គូស្នេហ៍តារាហូលីវូដល្បីឈ្មោះទូទាំងពិភពលោកគឺនាង អេនចេលីណា ជោលី និងលោក ប្រេត ភីត បានទិញភូមិគ្រឹះមួយកន្លែងនៅទីក្រុងឡុង ប្រទេសអង់គ្លេស ដែលមានតម្លៃដល់ទៅ១០លានផោន គឺស្មើនឹង១៦,១៨លានដុល្លារអាមេរិក ។ នេះបើយោងតាមប្រភពពីគេហទំព័រ skynews.com.au ចេញផ្សាយថ្ងៃព្រហស្បតិ៍ ទី៣ ឧសភា ឆ្នាំ២០១២ ។
ប្រភពបន្តថា ពួកគេបានសម្រេចចិត្តទិញអចលនទ្រព្យដែលមានឈ្មោះថា Whornes Place នេះ បន្ទាប់ពីពួកគេបានជួលសម្រាប់ស្នាក់នៅក្នុងរដូវក្តៅ កាលពីឆ្នាំ២០១១ ដោយតម្លៃ៣០.០០០ផោនក្នុង១ខែ ។
តាមប្រភពពីកាសែតដឺសាន់របស់អង់គ្លេសបានឱ្យដឹងថា ភូមិគ្រឹះនោះជាកម្មសិទ្ធិរបស់លោក Richmond ហើយត្រូវបានស្ថាបនាឡើងដោយមានអាងហែលទឹកនៅក្នុងផ្ទះតែម្តង ព្រមទាំងជញ្ជាំងឈើតាំងពីសតវត្សទី១៥មកម៉្លេះ ។
ប្រភពឱ្យដឹងទៀតថា កាលពីថ្ងៃទី១ ឧសភា ឆ្នាំ២០១២ គេឃើញវត្តមានរបស់គូស្នេហ៍មួយគូនេះ រួមទាំងកូនៗរបស់ពួកគេគឺ Pax, Shiloh, Maddox, Zahara, Knox និង Vivienne រស់នៅក្នុងភូមិគ្រឹះនេះ ។ ទន្ទឹមនឹងនេះ ពួកគេអាចជាអ្នកជិតខាងថ្មីរបស់នាង ជេនីហ្វឺ អានីស្តុន ដែលជាអតីតភរិយារបស់លោក ប្រេត ភីត ផងដែរ ៕
ចែករំលែកព័តមាននេះ