដឹងថា ជាប័ណ្ណក្លែងក្លាយ ។ សមត្ថកិច្ចបានចាត់ការបង្វែរសំណុំរឿងនេះទៅឱ្យនគរបាលខណ្ឌចំការមនស្រាវជ្រាវបន្ត ។
សមត្ថកិច្ចនគរបាលខណ្ឌចំការមនបានស្រាវជ្រាវឃាត់ខ្លួនមនុស្ស២នាក់ពាក់ព័ន្ធនឹងការទិញលក់ប័ណ្ណពន្ធផ្លូវក្លែងក្លាយ គឺឈ្មោះអេង យីយ៉ន ភេទប្រុស អាយុ៤៧ឆ្នាំ និងឈ្មោះអ៊ឹម សុភ័ក្រ ភេទប្រុស អាយុ២៤ឆ្នាំ ជាបុគ្គលិកកាសែតកោះកេរ្តិ៍ ។ ទន្ទឹមនេះសមត្ថកិច្ចបានដកហូតប័ណ្ណពន្ធផ្លូវក្លែងក្លាយចំនួន៨សន្លឹក ។ ឈ្មោះអេង យីយ៉ន ឱ្យដឹងថា គេធ្លាប់ស្គាល់បុរសម្នាក់ជាចាងហ្វាងកាសែតកោះកេរ្តិ៍ ដែលមានរហស្សនាមថា ប៉ាជេ ដែលមានប័ណ្ណពន្ធផ្លូវលក់ ។ ដោយឡែកឈ្មោះអ៊ឹម សុភ័ក្រ និយាយថា គេត្រូវឈ្មោះប៉ាជេ ឱ្យយកប័ណ្ណពន្ធផ្លូវមកលក់នៅពេលដែលមានអ្នកត្រូវការទិញ ។ សមត្ថកិច្ចកំពុងតាមរកចាប់ខ្លួនបុរសឈ្មោះប៉ាជេ នោះ ។ តាមការបង្ហើបឱ្យដឹងពីមន្ត្រីប៉ូលិសថា មានម្ចាស់រថយន្តជាង៨០នាក់ហើយដែលចាញ់បោកក្រុមលក់ប័ណ្ណពន្ធផ្លូវក្លែងក្លាយនេះ ដូច្នេះនៅទូទាំងប្រទេសអាចមានអ្នកចាញ់បោកច្រើននាក់ទៀតដែលបានទិញ ៕
