ប្រធានាធិបតីអាមេរិកលោកបារ៉ាក់ អូបាម៉ា វាយតម្លៃកាលពីថ្ងៃទី១០ឧសភាថាអឺរ៉ុបស្ថិតក្នុងសភាពការណ៍លំបាកជានិច្ចខាងផ្នែកសេដ្ឋកិច្ចមួយផ្នែកមកពីអឺរ៉ុបពុំបានប្រកាន់យកវិធានការមួយចំនួនដូចដែលសហរដ្ឋអាមេរិកបានចាត់ ។
លោកអូបាម៉ាដែលថ្លែងទៅកាន់មនុស្សទាំងឡាយពេលដើរប្រមូលមូលនិធិសម្រាប់ឃោសនាបោះឆ្នោតនៅទីក្រុងស៊ីអេថល យល់ថា បណ្តាបញ្ហារបស់អឺរ៉ុប និងតម្លៃប្រេងសាំងឡើងខ្ពស់ក៏ជាកត្តាមួយក្នុងចំណោមកត្តាដែលធ្វើឱ្យប៉ះពាល់ដល់កំណើនសេដ្ឋកិច្ចរបស់សហរដ្ឋអាមេរិកដែរ ។ អឺរ៉ុបនៅតែស្ថិតក្នុងសភាពការណ៍លំបាកមួយផ្នែកមកពីខ្លួនពុំចាត់នូវវិធានការប្រកបដោយការតាំងចិត្តមួយចំនួនដូចដែលយើងបានចាត់តាំងពីចាប់ផ្តើមមានសេដ្ឋកិច្ចបាក់ស្រុតមក ។
ស្ថានភាពសុខភាពសេដ្ឋកិច្ចអាមេរិក នឹងជាកត្តាសំខាន់សម្រាប់ការបោះឆ្នោតប្រធានាធិបតីនាថ្ងៃទី៦វិច្ឆិកាខាងមុខនេះ ។ គូប្រជែងរបស់លោកអូបាម៉ាលោកមីតរ៉ូមនី បានចោទប្រកាន់ពួកប្រជាធិបតេយ្យថាខ្វះសមត្ថភាពដើម្បីទាញសហរដ្ឋអាមេរិកឱ្យចេញផុតពីការបាក់ស្រុតចុះនៃសេដ្ឋកិច្ចនិងកាត់បន្ថយអត្រាអ្នកឥតការងារធ្វើ ។
លោកអូបាម៉ាបន្តថា តម្លៃប្រេងសាំងខ្ពស់នៅតែប៉ះពាល់ដល់មនុស្សជាច្រើន។ តម្លៃផ្ទះនៅតែទាបក្នុងទូទាំងប្រទេស ក៏ប៉ុន្តែព័ត៌មានថ្មីគឺថាយើងបានងើបឡើងវិញហើយ ៕
ចែករំលែកព័តមាននេះ