សារព័ត៌មានបរទេស ផ្សាយថា ក្លឹបតោខៀវ បានគូសបញ្ជាក់ពីផែនការសាងសង់ទីលានប្រកួតថ្មី អាចផ្ទុកទស្សនិកជនដល់ទៅ៦០.០០០នាក់ ក្រោយពីដាក់សំណើដេញថ្លៃទិញដីនៅក្បែររោងចក្រអគ្គិសនី «ប៉េតទ័រស៊ី» ជារោងចក្រអគ្គិសនីដ៏ល្បីឈ្មោះនៅមាត់ទន្លេ «ថេម» ។
ផ្ទៃដីមានទំហំ១៥៩,៣៩៣ម៉ែត្រការ៉េ ត្រូវបញ្ចូលក្នុងទីផ្សារកាលពីខែកុម្ភៈ ខណៈពេលក្លឹបបានប្រកាសពីគម្រោងសាងសង់ទីលានប្រកួតថ្មី ដោយទទួលទស្សនិកជនទាំង៤ផ្នែក បានដល់៦០.០០០នាក់ និងក្នុងផ្នែកនីមួយៗ ផ្ទុកទស្សនិកជនបាន១៥.០០០នាក់ ។ ក្លឹបអះអាងថា ការសាងសង់ទីលានថ្មីនេះចេញពីការអំពាវនាវរបស់អ្នកគាំទ្រ ។
នៅក្នុងសេចក្តីថ្លែងការណ៍របស់ក្លឹប Chelsea បញ្ជាក់ «រោងចក្រអគ្គិសនី ប៊េតទ័រស៊ី ជាសំណង់ដ៏ល្បីល្បាញមួយនៅក្រុងឡុង និងមានសក្តានុពលគ្រប់គ្រាន់ នឹងក្លាយជាផ្នែកមួយក្នុងទីលានប្រកួតបាល់ទាត់ដ៏ល្អនៅលើពិភពលោក ។
យើងនៅមិនទាន់ប្រាកដក្នុងចិត្តថា នឹងទទួលជោគជ័យ ឬអត់ទេ ? ការដែលយើងដាក់សំណើលើដីធ្លីរបស់រោងចក្រអគ្គិសនីមិនមែនមានន័យថា ក្លឹបសម្រេចចិត្តផ្លាស់ចេញពីទីលានស្តេមហ្វតប្រ៊ីតទេ គឺដោយសារអ្នកគាំទ្រ ។ យើងទទួលការណែនាំពីអ្នកគាំទ្រជាច្រើននាក់ឱ្យសាងសង់ទីលានប្រកួតថ្មី ដែលមានចំណុះច្រើន និងបង្កើនចំនួនបន្ទប់សម្រាប់អ្នកគាំទ្រពិការ ដោយក្លឹបនឹងប្រកាសដល់អ្នកគាំទ្ររបស់យើងបានដឹងពីការដំណើរការទៅមុខក្នុងដំណាក់កាលបន្តទៀត» ៕
ចែករំលែកព័តមាននេះ