ទស្សនវិទូជាច្រើនបានលើកឡើងថា គុណភាពអប់រំរបស់សិស្សានុសិស្សទាំងអស់ ស្ថិតនៅលើមុំសំខាន់៣គឺ គ្រួសារ សាលារៀន និងសង្គម ។ ក្នុងនោះក្រុមគ្រួសារបានដើរតួយ៉ាងសំខាន់ក្នុងការអប់រំពីវប្បធម៌ ទំនៀមទម្លាប់ ការស្រឡាញ់ ក្តីមេត្តាករុណា និងសិល្បៈនៃការចែករំលែកជាដើម។
ចំណែកគ្រឹះស្ថានអប់រំវិញផ្តល់នូវចំណេះដឹងក្នុងសង្គមដូចជាច្បាប់ ប្រវត្តិសាស្ត្រ សីលធម៌ អរិយធម៌ និងជំនាញវិជ្ជាជីវៈផ្សេងៗជាដើម។ ដោយសារកត្តាទាំងនេះហើយ ទើបនៅថ្ងៃអាទិត្យទី៦ ឧសភា ឆ្នាំ២០១២ សាលារៀនសុវណ្ណភូមិ ដែលមានលោកជា ធីឡាយ ជាអគ្គនាយកអ៊ិនធីស៊ីគ្រុប និងលោកឃឹម ផុន ជានាយកប្រតិបត្តអិុនធីស៊ីគ្រុប បានជួយគាំទ្រទាំងកម្លាំងកាយ កម្លាំងចិត្ត និងថវិកា ដើម្បីបង្កឱ្យមានការរៀបចំដំណើរទស្សនកិច្ចសិក្សាមួយសម្រាប់សិស្សានុសិស្សទៅកាន់រមណីយដ្ឋានភ្នំព្រះរាជទ្រព្យ ដោយមានការចូលរួមពីសំណាក់សិស្សានុសិស្សថ្នាក់ពេញម៉ោងភាសាអង់គ្លេស និងលោកគ្រូ-អ្នកគ្រូ នៃសាលារៀនសុវណ្ណភូមិទីតាំងវត្តភ្នំចំនួន១៥០នាក់ ក្នុងគោលបំណងឱ្យសិស្សានុសិស្សបានស្វែងយល់អំពីប្រវត្តិសាស្ត្រខ្មែរ និងអតីតរាជធានីខ្មែរផងដែរ។នេះគឺជាចំណេះដឹងបន្ថែមទៀតសម្រាប់ប្អូនៗដែលជាកុលបុត្រ-កុលធីតាខ្មែរ។ ម៉្យាងវិញទៀតដើម្បីរឹតចំណងសាមគ្គីភាពរវាងគ្នានិងគ្នា ក៏ដូចជាឱ្យប្អូនៗសិស្សានុសិស្សបានជ្រះថ្លាអារម្មណ៍ក្រោយពីបានប្រឡងបញ្ចប់វគ្គសិក្សា។
លោកណុប ប៉ុណ្ណ នាយកសាលារៀនសុវណ្ណភូមិទីតាំងវត្តភ្នំបានមានប្រសាសន៍ថា គណៈគ្រប់គ្រងសាលារៀនតែងតែយកចិត្តទុកដាក់រៀបចំដំណើរទស្សនកិច្ចសិក្សា និងសកម្មភាពផ្សេងៗ ដើម្បីជាជំនួយដល់ការសិក្សារបស់ប្អូនៗសិស្សានុសិស្ស ។ ម៉្យាងវិញទៀត ក្រសួងអប់រំយុវជន និងកីឡាក៏បាន និងកំពុងតែគាំទ្រ និងលើកទឹកចិត្តដល់គ្រប់សាលាទាំងអស់នៅក្នុង ព្រះរាជាណាចក្រកម្ពុជាយើងឱ្យមានការរៀបចំ នូវដំណើរទស្សនកិច្ចសិក្សាឱ្យបានច្រើនទៀតផង ។
លោកបានបន្ថែមថា សាលារៀនសុវណ្ណភូមិ សូមថ្លែងអំណរគុណចំពោះការគាំទ្រយ៉ាងកក់ក្តៅពីសំណាក់មាតាបិតាសិស្សនិងប្អូនៗសិស្សានុសិស្សទាំងអស់។ ដូច្នេះ ដើម្បីឆ្លើយតបនឹងការគាំទ្រនេះសាលារៀនសុវណ្ណភូមិក៏បានរៀបចំកម្មវិធីដំណើរទស្សនកិច្ចនេះឡើងក្នុងគោលបំណងដើម្បីឱ្យសិស្សានុសិស្សបានយល់ដឹង និងស្គាល់នូវកេរមរតករបស់ដូនតាខ្មែរយើងដែលបានបន្សល់ទុកសម្រាប់កូនចៅជំនាន់ក្រោយ។ ម៉្យាងវិញទៀត ដំណើរទស្សនកិច្ចសិក្សានេះបានបណ្តុះគំនិត និងទឹកចិត្តរបស់ប្អូនៗសិស្សានុសិស្សទាំងអស់ ឱ្យចេះស្រឡាញ់ និងថែរក្សាសម្បត្តិវប្បធម៌របស់ខ្មែរយើងឱ្យនៅគង់វង្សយូរអង្វែងសម្រាប់លើកស្ទួយនូវព្រលឹងជាតិឱ្យកាន់តែរុងរឿងថែមទៀត។ មិនត្រឹមតែទៅទស្សនាប៉ុណ្ណោះទេ គឺនៅក្នុងដំណើទស្សនកិច្ចនេះគណៈគ្រប់គ្រងសាលាបានបញ្ជ្រាបចូលនូវកម្មវិធីមួយចំនួនទៀតដូចជាការស្រឡាញ់ និងដឹងគុណមាតាបិតានិងគ្រូបង្រៀន ។ ទន្ទឹមនឹងដំណើរកម្សាន្ត សាលាបានរៀបចំនូវកម្រងសំណួរស្រាវជ្រាវដែលពាក់ព័ន្ធទៅនឹងទីកន្លែងដែលពួកគេបានទស្សនា និងកម្មវិធីផ្សេងៗ គឺដើម្បីជំរុញទឹកចិត្តរបស់ប្អូនៗឱ្យខិតខំស្រាវជ្រាវ និងយកចិត្តទុកដាក់ស្វែងយល់អំពីដំណើរទស្សនកិច្ចសិក្សានោះឱ្យបានកាន់តែច្រើនថែមទៀតផង។ ពិសេសជាងនេះទៅទៀត គណៈគ្រប់គ្រងសាលាបាននាំសិស្សានុសិស្សទាំងអស់ចូលរួមបង្សុកូល ដើម្បីឧទ្ទិសកុសលជូនដល់បុព្វការីជន និងបុព្វបុរសខ្មែរ ដែលបានពលីជីវិតដើម្បីបុព្វហេតុជាតិមាតុភូមិ និងជាការសុំសេចក្តីសុខដល់ខ្លួនឯង គ្រួសារ និងប្រទេសជាតិទាំងមូលផងដែរ។
គណៈគ្រប់គ្រងសាលារៀនសុវណ្ណភូមិសង្ឃឹមថា ប្អូនៗសិស្សានុសិស្សទាំងអស់នឹងទទួលបាននូវអារម្មណ៍សប្បាយរីករាយ និងចំណេះដឹងថ្មីៗជាច្រើន ចំពោះដំណើរទស្សនកិច្ចសិក្សានេះ ហើយក៏សូមថ្លែងអំណរគុណចំពោះការគាំទ្រ និងផ្តល់នូវទំនុកចិត្តមកលើសេវាកម្ម និងកម្មវិធីសិក្សារបស់សាលារៀនសុវណ្ណភូមិ របស់លោក លោកស្រី ដែលជាអាណាព្យាបាលសិស្ស ក៏ដូចជាប្អូនៗសិស្សានុសិស្សទាំងអស់ ៕
ចែករំលែកព័តមាននេះ