រាជធានីភ្នំពេញ ៖ ការប្រកួតកីឡាកាយសម្ព័ន្ធជ្រើសរើសជើងឯកទូទាំងប្រទេសប្រចាំឆ្នាំ២០១២ត្រូវបានបញ្ចប់ទាំងស្រុងកាលពីថ្ងៃទី១២ ឧសភាកន្លងមក បន្ទាប់ពីចាប់ផ្តើមការប្រកួតតាំងពីថ្ងៃទី៨ ឧសភា ហើយពិធីបិទការប្រកួតត្រូវបានរៀបចំធ្វើនៅសាលដំបូលទូកនៃពហុកីឡដ្ឋានជាតិ ។
លោកណយ ផាណា អគ្គលេខាធិការនៃសហព័ន្ធកីឡាកាយសម្ព័ន្ធកម្ពុជាបានឱ្យដឹងថា ព្រឹត្តិការណ៍នៃការប្រកួតឆ្នាំនេះមានភាពគគ្រឹកគគ្រេងជាងឆ្នាំមុន បើទោះជាចំនួនក្លឹបនិងកីឡាករ កីឡាការិនីមានការថយចុះបន្តិចក្តី ។ លោកបានគូសបញ្ជាក់បន្ថែមទៀតថា បើពិនិត្យទៅលើកម្រិតបច្ចេកទេសគ្រប់វិញ្ញាសា គឺមានការរីកចម្រើនជាងមុន ។ ម្យ៉ាងវិញទៀតយើងសង្កេតឃើញថា មានក្លឹបមួយចំនួនកំពុងតែលេចធ្លោជាងគេដូចជាក្លឹប៧មករាសែនជ័យ ដែលបានខិតខំពង្រីកសមត្ថភាពកីឡាកររបស់ខ្លួនបានល្អជាងមុន រហូតទទួលបានចំណាត់ថ្នាក់លេខ១ ដោយរកបានមេដាយមាសចំនួន១២ និងមេដាយប្រាក់៦ថែមទៀតផង ។ បន្ទាប់មកក្លឹបឃុំខ្វាវ ខេត្តតាកែវ ស្ថិតនៅចំណាត់ថ្នាក់លេខ២ ទទួលបានមេដាយមាស៥ ប្រាក់៦ សំរឹទ្ធ១ និងសាលាបឋមសិក្សាទួលខ្វាវ ស្ថិតនៅចំណាត់ថ្នាក់លេខ៣ ទទួលបានមេដាយមាស២ ប្រាក់៦ សំរឹទ្ធ៤ ។
លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានឱ្យដឹងថា យោងទៅតាមការពិនិត្យជាក់ស្តែងបានបង្ហាញឱ្យឃើញពីការរីកចម្រើនឥតឈប់ឈររបស់សហព័ន្ធកីឡាកាយសម្ព័ន្ធកម្ពុជាពី១ឆ្នាំទៅ១ ឆ្នាំ ។ ក្នុងនាមរូបលោកតំណាងឱ្យក្រសួងអប់រំ យុវជននិងកីឡា លោកសំណូមពរដល់កីឡាករ កីឡាការិនីទាំងអស់ត្រូវខិតខំហ្វឹកហាត់បន្ថែមទៀតដើម្បីឈានឆ្ពោះទៅរកភាពជោគជ័យនៅលើឆាកអន្តរជាតិនិងរកមេដាយមកជូនជាតិរបស់យើង ៕
ចែករំលែកព័តមាននេះ