នាថ្ងៃទី១០ឧសភាលោកបារ៉ាក់អូបាម៉ាទទួលបានប្រាក់ជាច្រើនលានដុល្លារសម្រាប់ទ្រទ្រង់ដល់ការឃោសនាបោះឆ្នោតដើម្បីឱ្យលោកបានជាប់ឆ្នោតជាថ្មីពីលោក GEORGE CLOONEY ដែលជាតួអង្គសំខាន់ម្នាក់ខាងប្រមូលប្រាក់ជួយប្រធានាធិបតីចប់អាណត្តិអាមេរិក ។
លោកអូបាម៉ា ដែលប្រជែងយកអាណត្តិទី២ រយៈពេល៤ឆ្នាំទៀត ក្នុងការបោះឆ្នោតប្រធានាធិបតីនាថ្ងៃទី៦ វិច្ឆិកា ខាងមុខនេះបានទៅកាន់គេហដ្ឋានរបស់តារាភាពយន្តនិងជាផលិតករខ្សែភាពយន្តហូលីវូដនោះ ស្ថិតនៅលើកូនភ្នំហូលីវូដ។ មែនហើយលោកអូបាម៉ាអាចទទួលបានពីតារាដ៏ល្បីបំផុតមួយរូបរបស់ហូលីវូដនូវប្រាក់ជួយទ្រទ្រង់ដល់ការឃោសនាបោះឆ្នោតដល់ទៅជិត១៥លានដុល្លារ ។ ប្រាក់ជួយទ្រទ្រង់ដែលត្រូវទទួលបាននាយប់ថ្ងៃទី១០ឧសភាមានចំនួន៦លានដុល្លារ ដែលជាពិសេសបានមកពីពួកអ្នកមានចំនួន១៥០នាក់ ។ មុនទៅកាន់ទីក្រុងឡូសអេនចឺឡេសលោកអូបាម៉ាឈប់សំចតនៅក្រុងស៊ីអេថល់ ដែលនៅទីនោះលោកអាចប្រមូលបានក្នុងកិច្ចប្រជុំប្រមូលប្រាក់២ នូវទឹកប្រាក់ជួយទ្រទ្រង់សរុបជាង៣លានដុល្លារ ។
លោកអូបាម៉ា ប្រមូលប្រាក់ជួយទ្រទ្រង់ការឃោសនាបោះឆ្នោតបាន២០០លានដុល្លារចាប់តាំងពីលោកប្រកាសឈរឈ្មោះជាបេក្ខជនពីខែមេសាឆ្នាំ២០១១មក ៕
ចែករំលែកព័តមាននេះ