ប្រភពពីទីភ្នាក់ងារព័ត៌មានបរទេស កាលពីថ្ងៃទី១៤ ឧសភា ផ្សាយឱ្យដឹងថា លោកម័រហ្គេន ហ្វេម៉ាយ សមាជិកព្រឹទ្ធសភាស៊ីមបាវ៉េ បានបញ្ជាក់ឱ្យដឹងពីវិធីសាស្ត្រដ៏ល្អក្នុងការទប់ស្កាត់ការរីករាលដាលជំងឺអេដស៍ គឺត្រូវតែចេញច្បាប់បង្ខំឱ្យស្ត្រីបន្ថយការងូតទឹក និងកោរសក់ ដោយផ្តល់នូវហេតុផលថា ធ្វើបែបនេះនឹងជួយឱ្យស្ត្រីមិនមានចំណុចទាក់ទាញពីបុរស ហើយអាចគេចផុតពីការឆ្លងជំងឺអេដស៍ដោយសារការចាប់រំលោក ឬលង់ខ្លួនចាញ់បោកបុរសដែលមានជំងឺអេដស៍ ។
របាយការណ៍បញ្ជាក់ថា សមាជិកព្រឹទ្ធសភាខាងលើបានដាក់សំណើពីគោលគំនិតនេះនៅក្នុងកិច្ចប្រជុំសភា ដោយលោកហ្វេម៉ាយបញ្ជាក់ដូច្នេះថា មូលហេតុចម្បងដែលធ្វើឱ្យជំងឺអេដស៍រីករាលដាលនៅក្នុងស៊ីមបាវ៉េ និងបណ្តាប្រទេសជាច្រើនទៀតនៅទូទាំងពិភពលោកកើតឡើងដោយសារបុរសមិនអាចទប់ចិត្តនឹងកម្លាំងទាក់ទាញផ្លូវភេទពីស្ត្រីបាន។ ជាពិសេសស្ត្រីដែលមានរូបរាងស្រស់ស្អាត និងស៊ិចស៊ី ធ្វើឱ្យបុរសត្រូវការមានសម្ព័ន្ធភាពផ្លូវភេទជាមួយដែលជាមូលហេតុធ្វើឱ្យកើតការរីករាលដាលនៃជំងឺអេដស៍ ។
លោកហ្វេម៉ាយ ជាសមាជិករបស់គណបក្សប្រឆាំង MDC បានគូសបញ្ជាក់ឱ្យដឹងថា ដល់វេលាដែលប្រទេសស៊ីមបាវ៉េត្រូវចេញច្បាប់ឱ្យស្ត្រីកាត់បន្ថយការសម្អាតខ្លួនប្រាណ និងត្រូវកោរសក់ដូចស្ត្រីក្នុងនិកាយ«អាប៉ូស្តូលីក»នៃសាសនាគ្រិស្ត ដើម្បីលុបបំបាត់កម្លាំងអូសទាញផ្លូវភេទ ព្រោះនៅពេលដែលស្ត្រីស្ថិតក្នុងសភាពអាក្រក់មិងគួរឱ្យចែចង់ ឱកាសនឹងមានសម្ព័ន្ធភាពផ្លូវភេទជាមួយបុរសមានការធ្លាក់ចុះ រីឯការរាលដាលនៃជំងឺអេដស៍ក៏ធ្លាក់ចុះដូចគ្នា ។
គួរបញ្ជាក់ថា ស៊ីមបាវ៉េ ជាផ្នែកមួយក្នុងប្រទេសដែលជួបនឹងបញ្ហាមនុស្សឆ្លងវីរុសហីុវកើនឡើងយ៉ាងឆាប់រហ័ស តាមទិន្នន័យបញ្ជាក់ថា ប្រហែល១៤% នៃប្រជាជនស៊ីមបាវេ៉ឆ្លងវីរុសហ៊ីវ ៕
ចែករំលែកព័តមាននេះ