យោងតាមការសិក្សាមួយអះអាងថា មនុស្សប្រុសពេញវ័យអាយុពី១៩ទៅ២៤ឆ្នាំដែលចូលចិត្តលេងកីឡា៣ប្រភេទជាប្រចាំ(បាល់ទាត់ បាល់ទះ បាល់បោះឬកីឡាតឺន្នីស)នឹងធ្វើឱ្យពួកគេគេចផុតពីជំងឺឆ្អឹងស្រួយ(ឆ្អឹងងាយបាក់)។
អ្នកវិទ្យាសាស្ត្រនិយាយថា កាលេងកីឡាបាល់ទះ បាល់បោះឬកីឡាផ្សេងទៀតដូចជាបាល់ទាត់និងតឺន្នីសជាដើមរយៈពេល៤ម៉ោងក្នុងមួយសប្តាហ៍ឬច្រើនជាងនេះជួយបង្កើនទម្ងន់ឆ្អឹង ហើយអាចជួយទប់ស្កាត់ជំងឺពុកឆ្អឹងបាន ។
អ្នកដឹកនាំការស្រាវជ្រាវ វេជ្ជបណ្ឌិត Mattias Lorentzonមកពីសាកលវិទ្យាល័យ University of Gothenburg នៅប្រទេសស៊ុយអែតបាននិយាយថា៖«បណ្តាបុរសដែលធ្វើសកម្មភាពលេងកីឡាបាល់ទាត់ ទាល់ទះឬតឺន្នីសពីអាយុ១៩ឆ្នាំទៅ២៤ឆ្នាំមិនត្រឹមតែធ្វើឱ្យឆ្អឹងរឹងមាំប៉ុណ្ណោះទេ តែថែមទាំងធ្វើឱ្យឆ្អឹងលូតលាស់ធំជាងឆ្អឹងអ្នកដែលមិនបានលេងកីឡាប្រភេទនេះក្នុងវ័យដូចគ្នាទៀតផង »។ឆ្អឹងធំនិងមានទម្ងន់ត្រូវគេគិតថាគឺជាខែលការពារដ៏រឹងមាំប្រឆាំងនឹងជំងឺពុកឆ្អឹង។
វេជ្ជបណ្ឌិត Mattias Lorentzonបានបន្ថែមថា៖«ជំងឺពុកឆ្អឹងចាប់ផ្តើមកើតមាននៅពេលមនុស្សប្រុសស្រីមានអាយុ២៥ឆ្នាំគឺនៅពេលដែលឆ្អឹងរបស់ពួកគេចាប់ផ្តើមបាត់បង់ភ្នាសរបស់វា។ ដូច្នេះលទ្ធផលនៃការសិក្សានេះបានបញ្ជូនសារដ៏សំខាន់មួយទៅកាន់បណ្តាបុរសវ័យក្មេងទាំងឡាយថា អ្នកកាន់តែធ្វើសកម្មភាពលេងកីឡា ឆ្អឹងរបស់អ្នកកាន់តែលូតលាស់»។
ក្រុមអ្នកស្រាវជ្រាវជឿថា ប្រភេទកីឡាដែលទាក់ទងនឹងសកម្មភាពដូចជាលោត ហក់ ចាប់ផ្តើមសកម្មភាពរហ័សរួចក៏ឈប់គឺសុទ្ធតែបង្កើនទម្ងន់លើរាងកាយដែលប្រការនេះនាំឱ្យដង់ស៊ីតេឆ្អឹងកើនឡើងនិងធ្វើឱ្យឆ្អឹងរឹងមាំ។ទន្ទឹមនឹងនេះក៏មានកីឡាមួយចំនួនផងដែរដែលផ្តល់ផលល្អដល់សុខភាព ប៉ុន្តែមិនធ្វើឱ្យឆ្អឹងមានទម្ងន់។ កីឡាទាំងនោះមានដូចជា ហែលទឹកនិងជិះកង់ជាដើម។
ការសិក្សាដែលបានចំណាយពេលអស់៥ឆ្នាំនេះបានពិនិត្យឃើញថា រាល់ការលេងកីឡា៣ ប្រភេទខាងលើ៤ម៉ោងក្នុងមួយសប្តាហ៍ ដង់ស៊ីតេឆ្អឹងត្រគាកកើន១,៣ភាគរយ ៕
ចែករំលែកព័តមាននេះ