បង្ក្រាបគ្រឿងញៀន2ករណីដោយឡែកពីគ្នាចាប់ជនសង្ស័យបាន2នាក់
បញ្ចូលអត្ថបទ ៖ បុប្ផា កោះ
ថ្ងៃអង្គារ ទី១៥ ខែឧសភា ឆ្នាំ២០១២ ម៉ោង ១០:០០
កោះសន្តិភាព
សមត្ថកិច្ចឃាត់ខ្លួនស្ត្រីចែកចាយគ្រឿងញៀន
Update Required
To play the media you will need to either update your browser to a recent version or update your
Flash plugin.
ខេត្តបន្ទាយមានជ័យ ៖ កម្លាំងនគរបាលខេត្ត បានចុះប្រតិបត្តិការបង្ក្រាបគ្រឿងញៀន២ករណីដាច់ដោយឡែកពីគ្នា និងចាប់ឃាត់ខ្លួនជនសង្ស័យ២នាក់ ព្រមទាំងរឹបអូសបានវត្ថុតាងថ្នាំញៀនជាង២០០គ្រាប់ និងម៉ាទឹកកកចំនួន៥ថង់តូច រួមទាំងឧបករណ៍ជក់មួយចំនួន ។ ករណីនេះត្រូវបានសមត្ថកិច្ចរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់ ។
លោកវរសេនីយ៍ត្រីធិន ស៊ិនដេត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត បានឱ្យដឹងថា អនុវត្តតាមបទបញ្ជារបស់លោកឧត្តមសេនីយ៍ត្រីខេង ស៊ុម ស្នងការនគរបាលខេត្ត ក៏ដូចជាមានការណែនាំផ្ទាល់ពីលោកវរសេនីយ៍ឯកឆេន ឈួត ស្នងការរងទទួលបន្ទុកប្រធានការិយាល័យកណ្តាលនគរបាលយុត្តិធម៌ តែងតែដាក់ផែនការដល់កម្លាំងនគរបាលការិយាល័យជំនាញចុះប្រតិបត្តិការបង្ក្រាបគ្រឿងញៀន កន្លែងណាដែលធ្លាប់បានបង្ក្រាបហើយមិនឱ្យងើបឡើងវិញបាននោះទេ ។ ជាក់ស្តែង កាលពីវេលាម៉ោង១និង៥នាទីរសៀលថ្ងៃទី១២ ឧសភា លោកបានដឹកនាំកម្លាំងជំនាញចុះបង្ក្រាបចាប់ឃាត់ខ្លួនជនសង្ស័យម្នាក់នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ពីបទជួញដូរគ្រឿនញៀនដែលជាមុខសញ្ញាចាស់កម្លាំងជំនាញបានធ្វើការស្រាវជ្រាវយូរហើយ ទើបឈានដល់ការបង្ក្រាបជាក់ស្តែង ។ ជនសង្ស័យឈ្មោះយាន សារឿន ភេទប្រុស អាយុ៤៣ឆ្នាំ នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ។ ជាមួយនឹងការចុះបង្ក្រាបនេះ កម្លាំងសមត្ថកិច្ចបានដកហូតវត្ថុតាងថ្នាំញៀនប្រភេទមេតំហ្វេតាមីនគ្រាប់ ពណ៌ក្រហម មានអក្សរWY ចំនួន១ថង់តូចពណ៌ខៀវ ស្មើនឹង២០០គ្រាប់ ។
ដោយឡែកកាលពីវេលាម៉ោង៣រសៀលថ្ងៃទី១២ ឧសភា នោះដែរ កម្លាំងនគរបាលក្រុងសិរីសោភ័ណបានចុះប្រតិបត្តិការបង្ក្រាបករណីលក់ចែកចាយគ្រឿងញៀន១ករណីទៀត នៅចំណុចផ្ទះជួល ស្ថិតនៅភូមិសែសិន សង្កាត់អូរអំបិល ក្រុងសិរីសោភ័ណ ចាប់ឃាត់ខ្លួនជន សង្ស័យម្នាក់ និងដកហូតវត្ថុតាងថ្នាំញៀនផង
ដែរ ។
លោកវរសេនីយ៍ត្រីរ៉ែម វីរៈ អធិការនគរបាលក្រុងសិរីសោសភ័ណបានឱ្យដឹងថា ជនសង្ស័យឈ្មោះសេម រ័ត្នធីតា ភេទស្រី អាយុ២០ឆ្នាំ ស្នាក់នៅផ្ទះជួលខាងលើ ។ ក្នុងការចុះបង្ក្រាបនេះ សមត្ថកិច្ចដកហូតបានវត្ថុតាងថ្នាំញៀន ប្រភេទមេតំហ្វេតាមីនគ្រាប់ពណ៌ក្រហម មានអក្សរ WY ចំនួន៥គ្រាប់ និងប្រភេទមេតំហ្វេតាមីនអាយស៍(ម៉ាទឹកកក)ចំនួន៥ថង់តូច រួមទាំងឧបករណ៍សម្រាប់ជក់មួយចំនួនទៀត រួចបញ្ជូនទៅស្នងការដ្ឋាននគរបាលខេត្ត ដើម្បីចាត់វិធានការបន្ត ។
លោកវរសេនីយ៍ឯកឆេន ឈួត ស្នងការរងនិងជាប្រធានការិយាល័យកណ្តាលនគរបាលយុត្តិធម៌ បានឱ្យដឹងដែរថា ជនសង្ស័យទាំង២នាក់រួមទាំងវត្ថុតាងត្រូវបាននគរបាលការិយាល័យជំនាញរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់ ៕
