នាយករដ្ឋមន្ត្រីបារាំងលោកហ្វ្រង់ស្វ័រហ្វីលឡូន កាលពីថ្ងៃទី១០ឧសភាបានប្រគល់ពាក្យសុំលាលែងរបស់រដ្ឋាភិបាលលោកជូនចំពោះប្រធានាធិបតីចប់អាណត្តិលោកនីកូឡាស់ សាកូហ្ស៊ី ដែលបានយល់ព្រមតាមសំណើនោះ។វិមានប្រធានាធិបតីបារាំងអេលីហ្សេក្នុងសេចក្តីប្រកាសមួយគូសបញ្ជាក់ថា លោកហ្វីលឡូនជាមួយបណ្តាសមាជិករដ្ឋាភិបាលលោកនឹងបំពេញកិច្ចការប្រចាំថ្ងៃរហូតដល់ការបង្កើតបានរដ្ឋាភិបាលថ្មីមួយ ។
ការសុំលាលែងរបស់រដ្ឋាភិបាលលោកហ្វីលឡូនធ្វើឡើងខណៈដែលក្រុមប្រឹក្សាធម្មនុញ្ញអះអាងពីលទ្ធផលនៃការបោះឆ្នោតប្រធានាធិបតីជុំទី២កាលពីថ្ងៃទី៦ឧសភាកន្លងមកនេះ ដែលបេក្ខជននៃគណបក្សសង្គមនិយមបារាំងលោកហ្វ្រង់ស្វ័រហូឡង់ជាអ្នកឈ្នះ ។
ដោយទទួលសំឡេងគាំទ្រ៥១,៦%ក្នុងការបោះឆ្នោតប្រធានាធិបតីជុំទី២ លោកហ្វ្រង់ស្វ័រហូឡង់ នឹងជាជនសង្គមនិយមដំបូងកាន់តំណែងប្រធានាធិបតីបារាំងចាប់តាំងពីលោកហ្វ្រង់ស្វ័រមីតេរ៉ង់ដឹកនាំប្រទេសពីឆ្នាំ១៩៨១ ដល់១៩៩៥មក ។
អាណត្តិប្រធានាធិបតីរបស់លោកនីកូឡាស់សាកូហ្ស៊ីនឹងផុតនាថ្ងៃទី១៥ឧសភាខាងមុខនេះដោយនាថ្ងៃនោះនឹងមានការផ្ទេរអំណាចនិងការធ្វើសច្ចាប្រណិធានចូលកាន់តំណែងរបស់ប្រធានាធិបតីថ្មី ៕
ចែករំលែកព័តមាននេះ