ទី ចាន់ថា-សឿន វ៉ាន់នី-ឈិន រស្មី និង ឡុង វីរះ ក្លាយជាម្ចាស់ប្រាក់លាន ខណះពេលដែល សូយ លឿប ថ្លើមធំហ៊ានតតាំងជាមួយ ឡៅ ស៊ីណាត
ដោយ ៖ឈិត គឹមឆុន
ថ្ងៃសុក្រ ទី២៨ ខែឧសភា ឆ្នាំ២០១០ ម៉ោង ០៩:៤០
រាជធានីភ្នំពេញ ៖ នៅលើសង្វៀនប្រដាល់ស្ថានីយទូរទស្សន៍បាយ័ន សំរាប់ថ្ងៃ សៅរ៍ ទី២៩ ឧសភា ខាងមុខនេះ ពិតជាកក្រើក ។ ក្រៅពីការប្រកួតឈានឆ្ពោះទៅដណ្ដើមប្រាក់លានដែលចូលរួមដោយជើង ខ្លាំង៤រូបនោះ នៅមានការប្រកួតរវាងគូឯក ១គូទៀត ដែលគេមិននឹកស្មានដល់ គឺកីឡាករ សូយ លឿប មកពីក្លឹបអូដឹមកីឡាហ៊ានប្រកាសវាយជាមួយ ឡៅ ស៊ីណាត មកពីក្លឹប កងពលតូចឆត្រយោង៩១១ ។
ឡៅ ស៊ីណាត ជាអ្នកប្រដាល់ល្បី១រូប ដែលស្ទើរតែគ្មានដៃគូទៅហើយស្រាប់តែ ពេលនេះ សូយ លឿប ដែលទើបតែមានមុខម្ង៉ៃនោះសោះ ហ៊ានប្រកាសសាកល្បងជា មួយដោយគ្មានខ្លាចញញើតបន្ដិចសោះ ។ លោកហង្ស ស៊ឺន ប្រធានក្លឹបឆត្រយោង ៩១១ នឹងជាគ្រូបង្ហាត់ ស៊ីណាត ផ្ទាល់បាន ប្រាប់កោះសន្ដិភាពថា ពីមុនលោកមានការ ខ្វល់ខ្វាយក្នុងការធ្វើយ៉ាងណាបង្ហាត់បង្រៀនកូនសិស្សឱ្យក្លាយជាអ្នកប្រដាល់ល្បី ហើយ ពេលនេះ ស៊ីណាត ដែលជាសិស្សឆ្នើមប្រចាំ ក្លឹបបានក្លាយជាអ្នកល្បីយ៉ាងខ្លាំង ប៉ុន្ដែលោក នៅតែពិបាកចិត្ដ ពីព្រោះ ស៊ីណាត មិនមាន ដៃគូ និងគ្មានឱកាសបានឡើងសង្វៀន ។
លោកបានឱ្យដឹងទៀតថា ស៊ីណាត ឡើងប្រកួតម្ដង ត្រូវសំរាកពី៣ទៅ៦ខែឯណោះ ដូច្នេះលោកមានការព្រួយបារម្ភចំពោះវិជ្ជាគុនដែលត្រូវបានទុកចោលក្នុងពេលវេលាមួយមិនទៀងទាត់បែបនេះ ។ ជាការពិត ឡៅ ស៊ីណាត ចាប់តាំងពីចាប់អាជីពជាអ្នក ប្រដាល់ ប្រវត្ដិចាញ់របស់គេមានតិចតូចបំផុត ហើយអ្នកប្រដាល់រូបនេះ ត្រូវទទួលបានការ កោតសរសើរថា ជាសិស្សដែលចេះតស៊ូព្យា យាមហ្វឹកហាត់មិនខ្ជះខ្ជាយពេលវេលា ។ ចំណែកលោកសូយ សុខុម គ្រូបង្វឹករបស់ សូយ លឿប វិញ ក៏ទទួលស្គាល់ថា ស៊ីណាត ខ្លាំងដែរ ប៉ុន្ដែ សូយ លឿប កូនសិស្សរបស់ គាត់ក៏មិនអន់ដែរ ទោះបីគេជាសិស្សប្អូនក៏ដោយ ។
សូយ លឿប ត្រូវបានគេដឹងថា ជាអ្នកប្រដាល់ដែលមានកំលាំងស៊ុហ្វរឹងមាំល្អ ហើយក៏ជាអ្នកប្រដាល់ដែលពិបាកបង្ក្រាប ម្នាក់ដែរ។ ប្រកួតចុងក្រោយរបស់ សូយ លឿប កាលពីថ្ងៃទី១៦ ឧសភា កន្លងមក គេ បានបំបាក់ ឡេះ តើក មកពីក្លឹបពុទ្ធសេរីវង្ស ព្រែកតាទែន ឱ្យសន្លប់ក្នុងទឹកទី២ ។ ទោះបី បែបណាគ្មាននរណាជឿថា សូយ លឿប អាចយកឈ្នះ ស៊ីណាត ឡើយ ប៉ុន្ដែអ្វីៗក៏មិនទៀងទាត់ដែរ ករណីដែលស្មានមិនដល់នោះអាចកើតមានបានគ្រប់ពេលវេលា ។
ក្នុងឱកាសនោះដែរ ជើងខ្លាំង៤រូប ដែលចំរាញ់ចេញពីការប្រកួតជំរុះកាលពីសបា្ដហ៍ មុនត្រូវឡើងមកតតាំងគ្នា ដើម្បីឈានទៅដណ្ដើមប្រាក់លានដែលឧបត្ថម្ភដោយអាជ្ញាធរជាតិប្រយុទ្ធប្រឆាំងគ្រឿងញៀន ។ អ្នកប្រដាល់ទាំង៤រូបនោះគឺ គូទី១-ទី ចាន់ថា មកពីក្លឹបកងរាជអាវុធហត្ថរាជធានីភ្នំពេញ ត្រូវប្រកួតជាមួយ សឿន វ៉ាន់នី មកពីក្លឹបតាខ្មៅមានឫទ្ធិ ខេត្ដកណ្ដាល ។ គូទី២-ឈិន រស្មី មកពីក្លឹបអប់រំកាយ ស្រុកអន្លង់វែង ត្រូវប្រកួតជាមួយ ឡុង វីរៈ មកពីក្លឹបសាលវ័ន្ដ កីឡា ។ ចំពោះនីតិវិធីនៃការប្រកួតក៏មិន ខុសពីលើកមុនៗដែរ គឺក្រោយពេលសំរាក រយៈពេល៤៥នាទី អ្នកឈ្នះគូទី១ ត្រូវមក ប្រកួតជាមួយអ្នកឈ្នះគូទី២បន្ដទៀត ។ អ្នកឈ្នះនៅវគ្គផ្ដាច់ព្រត្រ័នេះ ទើបក្លាយជាម្ចាស់ប្រាក់លានពិតប្រាកដ ។
គួរបញ្ជាក់ថា កាលពីការប្រកួតវគ្គជំរុះថ្ងៃ ទី១៥ ឧសភា កន្លងមក ទី ចាន់ថា បានផ្ដួល ឆាយ បា្លទីន មកពីក្លឹប VIP ចំការមន ឱ្យ ចុះចាញ់ក្នុងទឹកទី៥ ។ សឿន វ៉ាន់នី បានផ្ដួល មាស ភិរម្យ មកពីក្លឹបកងទ័ពជើងទឹក ឱ្យសន្លប់ក្នុងទឹកទី១ ។ ឈិន រស្មី បានផ្ដួល អាន បូរ៉ា មកពីក្លឹបមិត្ដប៉ូលិស ក្នុងទឹកទី២ រីឯឡុង វីរៈ បានយកឈ្នះពិន្ទុ គាំ រតនា មកពីក្លឹប ខេមរៈខ្លាហោះ ។ ក្នុងចំណោមអ្នកឈ្នះទាំង ៤រូប ដែលត្រូវមកប្រកួតវគ្គចុងក្រោយនេះ ឈិន រស្មី ជាមុខសញាដែលគេជឿថា អាច ក្លាយជាម្ចាស់ប្រាក់លាន ។
នៅមានគូរងច្រើនទៀតដូចជា ហង់ ណារ៉ុង មកពីក្លឹបកងពលតូចលេខ៧០ ត្រូវ ប្រកួតជាមួយ ព្រែក បូរិន្ទ មកពីក្លឹបនិរោធ មានជ័យ និង ជុន សាវុធ មកពីក្លឹបឃុំជ្រៃ ខេត្ដបាត់ដំបង ត្រូវប្រកួតជាមួយ ឌុល ធីម មកពីក្លឹបអូដឹមកីឡា ជាដើម ៕
