កីឡាករអង់គ្លេស Mark Cavendishបានសំដែងក្តីរីករាយជាខ្លាំងក្រោយពីរូបគេយកឈ្នះដំណាក់ទី២នៃការប្រណាំងកង់កម្មវិធី Tour of Italyឬ Giro d’Italiaនៅប្រទេសអ៊ីតាលីកាលពីថ្ងៃទី៦ខែសភា ។ ការប្រណាំងដំណាក់នេះបញ្ចប់នៅទីក្រុងHerning ប្រទេសដាណឺម៉ាក។
Cavendishដែលជាអ្នកជិះកង់ឱ្យក្រុមSky Procyclingបានយកឈ្នះដំណាក់ដែលមានចម្ងាយផ្លូវ២០៦គីឡូម៉ែត្រជុំវិញទីក្រុងHerning ប្រទេសដាណឺម៉ាកដោយប្រើអស់ថិរវេលា៤ម៉ោង៥៣នាទីនិង១២វិនាទីយកឈ្នះកីឡាករអូស្ត្រាលី Matthew Harley Gossជិះឱ្យក្រុមOrica GreenEdge Cycling Teamនិងបានយកឈ្នះកីឡាករបារាំង Geoffrey Soupeជិះឱ្យក្រុម FDJ-Big Matដែលបានប្រើថិរវេលាស្មើៗគ្នា។
ថ្លែងបន្ទាប់ពីទទួលបានជ័យជំនះកីឡាករCavendish បញ្ជាក់ថា៖«ឆ្នាំនេះខ្ញុំប្រណាំងឱ្យក្រុមថ្មី។ កីឡាករមួយចំនួននៅក្នុងក្រុមនេះមិនធ្លាប់បានធ្វើការជាមួយខ្ញុំទេពីមុនមក។ តែយ៉ាងណា ការប្រណាំងក្នុងក្របខណ្ឌ Tourធំបែបនេះគឺជាអ្វីមួយដែលខ្ញុំត្រូវតែមកចូលរួម។ នេះពិតជាជ័យជំនះយ៉ាងពិសេសមួយដ្បិតការប្រណាំងនៅដំណាក់នេះប្រជុំទៅដោយកីឡាករជើងខ្លាំងជាច្រើន។ ខ្ញុំនឹងប្រឹងប្រែងឱ្យអស់ពីលទ្ធភាពដើម្បីយកឈ្នះដំណាក់ក្រោយៗទៀត»។បើទោះណាកីឡាករអង់គ្លេសរូបនេះបានយកឈ្នះដំណាក់នេះក៏ពិតមែន ប៉ុន្តែនៅលើតារាងពេលវេលាសរុបគេពុំអាចដណ្តើមបានការនាំមុខនៅឡើយទេ ដ្បិត កីឡាករអាមេរិកTaylor Phinneyដែលបានបញ្ចប់ដំណាក់នេះក្នុងលំដាប់ទី៥១នោះសន្សំពេលវេលាបានយ៉ាងល្អបំផុតគ្រងអាវកាក់ពណ៌លឿងរក្សាការនាំមុខគេដដែល ។
ឆ្លងកាត់ការប្រណាំងចំនួន២ដំណាក់មកនេះ កីឡាករអាមេរិករូបនេះប្រើអស់ថិរវេលាតិចជាងគេបំផុតគឺ៥ម៉ោងនិង៣នាទីនិង៣៨វិនាទីនាំមុខកីឡាករអង់គ្លេស Geraint Thomasជិះឱ្យក្រុម Sky Procyclingដែលបានប្រើថិរវេលាច្រើនជាង៩វិនាទីនិងឈ្នះកីឡាករដាណឺម៉ាកAlex Rasmussenជិះឱ្យក្រុម Garmin- Barracudaដែលប្រើថិរវេលាច្រើនជាង១៣វិនាទី ។
ការប្រណាំងកម្មវិធី Tour of Italyឬ Giro d’Italiaឆ្នាំនេះមាន២១ដំណាក់និងមានចម្ងាយផ្លូវសរុប៣៤៧៦គីឡូម៉ែត្រ។ ដោយឡែកដំណាក់ទី៣ដែលជាដំណាក់បន្តមានចម្ងាយផ្លូវ១៩០គីឡូម៉ែត្រដោយការប្រណាំងធ្វើនៅជុំវិញទីក្រុង Horsensប្រទេសដាណឺម៉ាក៕
ចែករំលែកព័តមាននេះ