បន្ទាប់ពីក្លឹបបិសាចក្រហម Man Utd ទទួលបានជ័យជម្នះ ២-០ ទៅលើក្រុមភ្ញៀវ Swansea កាលពីរាត្រីថ្ងៃអាទិត្យទី៦ ឧសភា ឆ្នាំ២០១២ មាន៨៦ពិន្ទុស្មើក្រុមកំពូលតារាង Man City លោកអាឡិច ហ្វើគូស៊ុន ដែលបានឈ្លោះប្រកែកជាមួយលោកម៉ាន់ស៊ីនី កាលពីសប្តាហ៍មុន បានបន្តធ្វើសង្គ្រាមពាក្យសម្តីវាយប្រហារទៅលើគ្រូបង្វឹកក្លឹប Man City ចំពោះការប្រជែងយកតំណែងជើងឯកអង់គ្លេសប្រឺមីញេលីក សម្រាប់រដូវកាល២០១២ ។ លោកអាឡិចបាននិយាយថា វាគឺមិនទាន់ចប់នៅឡើយទេ ចំពោះតំណែងជើងឯកបើទោះជាគ្រាប់បាល់ស៊ុតបញ្ចូលទីរបស់ក្រុមអ្នកមានថ្មី Man Cityលើស៨គ្រាប់ក៏ដោយ ។
លោកអាឡិចហ្វើ គូស៊ុន បាននិយាយឱ្យដឹងទៀតថា ក្លឹប Man City អាចនឹងជួបបញ្ហាជាមួយភ្ញៀវ QPR ដែលប្រកួតស្លាប់រស់ដើម្បីគេចឱ្យពីតំបន់កាត់ចោល ខណៈពេលដែលក្រុមរបស់លោកមានសង្ឃឹមឈ្នះក្រុម Sunderland ដែលស្ថិតក្នុងតំបន់សុខសាន្តលេខរៀងទី១១ ក្នុងតារាង ។ លោកបានបន្តទៀតថា ឱកាសកាន់ពានរង្វាន់រដូវកាលនេះ គឺមិនទាន់ចប់នៅឡើយទេ ក្នុងករណីអាជ្ញាកណ្តាលមិនទាន់ផ្លុំកញ្ចែបញ្ចប់ការប្រកួតរយៈពេល៩០នាទី នៅសប្តាហ៍ក្រោយ ហើយខ្ញុំនៅតែមានសង្ឃឹមថា QPR នឹងប្រឹងរកឱ្យបាន៣ពិន្ទុដើម្បីរស់នៅបន្តទៀតក្នុងក្របខណ្ឌអង់គ្លេសប្រឺមីញេលីក ។
គួររំលឹកផងដែរថា ការប្រកួតបាល់ទាត់អង់គ្លេសប្រឺមីញេលីកនឹងបញ្ចប់រដូវកាលនៅរាត្រីថ្ងៃអាទិត្យទី១៣ ឧសភា ឆ្នាំ២០១២ ។ ក្រុម Man City ទទួលភ្ញៀវ QPR ចំណែកឯ Man Utd ត្រូវធ្វើដំណើរទៅផ្ទះ Sunderland ចំណែកឯក្រុមបាតតារាង Bolton, Blackburn, Wigan និង QPR កំពុងត្រូវការជ័យជម្នះដណ្តើមគ្នារស់៕
ចែករំលែកព័តមាននេះ