កាលពីថ្ងៃទី៧ ឧសភា ប្រភពពីសារព័ត៌មានបរទេសផ្សាយឱ្យដឹងថា មានហេតុការណ៍គួរឱ្យរន្ធត់មួយគឺលោកស្រីវីអូឡេត ឌីម៉េលឡូ ភ្ញៀវទេសចរជនជាតិស្កុតឡែន ដែលធ្វើដំណើរទៅកម្សាន្តនៅឧទ្យានមួយកន្លែងក្នុងទីក្រុង«ផត អាលីហ្សាប៊ែត» ភាគអាគ្នេយ៍ប្រទេសអាហ្វ្រិកខាងត្បូង ត្រូវរងគ្រោះដ៏អាក្រក់ ក្រោយពីខ្លាស៊ីតា ស្ទុះចូលខាំក ខណៈពេលគាត់ព្យាយាមការពារកូនមិនឱ្យចាកចេញពីក្រុមភ្ញៀវទេសចរ ។
របាយការណ៍បញ្ជាក់ឱ្យដឹងថា ខ្លាស៊ីតា បានខាំគ្រញិចលោកស្រីវីអូឡេត បណ្តាលឱ្យមានស្នាមរបួស និងមានស្នាមខាំជាច្រើនកន្លែងទៀត ប៉ុន្តែសំណាងល្អដែលលោកស្រីមិនស្លាប់បាត់បង់ជីវិត ព្រោះមានមន្ត្រីសួនសត្វ និងភ្ញៀវទេសចរជួយចាប់ខ្លាបំបែកចេញពីគាត់ ។
ហេតុការណ៍ខាងលើត្រូវបានស្វាមីគាត់ថតរូបភាព និងត្រូវបានយកមកផ្សព្វផ្សាយនៅក្នុងសារព័ត៌មានបរទេស ហើយលោកស្រីវីអូឡេតបញ្ជាក់ថា ខ្លាស៊ីតាមិនកាចសាហាវទេ ប៉ុន្តែវាមានអារម្មណ៍រំភើបនិងមានលក្ខណៈតប់ប្រមល់ក្នុងចិត្ត ៕
ចែករំលែកព័តមាននេះ