ប្រភពពីសារព័ត៌មានបរទេសកាលពីថ្ងៃទី៨ ឧសភា ផ្សាយថា «មៀវ»ជាឆ្មាធាត់ពណ៌ស-លឿង មានទម្ងន់១៧,៦គីឡូក្រាម ដែលទទួលចំណាប់អារម្មណ៍ពីសំណាក់អ៊ីនធើរណេត ព្រោះតែការធាត់ និងគួរឱ្យស្រឡាញ់នោះ បានងាប់ដោយសារជំងឺធាត់កាលពីថ្ងៃទី៥ ឧសភា កន្លងទៅ ។
មជ្ឈមណ្ឌលការពារសត្វ«សានតា ហ្វេ» ក្នុងរដ្ឋញូវម៉ិចស៊ិក សហរដ្ឋអាមេរិក បានទទួល «មៀវ»យកទៅចិញ្ចឹមបន្តពីម្ចាស់អាយុ៨៧ឆ្នាំ កាលពីខែមុន ព្រោះមិនអាចចិញ្ចឹមបានដោយសារការចំណាយលើថ្លៃចំណីអាហារច្រើន ។ ក្រុមអ្នកធ្វើការនៅក្នុងមជ្ឈមណ្ឌលនេះនិយាយថា ពួកគេគ្រប់គ្នាមានអារម្មណ៍សោកស្តាយក្រៃលែងចំពោះការងាប់របស់វា ។ កន្លងមក ខាងមជ្ឈមណ្ឌលបានព្យាយាមហ្វឹកហ្វឺនឱ្យមៀវសម្រកទម្ងន់ និងថតរូបភាពបង្ហាញក្នុងគេហទំព័រ ឬប្រព័ន្ធអ៊ីនធើរណេត ដើម្បីឱ្យអ្នកមានចំណាប់អារម្មណ៍បានឃើញពីស្ថានភាពរស់នៅរបស់វាជាប្រចាំ ។
ប៉ុន្តែក្រោយពីមៀវសម្រកទម្ងន់បាន២គីឡូក្រាម វាក៏ចាប់ផ្តើមមានបញ្ហាដង្ហើម ទោះបីជាព្យាបាល ឬផ្តល់ថ្នាំក៏មិនអាចជួយវាឱ្យរួចផុតគ្រោះថ្នាក់បានឡើយ ៕
ចែករំលែកព័តមាននេះ