កីឡាករអូស្ត្រាលីខាស៊ី ស្តូន័របានសម្តែងក្តីត្រេកអរយ៉ាងខ្លាំងបន្ទាប់ពីខ្លួនបានយកឈ្នះការនាំមុខបណ្តោះអាសន្ននៃការប្រណាំងម៉ូតូជីភីកម្មវិធី Portugal Motorcycle Grand Prix នៅទីលានប្រណាំង Estoril racetrack ស្ថិតនៅក្នុងទីក្រុង Sintraប្រទេសព័រទុយហ្គាល់កាលពីថ្ងៃទី៣ខែឧសភា ។
ស្តូន័រដែលជាអ្នកបើកបរឱ្យក្រុមហុងដាបានយកឈ្នះការនាំមុខបណ្តោះអាសន្នជាលើកទី២ក្នុងរដូវកាលនិងជាលើកទី៣៥ក្នុងអាជីពបន្ទាប់ពីបញ្ចប់ការប្រណាំងក្នុងថិរវេលា១នាទីនិង៣៧.១៨៨វិនាទីប្រជែងយកឈ្នះកីឡាករអេស្ប៉ាញដានី ប៉េដ្រូហ្សារបស់ក្រុមប្រណាំងហុងដាដែលបានបញ្ចប់ការប្រណាំងក្នុងចំណាត់ថ្នាក់ទី២។ប៉េដ្រូហ្សាប្រើអស់ថិរវេលា១នាទីនិង៣៧.២០១វិនាទីគឺ០.០១៣វិនាទីយឺតជាងកីឡាករស្តូន័រ ។ ចំណាត់ថ្នាក់ទី៣បានទៅលើកីឡាករជើងខ្លាំងមកពីប្រទេសអង់គ្លេសគឺ Cal Crutchlow។ Crutchlowដែលបើកបរឱ្យក្រុមយ៉ាម៉ាហាបានបញ្ចប់ការប្រណាំងក្នុងថិរវេលា១នាទីនិង៣៧.២៨៩វិនាទី។
កីឡាករអុីតាលីអង់ឌ្រា ដូវីស៊ីយ៉ូសូដែលជាអ្នកបើកបរឱ្យក្រុមហុងដាបានបញ្ចប់ការប្រណាំងដោយប្រើអស់ថិរវេលា១នាទីនិង៣៧.៩៤៣វិនាទីគឺ០.៧៥៥វិនាទីយឺតជាងជាងកីឡាករស្តូន័រតាមពីក្រោយកីឡាករអេស្ប៉ាញAlvaro Bautistaរបស់ក្រុមហុងដាដែលបញ្ចប់ការប្រណាំងក្នុងលំដាប់ទី៦។ កីឡាករអាមេរិកបេន ស្ប៉ាយបានប្រើអស់ថិរវេលា១នាទីនិង៣៧.៩១៧វិនាទីស្ថិតក្នុងលំដាប់ទី៥ខណៈកីឡាករអេស្ប៉ាញចច ឡូរេនហ្សូបញ្ចប់ការប្រណាំងក្នុងលំដាប់ទី៤។ ឯកីឡាករអុីតាលីវ៉ាឡឹនទីណូ រ៉ូស៊ីបញ្ចប់ការប្រណាំងស្ថិតក្នុងចំណាត់ថ្នាក់ទី៩។ កីឡាកររូបនេះបានប្រើអស់ថិរវេលា១នាទីនិង៣៧.៤៦៦វិនាទីយឺតជាងកីឡាករស្តូន័រ០.២៧៨វិនាទី។
ថ្លែងបន្ទាប់ពីទទួលបានជោគជ័យ ស្តូន័រ បានបញ្ជាក់ថា៖«វាជាចុងសប្តាហ៍ដ៏ស្រស់ត្រកាលមួយ។ ស្អែកគឺជាថ្ងៃប្រកួតប្រជែងយ៉ាងស្វិតស្វាញបំផុត។ ខ្ញុំគិតថា វាច្បាស់ជាមានការប្រដេញគ្នាយ៉ាងខ្លាំងក្លាបំផុត។ កីឡាករប៉េដ្រូហ្សានិង Cal Crutchlowកំពុងតែដេញតាមយើងយ៉ាងប្រកៀកបំផុត។ ការប្រណាំងក្នុងថ្ងៃនេះក្រុមរបស់យើងទាំងមូលបានធ្វើការងារជាមួយគ្នាបានយ៉ាងល្អបំផុត ជាពិសេសម៉ូតូប្រណាំងហាក់ពុំមានបញ្ហាចោទអ្វីទេ»៕
ចែករំលែកព័តមាននេះ