ទោះបីជាក្រុម Chelsea មិនមានឱកាសដណ្តើមយកពានរង្វាន់ក្របខណ្ឌអង់គ្លេសប្រឺមីញេលីកក្តី ក៏ក្រុមរបស់គេទទួលបានពានរង្វាន់ក្របខណ្ឌអង់គ្លេស FA Cup ១ដែរសម្រាប់រដូវកាលនេះ ហើយអាចនឹងមានឱកាសប្រជែងយកពានរង្វាន់យូហ្វាឆេមពានលីកមួយទៀតនៅពេលប្រកួតជាមួយក្រុម Bayern នៅវគ្គផ្តាច់ព្រ័ត្រ ។
គ្រាប់បាល់ពីរគ្រាប់របស់កីឡាករ Ramires និងដ្រកបា បានជួយឱ្យក្រុម Chelsea យកឈ្នះហង្សក្រហម Liverpool ២-១ ធ្វើឱ្យក្រុមតោខៀវ Chelsea មានឱកាសលើកពានរង្វាន់អង់គ្លេស FA Cup ឆ្នាំ២០១២ ។
នេះគឺជាការលើកពានរង្វាន់ក្របខណ្ឌអង់គ្លេស FA Cup លើកទី៧ របស់ក្រុម Chelsea ក្នុងប្រវត្តិសាស្ត្របាល់ទាត់របស់គេ។ នៅក្នុងដំណើរការប្រកួតតង់ទី១ក្រុមតោខៀវ Chelsea បានបំបាក់ក្រុមហង្សក្រហម Liverpool ដោយលទ្ធផល ១-០ បន្ទាប់ពីកីឡាករ Ramires ស៊ុតបាល់បញ្ចូលទីបាន១គ្រាប់នៅនាទី ទី១១ ហើយបានរក្សាការនាំមុខ ១-០ នេះរហូតដល់ចប់ការប្រកួត៤៥នាទី។
ចូលមកដល់តង់ទី២ ក្លឹប Chelsea នៅតែបន្តដាក់សម្ពាធទៅលើក្រុម Liverpool ដដែលហើយជាលទ្ធផលនៅនាទីទី៥២ កីឡាករសញ្ជាតិកូតឌីវ័រ ដ្រកបា រកគ្រាប់បាល់បន្ថែមបាន១គ្រាប់ទៀត ។
ទោះជាយ៉ាងណាក្តី ចូលមកដល់នាទីទី៦៤កីឡាករ កម្លាំងថ្មីទើបដូរចូល Andy Carroll សុ៊តបាល់បញ្ចូលទីមកលើក្រុម Chelsea បាន១គ្រាប់សងវិញ ។ លទ្ធផល២-១ នេះបានរក្សារហូតដល់អាជ្ញាកណ្តាលផ្លុំកញ្ចែបញ្ចប់ការប្រកួតជាផ្លូវការរយៈពេល៩០នាទីធ្វើឱ្យក្រុម Chelsea មានឱកាសលើកពាន FA Cup នៅក្នុងពហុកីឡដ្ឋាន Wembley ទីក្រុងឡុង ។ បន្ទាប់ពីទទួលបានជ័យជម្នះកីឡាករឡាំផាតបាននិយាយថា កីឡាករដ្រកបា គឺជាវីរៈបុរសរបស់យើងព្រោះថាជារឿយៗគាត់តែងតែរកគ្រាប់បាល់បញ្ចូលទីឱ្យក្រុមក្នុងការប្រកួតក្របខណ្ឌសំខាន់ៗ ។
ចំណែកឯលោក Dalish គ្រូបង្វឹកក្លឹប Liverpool រួមជាមួយនឹងកីឡាករបានត្រឹមតែឈរឱបដៃជាមួយនឹងភាពអស់សង្ឃឹមតែប៉ុណ្ណោះ ៕
ចែករំលែកព័តមាននេះ