កីឡាករប្រដាល់អង់គ្លេសអាមៀ ខាន់បានប្រកាសជាចំហថា ខ្លួននឹងបញ្ឈប់កីឡាករអាមេរិក Lamont Petersonឱ្យខាងតែបានក្នុងការជួបគ្នាជាលើកទី២នៅក្រុងឡាសវេហ្គាសថ្ងៃទី១៩ឧសភា ។
ការជួបគ្នាលើកទី១កាលពីខែធ្នូឆ្នាំកន្លងទៅ អាមៀ ខាន់បានបានបាត់បង់ខ្សែក្រវាត់ស្ថាប័ន WBA/IBFរបស់ខ្លួននៅក្នុងការសម្រេចចិត្តដ៏ ចំរូងចម្រាសមួយក្រោយពីរូបគេត្រូវបានកាត់អស់២ពិន្ទុពីបទចោទរុញគូប្រកួត។ ទោះជាយ៉ាងណា មកដល់ពេលនេះ គេនៅតែគ្មានការជឿជាក់លើចៅក្រមអ្នកឱ្យពិន្ទុឡើយ។
ថ្លែងក្នុងពេលកំពុងហ្វឹកហាត់ជាមួយប៉ាក់គីអាវនៅហ្វ៊ីលីពីន កីឡាករអង់គ្លេសដើមកំណើតប៉ាគីស្ថានរូបនេះបានបញ្ជាក់ថា៖«ខ្ញុំមានការជឿជាក់លើកម្លាំងនិងក្បាច់គុនខ្លួនជាខ្លាំង។ ខ្ញុំដឹងថា ទំរាំដល់ពេលការប្រកួតខ្ញុំនឹងរឹតតែខ្លាំងជាងនេះ។ រយៈពេលពីរទៅ៣ថ្ងៃកន្លងមកនេះ មានមិត្តភក្តិមួយចំនួនបានមកសួរសុខទុក្ខខ្ញុំ។ ពួកគេទាំងនោះមកពីទូរទស្សន៍ Sky Sports។ គេមកថតរូបនៅទីនេះទាំងក្នុងនិងក្រៅក្លឹបហ្វឹកហាត់។ ការហាត់សមត្រៀមប្រកួតលើកនេះពិតជាអស្ចារ្យខ្លាំងណាស់។ ខ្ញុំបានសមជាមួយកីឡាករខ្លាំងៗមួយចំនួនដែលមានសមត្ថភាពប្រហាក់ប្រហែលPeterson។ នេះជាការប្រកួតដែលខ្ញុំបានផ្តោតអារម្មណ៍និងយកចិត្តទុកដាក់ខ្លាំងបំផុត»។
គេបានបន្តថា៖«ខ្ញុំបានដាក់ចិត្តដាក់កាយហើយព្យាយាមហ្វឹកហាត់យ៉ាងសកម្មបំផុត។ខ្ញុំមិនបានជួបជាមួយអ្នកសារព័ត៌មានញឹកញាប់ដូចដែលខ្ញុំធ្លាប់ធ្វើពីមុនមកនោះទេ។ ខ្ញុំប្តេជ្ញាថា នឹងដណ្តើមយកខ្សែក្រវាត់មកវិញឱ្យខាងតែបាន។ ការប្រកួតលើកទី២នេះនឹងខុសគ្នាពីការប្រកួតលើកទី១ ហើយខ្ញុំមានគោលដៅបញ្ចប់ការ ប្រកួតនេះមុនទឹកទី១២ »។
អាមៀ ខាន់ធ្លាប់ឡើងសង្វៀនប្រកួតបានចំនួន២៨លើក ក្នុងនោះឈ្នះ២៦លើក ចាញ់២លើក ធ្លាប់ផ្តួលដៃគូឱ្យសន្លប់បានចំនួន១៨ លើក។ ឯ Petersonធ្លាប់ប្រកួតចំនួន៣២លើក ឈ្នះ៣០លើក ចាញ់១ស្មើនិងធ្លាប់ផ្តួលដៃគូឱ្យសន្លប់ចំនួន១៥លើក ៕
ចែករំលែកព័តមាននេះ