សារព័ត៌មានបរទេស កាលពីថ្ងៃទី៩ ឧសភា ផ្សាយឱ្យដឹងថា មានហេតុការណ៍ដ៏លេចធ្លោមួយនៅប្រទេសចិន គឺសិស្សនាំគ្នា«ព្យួរស៊ីរ៉ូមប្រៃ» ដើម្បីត្រៀមខ្លួនចូលប្រឡងបញ្ចប់កម្រិតមធ្យមសិក្សាទុតិយភូមិ នៅសាលាមធ្យមសិក្សាសៀវកាំង ក្នុងតំបន់ហ៊ឺប៉ើយ។ ហេតុការណ៍នោះ ផ្សព្វផ្សាយតាមប្រព័ន្ធអ៊ីនធើរណេតផងដែរ ។
តាមការបង្ហើបឱ្យដឹងរបស់សាលាមធ្យមសិក្សាមួយថា ការព្យួរស៊ីរ៉ូមប្រៃ របស់សិស្ស កំពុងមានការនិយម ព្រោះមិនបង្កឱ្យមានគ្រោះថ្នាក់ និងថែមទាំងជួយដល់ពួកគេឱ្យមានសភាពធូរស្រាល ។សាលាមិនបានហាមសិស្សដែលធ្វើបែបនោះទេ និងយល់ព្រមឱ្យសិស្សត្រូវព្យួរស៊ីរ៉ូម ប្រសិនបើមានតម្រូវការ ខណៈពេលអ្នកជំនាញបញ្ជាក់ថា ការព្យួរស៊ីរ៉ូមប្រៃ នឹងជួយឱ្យសិស្សមានកម្លាំងកំហែង និងបង្កើតភាពរឹងមាំដល់សុខភាព។
សារព័ត៌មានក្នុងស្រុកផ្សាយថា រដ្ឋាភិបាលកំពុងស៊ើបអង្កេតលើករណីដែលកើតឡើង និងអះអាងថា ការព្យួរស៊ីរ៉ូម គឺ មិនចាំបាច់ទេ ហើយវាអាចធ្វើឱ្យឆ្លងវីរុស ។ អ្នកពេញនិយមខាងប្រព័ន្ធវេបសាយមួយចំនួនបានឆ្លុះបញ្ចាំងទស្សនៈថា សិស្សភ្លូកទឹកភ្លូកដីព្យួរស៊ីរ៉ូមប្រៃនេះ មិនមែនមានន័យថា ពួកគេកំពុងមានជំងឺទេ ប៉ុន្តែដោយសារសង្គមមានការប្រកួតប្រជែង និងជាផ្នែកមួយជួយឱ្យពួកគេទទួលផលប្រយោជន៍នៅពេលអនាគត ។
កន្លងមក បណ្តាកំលោះ-ក្រមុំ ក្នុងប្រទេសចិនយល់ថា ការប្រឡងសញ្ញាបត្រមធ្យមសិក្សាទុតិយភូមិក្នុងអំឡុងខែមិថុនា គឺជាការសម្រេចពីអនាគតរបស់ខ្លួនស្របតាមគោលដៅនៃការសិក្សាដែលពួកគេត្រូវការ ៕
ចែករំលែកព័តមាននេះ