ភាពតានតឹងមានការកើនឡើងថែមទៀតរវាងស៊ូដង់និងស៊ូដង់ខាងត្បូងក្រោយការប៉ះទង្គិចគ្នាថ្មីៗនៅតាមព្រំដែនទោះបីជាមានដំណោះស្រាយមួយរបស់ក្រុមប្រឹក្សាសន្តិសុខអ.ស.បដែលស្នើឱ្យប្រទេសទាំង២បញ្ឈប់ការប្រទូស្តរ៉ាយគ្នាក៏ដោយ ។ប្រធានាធិបតីស៊ូដង់លោកអូម៉ាអែលបេសៀរ បានព្រមានកាលពីថ្ងៃទី១០ឧសភាថាប្រទេសរបស់លោកនឹងមិនធ្វើតាមទាំងអ.ស.បទាំងសហភាពអាហ្វ្រិកដែលនោះជាការធ្វើឱ្យប៉ះពាល់ថែមទៀតដល់ការអនុវត្តដំណោះស្រាយមួយដែលឱ្យក្រុងខាទុមនិងក្រុងជូបា បញ្ឈប់ការប្រទូស្តរាយគ្នា ។
ក្នុងសុន្ទរកថាមួយនៅក្រុងខាទុមលោកប្រធានាធិបតីបេសៀរថ្លែងថា យើងនឹងអនុវត្តតាមដំណោះស្រាយពេលដែលយើងចង់ ប៉ុណ្ណោះ ។ គ្មាននរណាម្នាក់អាចបង្ខិតបង្ខំឱ្យយើងធ្វើនូវអ្វីដែលយើងពុំចង់ធ្វើនោះឡើយ ទាំងក្រុមប្រឹក្សាសន្តិសុខអ.ស.ប ទាំងក្រុមប្រឹក្សាសន្តិភាពនិងសន្តិសុខរបស់សហភាពអាហ្វ្រិក ។
ក្នុងដំណោះស្រាយរបស់ខ្លួនគាំទ្រដោយសហភាពអាហ្វ្រិកក្រុមប្រឹក្សាសន្តិសុខអ.ស.ប បានស្នើដល់ប្រទេសជិតខាងទាំង២ឱ្យបញ្ឈប់ការប្រយុទ្ធគ្នានៅតាមព្រំដែនបើពុំដូច្នោះទេ នឹងទទួលរងទណ្ឌកម្មរួចចាប់ផ្តើមការចរចាគ្នាយ៉ាងយូរត្រឹមថ្ងៃទី១៦ឧសភា ។
ខណៈដែលការប្រយុទ្ធគ្នាយ៉ាងសាហាវនានាត្រូវបានរាយការណ៍ថាកើតមាននៅតាមបណ្តោយព្រំដែនដែលមានជម្លោះ ស៊ូដង់ខាងត្បូងនិយាយថាខ្លួនត្រៀមចរចាគ្នាគ្រប់ពេល ។ លោកដេងអាល័រ រដ្ឋមន្ត្រីខុទ្ទកាល័យប្រធានាធិបតីស៊ូដង់ខាងត្បូងនិយាយកាលពីថ្ងៃទី១០ឧសភាថា ប្រសិនបើយើងមិនអនុវត្តនិងមិនធ្វើតាមដំណោះស្រាយរបស់ក្រុមប្រឹក្សាសន្តិសុខអ.ស.បនោះជម្លោះនឹងអាចកាន់តែរីកធំ ។
កងទ័ពស៊ូដង់ក្នុងសេចក្តីប្រកាសមួយកាលពីយប់ថ្ងៃទី៩ ឧសភានិយាយថា ការប្រយុទ្ធគ្នាយ៉ាងសាហាវនានាកើតមានរវាងកងទ័ពស៊ូដង់និងកងទ័ពស៊ូដង់ខាងត្បូងនៅតាមព្រំដែនរវាងប្រទេសទាំង២ ហើយកងទ័ពស៊ូដង់អាចវាយរុញច្រានកងទ័ពស៊ូដង់ខាងត្បូងនិងសម្ព័ន្ធមិត្តគឺពួកឧទ្ទាមនៅដាហ្វួរ ៕
ចែករំលែកព័តមាននេះ