ស្រាបៀរហ្គោលក្រោនជាស្រាបៀរដែលពេញនិយមក្នុងប្រទេសកម្ពុជា បានបង្កើតនូវមោទនភាពដ៏ធំធេងសម្រាប់ប្រទេស ដោយនាំមកជាមួយនូវមេដាយមាសទី៣របស់ខ្លួនក្នុងការប្រកួត Monde Selection នៅប្រទេសបែលហ្ស៊ិក។ ស្រាបៀរហ្គោលក្រោនក៏ធ្លាប់បានឈ្នះមេដាយសំរឹទ្ធក្នុងការប្រកួត World Beer Cup ឆ្នាំ២០០៤ផងដែរ ។ ក្រោមការវិនិច្ឆ័យដ៏សុក្រឹតក្នុងការប្រកួតស្រាបៀរអន្តរជាតិដែលដូចជាកីឡាអូឡាំពិក ស្រាបៀរហ្គោលក្រោនបានឈ្នះមេដាយសំរឹទ្ធចំនួន២ ដោយមួយឈ្នះក្នុងកម្មវិធី European-Style Pilsner និងមួយទៀតក្នុងកម្មវិធី Australian International Beer ។
លោក Roland Bala អគ្គនាយករោងចក្រផលិតស្រាបៀរកម្ពុជា (CBL) បានមានប្រសាសន៍ថា ៖ «យើងមានកិត្តិយសដ៏ថ្លៃថ្លាដែលបានឈ្នះមេដាយមាសនេះ ក៏ដូចជាមេដាយមាសដទៃទៀតសម្រាប់ Tiger, ABC Stout និង Anchor ផងដែរ នេះស្តែងឱ្យឃើញថា រោងចក្ររបស់យើងគឺជារោងចក្រមួយក្នុងចំណោមរោងចក្រផលិតស្រាបៀរដ៏ល្អបំផុតក្នុងតំបន់ ហើយនេះក៏ជាការលើកទឹកចិត្តដ៏ខ្លាំងក្លាសម្រាប់យើងទាំងអស់គ្នា» ។
បើវិភាគឱ្យកាន់តែច្បាស់ទៅលើមេដាយមាសរបស់ស្រាបៀរហ្គោលក្រោនបញ្ជាក់ឱ្យឃើញថា រោងចក្រផលិតស្រាបៀរកម្ពុជា (CBL) ជារោងចក្រកម្រិតស្តង់ដាអន្តរជាតិ ហើយមេដាយមាសដែលបានពីប្រទេសបែលហ្ស៊ិក នេះគឺភស្តុតាងដ៏ច្បាស់លាស់។ ហ្គោលក្រោនទទួលបានការពេញនិយមបំផុតសម្រាប់ប្រជាជនកម្ពុជា ជាពិសេសនៅតាមបណ្តាខេត្តនានា ហើយពេលនេះក៏មានការទទួលស្គាល់ជាអន្តរជាតិនៅប្រទេសបែលហ្ស៊ិកផងដែរ ៕
ចែករំលែកព័តមាននេះ