មេរត់ពន្ធគ្រឿងញៀនដែលសង្ស័យជាមេគំនិតនៃការវាយប្រហារបង្ហូរឈាមសម្លាប់នាវិកចិន១៣នាក់តាមដងទន្លេមេគង្គកាលពីឆ្នាំទៅមិញ ត្រូវបានបញ្ជូនមកឱ្យប៉ូលិសចិនហើយ កាលពីថ្ងៃទី១០ឧសភា ។ជនឈ្មោះណាវ ខាម ប្រមុខក្រុមប្រដាប់អាវុធនៃពួកអ្នករត់ពន្ធគ្រឿងញៀនត្រូវចាប់ខ្លួនបានកាលពីថ្ងៃទី២៥មេសាកន្លងមកនេះក្នុងកន្លែងដែលគេលាក់មួយ ហើយត្រូវបានធ្វើបត្យាប័នមកកាន់ប្រទេសចិន តាមយន្តហោះមួយគ្រឿងដែលជួលជាពិសេសដោយអាជ្ញាធរចិន ។
លោក LIU YUEJIN ប្រធានការិយាល័យត្រួតពិនិត្យគ្រឿងញៀនចំណុះឱ្យក្រសួងសន្តិសុខសាធារណៈចិនរាយការណ៍ថា ចិន ឡាវ មីយ៉ាន់ម៉ា និងថៃ បានធ្វើការរួមគ្នា ដើម្បីតស៊ូប្រឆាំងឧក្រិដ្ឋកម្មឆ្លងជាតិ ហើយសម្រេចបានការចាប់ខ្លួនជនឈ្មោះណាវខាមនោះ និងសមាជិកក្រុមគេមួយចំនួន ។
ក្រុមរបស់ណាវខាមមានគ្នាជាង១០០នាក់ និងប្រដាប់ដោយកាំភ្លើងធុនAK ធុនM16 បាសូកា និងកាំភ្លើងយន្ត ។ ពួកគេទទួលការចោទប្រកាន់ពីបទរត់ពន្ធគ្រឿងញៀន ចាប់ពង្រត់មនុស្ស សម្លាប់មនុស្ស ប្លន់និងប្រព្រឹត្តបទឧក្រិដ្ឋដទៃៗទៀតតាមបណ្តោយទន្លេមេគង្គចាប់តាំងពីច្រើនឆ្នាំមកហើយ ៕
ចែករំលែកព័តមាននេះ