កីឡាករអាហ្សង់ទីនចូអានម៉ាទីន ឌែលប៉ូត្រូនឹងការពារតំណែងជើងឯកតឺន្នីសកម្មវិធី Estoril Tennis Open របស់ខ្លួនប្រឆាំងនឹងកីឡាករបារាំងរីឆាដ ហ្គាសហ្គេតបន្ទាប់ពីពួកគេទាំងពីរនាក់បានឡើងមកដល់វគ្គផ្តាច់ព្រ័ត្រកម្មវិធីនេះកាលពីថ្ងៃសៅរ៍ទី៥ឧសភា។ ការប្រកួត Estoril Tennis Openក្នុងឆ្នាំនេះត្រូវបានរៀបចំធ្វើនៅទីក្រុង Lisbonប្រទេសព័រទុយហ្គាល់ ។
ឌែលប៉ូត្រូក្នុងនាមជាកីឡាករការពារជើងឯកបានឡើងមកដល់វគ្គនេះបន្ទាប់ពីបានយកឈ្នះកីឡាករស្វ៊ីសស្ទែននីឡាស វ៉ារិនកាក្នុងលទ្ធផល៧-៦និង៦-៤ដោយចំណាយពេលអស់៩០នាទី។ ការប្រកួតត្រូវបានផ្អាកអស់១៥នាទីក្រោយពីមានភ្លៀងធ្លាក់។ ថ្លែងក្រោយពីឈ្នះការប្រកួត កីឡាករអាហ្សង់ទីនរូបនេះបញ្ជាក់ថា៖«នេះជាការប្រកួតលើកដំបូងដែលខ្ញុំលេងបានល្អបន្ទាប់ពីក្របខណ្ឌ Davis Cup។ មានប្រភេទពិន្ទុខ្លះ ខ្ញុំមិនអាចយកបានទេ។ ដៃគូរបស់ខ្ញុំពិតជាពូកែខ្លាំងណាស់គឺជាគូប្រកួតដ៏គ្រោះថ្នាក់បំផុតនៅលើទីលានដីក្រហមបែបនេះ។ តែយ៉ាងណា ការជួបប្រកួតជាមួយកីឡាករវ៉ារិនកាគឺមិនដែលងាយស្រួលនោះទេ។ គេមិនដែលទុកឱកាសឱ្យគូប្រកួតឡើយ។ ការប្រកួតនៅថ្ងៃស្អែកក៏ប្រហាក់ប្រហែលគ្នាដែរ។ ខ្ញុំនឹងកែលំអបច្ចេកទេស ប្រកួតបន្ថែមទៀតដើម្បីធ្វើយ៉ាងណាយកឈ្នះពានជើងឯកជាថ្មីម្តងទៀត។ ខ្ញុំពេញចិត្តប្រកួតនៅលើទីលានដីក្រហម។ វាពិតជាអស្ចារ្យប្រសិនជាឈ្នះពាននេះជាលើកទី២»។
កាលពីឆ្នាំកន្លងទៅ ឌែលប៉ូត្រូមកប្រកួតនៅទីនេះក្នុងនាមជាកីឡាករលំដាប់ទី៤៦ពិភពលោក។នៅពេលនោះហើយដែលគេដណ្តើមបានពានជើងឯកលើកទី១ប្រចាំឆ្នាំក្រោយពីបានបំបាក់កីឡាករជើងខ្លាំងរបស់អេស្ប៉ាញហ្វឺណាន់ដូ អាឡុនសូ។ ដោយឡែកនៅឆ្នាំនេះ គេចូលរួមក្នុងនាមជាកីឡាករលំដាប់ទី១២ពិភពលោក។ ឯតទគ្គកម្មប្រកួតរបស់ឌែលប៉ូត្រូក្នុងឆ្នាំនេះគឺឈ្នះ២៦ ចាញ់៦។ សម្រាប់វ៉ារិនកាវិញ រដូវកាលនេះគេមិនទាន់យកឈ្នះពានជើងឯកណាមួយនៅលើទីលានដីក្រហមនៅឡើយទេ គឺគ្រាន់តែឈានចូលដល់វគ្គពាក់កណ្តាលផ្តាច់ព្រ័ត្រចំនួន២លើកប៉ុណ្ណោះ។ ចំណែកក្នុងកម្មវិធី Monte Carlo Mastersកន្លងមក គេបានឆ្លងចូលដល់ត្រឹមវគ្គ១/៤ផ្តាច់ព្រ័ត្រប៉ុណ្ណោះ។
ចំណែកកីឡាករហ្គាសហ្គេតវិញ បានឡើងមកដល់វគ្គផ្តាច់ព្រ័ត្រនេះក្រោយពីបានយកឈ្នះកីឡាករអេស្ប៉ាញ Albert Ramosក្នុងលទ្ធផល២-៦,៧-៦និង៧-៥។ ការប្រកួតរវាងពួកគេទាំងពីរបានប្រើពេលអស់ជាង៣ម៉ោង។ ការប្រកួតចុងក្រោយបំផុតរបស់ហ្គាសហ្គេតនៅទីនេះគឺក្នុងឆ្នាំ២០០៧។ កាលនោះគេបានបរាជ័យក្រោមថ្វីដៃកីឡាករស៊ែប៊ីណូវ៉ាក់ យ៉ូកូវិច។ នេះជាការប្រកួតក្នុងវគ្គផ្តាច់ព្រ័ត្រលើកទី១៥នៃអាជីពរបស់គេ៕
ចែករំលែកព័តមាននេះ