ខេត្តស្ទឹងត្រែង ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានមានប្រសាសន៍បញ្ជាក់ថា ថ្វីដ្បិតតែមិនទាន់ត្រូវបានផ្សព្វផ្សាយក៏ដោយ ក៏ឯកសារនោះបានមកដល់ដៃរួចហើយ ដែលតាមការស្ទាបស្ទង់មតិរបស់អ្នកធ្វើរបាយការណ៍ជាបរទេសបានបង្ហាញថា អ្នកដែលអះអាងថា ការដឹកនាំរបស់រាជរដ្ឋាភិបាលត្រឹមត្រូវមានចំនួន៨១% អ្នកជឿលើហ៊ុនសែន៨៧% ឯអ្នកមិនជឿហ៊ុនសែន១៣%។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍បែបនេះកាលពីព្រឹកថ្ងៃទី៥ ឧសភា ២០១២ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកការដ្ឋានសាងសង់ផ្លូវជាតិលេខ២១៤ (សម្តេចហ៊ុន សែន សុំប្តូរមកជាផ្លូវលេខជាតិ៩) ប្រវែង១៤៣គីឡូម៉ែត្រ ពីខេត្តស្ទឹងត្រែង ទៅខេត្តព្រះវិហារ និងស្ពានឆ្លងទន្លេមេគង្គប្រវែង១.៧៣១ម៉ែត្រ ស្ថិតក្នុងភូមិរាជានុកូល សង្កាត់ស្ទឹងត្រែង ខេត្តស្ទឹងត្រែង សរុបការចំណាយជាង១១៣លានដុល្លារអាមេរិក ដែលថវិកាបានមកពីកម្ចីសម្បទានរបស់សាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា ។
សម្តេចតេជោនាយករដ្ឋមន្ត្រីមានប្រសាសន៍បន្តថា អ្នកធ្វើរបាយការណ៍ស្ទាបស្ទង់មតិនេះមិនមែនខ្មែរទេ គឺជនជាតិបរទេសជាអ្នកធ្វើ ដូច្នេះសូមកុំឡាំប៉ាជាមួយបរទេសទៀត ។ ចំណែកអ្នកដែលក្អេងក្អាងខ្លាំងណាស់បញ្ជាក់ថា សំឡេងគាំទ្របានធ្លាក់ពី២១% មកនៅត្រឹម១៣% ប៉ុណ្ណោះ ។ សម្តេចបានមានប្រសាសន៍ថា កាលពីបោះឆ្នោតឆ្នាំ២០០៨ ការស្ទាបស្ទង់បានបង្ហាញថា គណបក្សប្រជាជនកម្ពុជាទទួលបានការគាំទ្រ៥៨% ហើយពេលនោះគណបក្សប្រជាជនបានទទួល៩០អាសនៈ នៅក្នុងរដ្ឋសភាឯណោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ