កីឡាករអូស្ត្រាលីខាស៊ី ស្តូន័របានឡើងទៅឈរនៅលំដាប់លើគេនៃតារាងជើងឯកពិភព លោកឆ្នាំ២០១២ក្រោយពីបានយកឈ្នះជើងឯកនៃការប្រណាំងម៉ូតូជីភីកម្មវិធី Portugal Motorcycle Grand Prixនៅទីលានប្រណាំង Estoril racetrackស្ថិតនៅក្នុងទីក្រុង Sintraប្រទេសព័រទុយហ្គាល់កាលពីថ្ងៃទី៦ ខែឧសភា។
ស្តូន័រដែលជាអ្នកបើកបរឱ្យក្រុមហុងដាបានយកឈ្នះជើងឯកជាលើកទី២ក្នុងរដូវកាលនិងលើកទី៣៥ក្នុងអាជីពបន្ទាប់ពីបញ្ចប់ការប្រណាំងក្នុងថិរវេលា៤៥នាទីនិង៣៧.៥១៣វិនាទីប្រជែងយកឈ្នះកីឡាករអេស្ប៉ាញចច ឡូរេនហ្សូរបស់ក្រុមប្រណាំងយ៉ាម៉ាហាដែលបានបញ្ចប់ការប្រណាំងក្នុងចំណាត់ថ្នាក់ទី២។ឡូរេនហ្សូប្រើអស់ថិរវេលា៤៥នាទីនិង៣៨.៩៣៤វិនាទីគឺ១.៤២១វិនាទីយឺតជាងកីឡាករស្តូន័រ ។
ចំណាត់ថ្នាក់ទី៣បានទៅលើកីឡាករជើងខ្លាំងមកពីប្រទេសអេស្ប៉ាញដដែលគឺដានី ប៉េដ្រូហ្សា ។ ប៉េដ្រូហ្សាដែលបើកបរឱ្យក្រុមហុងដាបានបញ្ចប់ការប្រណាំងក្នុងថិរវេល៤៥នាទីនិង៤១.១២៤វិនាទី។
កីឡាករអុីតាលីអង់ឌ្រា ដូវីស៊ីយ៉ូសូដែលជាអ្នកបើកបរឱ្យក្រុមហុងដាបានបញ្ចប់ការប្រណាំងដោយប្រើអស់ថិរវេលា៤៥នាទីនិង៥១.៣៥៩វិនាទីគឺ១៣.៨៤៦វិនាទីយឺតជាងជាងកីឡាករស្តូន័រ។ តាមពីក្រោយរូបគេគឺកីឡាករអង់គ្លេសCal Crutchlowរបស់ក្រុមយ៉ាម៉ាហាដែលបញ្ចប់ការប្រណាំងក្នុងលំដាប់ទី៥។ កីឡាករអាមេរិកបេន ស្ប៉ាយបានប្រើអស់ថិរវេលា៤៦នាទីនិង១០.៧៧៥វិនាទីស្ថិតក្នុងលំដាប់ទី៨ ខណៈកីឡាករអេស្ប៉ាញAlvaro Bautistaបញ្ចប់ការប្រណាំងក្នុងលំដាប់ទី៦។ ឯកីឡាករអុីតាលីវ៉ាឡឹនទីណូ រ៉ូស៊ីបញ្ចប់ការប្រណាំងស្ថិតក្នុងចំណាត់ថ្នាក់ទី៧។ កីឡាកររូបនេះបានប្រើអស់ថិរវេលា៤៦នាទីនិង០៤.៣១០វិនាទីយឺតជាងកីឡាករស្តូន័រ២៦.៧៩៧វិនាទី។
ថ្លែងបន្ទាប់ពីទទួលបានជោគជ័យ ស្តូន័រ បានបញ្ជាក់ថា៖«វាជាចុងសប្តាហ៍ដ៏ស្រស់ត្រកាលមួយ។ ពេញការប្រណាំង ខ្ញុំស្ថិតក្រោមគំនាបជាប់ជានិច្ច។ ការប្រណាំងពីរទៅ៣ជុំដំបូង ខ្ញុំធ្វើបានល្អគួរសម ប៉ុន្តែជុំបន្ទាប់មកហាក់ដូចជាពិបាកបន្តិច។ នៅពាក់កណ្តាលការប្រណាំង ខ្ញុំចាប់គ្មានជំនឿចិត្តលើខ្លួនឯងថាឈ្នះនោះទេដ្បិតម៉ូតូរបស់ខ្ញុំដូចជាមិនស្ទុះទៅមុខសោះ»។
នៅលើតារាងជើងឯកពិភពលោក ក្រោយពីបញ្ចប់ការប្រណាំងលើកនេះ ស្តូន័រស្ថិតនៅលំដាប់លើគេដោយមាន៦៦ពិន្ទុ ។ ស្ថិតនៅលំដាប់ទី២គឺកីឡាករចច ឡូរេនហ្សូដែលមាន៦៥ពិន្ទុ។ ឯលំដាប់ទី៣គឺដានី ប៉េដ្រូហ្សា។ កីឡាករអេស្ប៉ាញរូបនេះមាន៥២ពិន្ទុ ៕
ចែករំលែកព័តមាននេះ