កីឡាករអាហ្សង់ទីនចូអានម៉ាទីន ឌែលប៉ូត្រូទទួលបានជោគជ័យទាំងស្រុងនៅក្នុងការប្រកួតការពារតំណែងជើងឯកតឺន្នីសកម្មវិធី Estoril Tennis Open របស់ខ្លួនប្រឆាំងនឹងកីឡាកររីឆាដ ហ្គាសហ្គេតបន្ទាប់ពីរូបគេបានបំបាក់កីឡាករបារាំងម្នាក់នេះក្នុងវគ្គផ្តាច់ព្រ័ត្រកាលពីថ្ងៃទី៦ឧសភា។ ការប្រកួត Estoril Tennis Openក្នុងឆ្នាំនេះត្រូវបានរៀបចំធ្វើនៅទីក្រុង Lisbonប្រទេសព័រទុយហ្គាល់ ។
ឌែលប៉ូត្រូក្នុងនាមជាកីឡាករការពារជើងឯកនិងដែលបានឡើងមកដល់វគ្គនេះបន្ទាប់ពីបានយកឈ្នះកីឡាករស្វុីសស្ទែននីឡាស វ៉ារិនកានោះបានយកឈ្នះកីឡាករហ្គាសហ្គេតក្នុងលទ្ធផលពិន្ទុ២សិតទល់នឹងសូន្យ ៦-៤និង៦-២ដោយចំណាយពេលអស់៩០នាទី។
នេះជាពានជើងឯកលើកទី២ប្រចាំរដូវកាលបន្ទាប់ពីពាននៅក្រុង Marseilleប្រទេសបារាំងខែកុម្ភៈ ។ បើនិយាយក្នុងអាជីពវិញ វាគឺជាពានលើកទី១១ហើយ។ ជ័យជម្នះលើកនេះបានធ្វើឱ្យឌែលប៉ូត្រូក្លាយជាជនទី៣បន្ទាប់ពីកីឡាករ Thomas MastersនិងកីឡាករAlbert Montanesដែលបានយកឈ្នះជើងឯកកម្មវិធីនេះពីរឆ្នាំជាប់ៗគ្នា។
ថ្លែងក្រោយពីឈ្នះការប្រកួត កីឡាករអាហ្សង់ទីនរូបនេះបញ្ជាក់ថា៖«ខ្ញុំគិតថា នេះគឺជាការប្រកួតដ៏ល្អជាងគេបំផុតរបស់ខ្ញុំក្នុងសប្តាហ៍នេះ។ ខ្ញុំមានទំនុកចិត្តជាខ្លាំងលើការវាយសឺវីស Forehandរបស់ខ្លួនឯង។ ជំនឿចិត្តនេះបានរីកធំឡើងៗនៅគ្រប់ការប្រកួតរាល់លើក»។
កាលពីឆ្នាំកន្លងទៅ ឌែលប៉ូត្រូមកប្រកួតនៅទីនេះក្នុងនាមជាកីឡាករលំដាប់ទី៤៦ពិភពលោក។ នៅពេលនោះហើយដែលគេដណ្តើមបានពានជើងឯកលើកទី១ប្រចាំឆ្នាំក្រោយពីបានបំបាក់កីឡាករជើងខ្លាំងរបស់អេស្ប៉ាញហ្វឺណាន់ដូ អាឡុនសូ។ ដោយឡែកនៅឆ្នាំនេះ គេចូលរួមក្នុងនាមជាកីឡាករលំដាប់ទី១២ពិភពលោក។
ឯតទគ្គកម្មប្រកួតរបស់ឌែលប៉ូត្រូក្នុងឆ្នាំនេះគឺឈ្នះ២៧ ចាញ់៦។
ចំណែកកីឡាករហ្គាសហ្គេតវិញ គេបានឡើងមកដល់វគ្គផ្តាច់ព្រ័ត្រនេះក្រោយពីបានយកឈ្នះកីឡាករអេស្ប៉ាញ Albert Ramosក្នុងលទ្ធផល២-៦,៧-៦និង៧-៥។ ការប្រកួតចុងក្រោយបំផុតរបស់ហ្គាសហ្គេតនៅទីនេះគឺក្នុងឆ្នាំ២០០៧។ កាលនោះគេបានបរាជ័យក្រោមថ្វីដៃកីឡាករស៊ែប៊ីណូវ៉ាក់ យ៉ូកូវិច។ នេះជាការប្រកួតក្នុងវគ្គផ្តាច់ព្រ័ត្រលើកទី១៥នៃអាជីពរបស់គេហើយ។
ថ្លែងបន្ទាប់ពីបរាជ័យ ហ្គាសហ្គេតបញ្ជាក់ថា៖«ឌែលប៉ូត្រូមានកំពស់ខ្ពស់ខ្លាំងណាស់ ហើយការវាយសឺវីសរបស់គេពិតជាបានល្អ ។ និយាយរួមក្នុងថ្ងៃនេះ គេជាកីឡាករដែលពូកែជាងខ្ញុំ» ។
បរាជ័យក្នុងពេលនេះ ធ្វើឱ្យហ្គាសហ្គេតស្ថិតនៅក្នុងស្ថានភាពជាកីឡាករដែលស្វះស្វែងរកជ័យជម្នះពានជើងឯកជាលើកទី១ក្នុងរដូវកាលជាដដែល។ បើគិតពីការឈ្នះពានជើងឯកនៅទីក្រុង Nice ប្រទេសរបស់ខ្លួនក្នុងខែឧសភាឆ្នាំ២០១០មក ហ្គាសហ្គេតមិនបានយកឈ្នះពានជើងឯកកម្មវិធីណាមួយឡើយ ៕
ចែករំលែកព័តមាននេះ