ទូរទស្សន៍រដ្ឋស៊ីរីនិងអង្គការសិទ្ធិមនុស្សស៊ីរី OSDH រាយការណ៍ថា ការវាយប្រហារភេរវកម្ម២ដែលកើតមានកាលពីថ្ងៃទី១០ឧសភានៅក្រុងដាម៉ាស់បណ្តាលឱ្យមនុស្សស្លាប់និងរបួសជាច្រើនសិបនាក់ភាគច្រើនជាជនស៊ីវិល ។ទូរទស្សន៍នោះបានផ្សាយរូបភាពដំបូងទាំងឡាយដែលបង្ហាញពីសាកសពមនុស្សជាច្រើនត្រូវភ្លើងឆេះរោលនៅក្បែរខ្មោចរថយន្តជាច្រើនសិបគ្រឿង ដែលខ្លះនៅមានភ្លើងឆេះនិងផ្សែងហុយនៅឡើយដោយបញ្ជាក់ថា ការវាយប្រហារភេរវកម្មទាំងនេះកើតមាននៅលើផ្លូវ ហៃវេមួយ ពេលមនុស្សម្នាជាច្រើនកំពុងធ្វើដំណើរទៅធ្វើការហើយសិស្សលាលានាំគ្នាទៅរៀន ។
ពួកភ្នាក់ងារជួយសង្គ្រោះរួមទាំងប្រជាជនបានខិតខំប្រមូលសាកសពមនុស្សទាំងឡាយដែលត្រូវភ្លើងឆេះរោល ។ បុរសម្នាក់ដែលឈឺចាប់ពេកស្រែកថា នេះឬជាសេរីភាពដែលពួកអ្នកឯងចង់បាន ? សិស្សទាំងឡាយ ដែលនាំគ្នាទៅសាលានិងបណ្តានិយោជិតចេញទៅធ្វើការត្រូវស្លាប់ ។ បុរសនេះចង់និយាយសំដៅលើពួកបះបោរប្រឆាំងរបបលោកប្រធានាធិបតីបាចាអាល់អាសាដ ។
ចំណែកខាងអង្គការOSDH វិញគូសបញ្ជាក់ថា ការផ្ទុះយ៉ាងខ្លាំង២ក្នុងនោះមានរថយន្តបង្កប់គ្រឿងផ្ទុះមួយសំដៅលើមជ្ឈមណ្ឌលស៊ើបការណ៍មួយ ។
យោងតាមយកអ្នកព័ត៌មាន AFPថារថយន្តស៊ីវិលជាច្រើនគ្រឿងត្រូវបំផ្លាញ ហើយផ្នែកខាងមុខនៃអគារមួួយចំនួនរងការខូចខាត ។ ប្រមុខអ្នកសង្កេតការណ៍របស់អ.ស.ប ឧត្តមសេនីយ៍ន័រវែស ROBERT MOOD បានទៅកាន់កន្លែងវាយប្រហារនេះ ៕
ចែករំលែកព័តមាននេះ