អ្នកវិទ្យាសាស្ត្របានរកឃើញថា សារធាតុផ្សំដ៏សំខាន់មួយនៅក្នុងមើមខ្ទឹមសមានកម្លាំងប្រឆាំងទៅនឹងការពុលអាហារបានដល់ទៅ១០០ដង ខ្លាំងជាងថ្នាំ antibiotics ២ប្រភេទគឺerythromycinនិង ciprofloxacin។
តាមរយៈការពិសោធន៍បានរកឃើញថា សមាសធាតុ diallyl sulphideមានសមត្ថភាពបំផ្លាញចោលយ៉ាងងាយនូវរបាំងការពារ Biofilm(ការប្រមូលផ្តុំនៃអតិសុខុមប្រាណដែលបណ្តាលឱ្យកោសិកាមកភ្ជាប់ស្អិតជាប់គ្នានៅលើផ្ទៃរាប) បង្កើតដោយមេរោគដើម្បីធ្វើឱ្យខ្លួនវាពិបាកនឹងត្រូវបំផ្លាញចោល។
ការរកឃើញលើកនេះដែលត្រូវបានយកទៅចុះផ្សាយក្នុងព្រឹត្តិប័ត្រ Antimicrobial Chemotherapy អាចជាការបើកផ្លូវមួយឆ្ពោះទៅរករបៀបរៀបចំថ្មីមួយនៃសាច់កែច្នៃនិងសាច់ឆៅកាត់បន្ថយអត្រាគ្រោះថ្នាក់នៃការពុលអាហារបង្កឡើងដោយមេរោគ Campy lobacter។
វេជ្ជបណ្ឌិត Michael Konkelមកពីសាកលវិទ្យាល័យ Washington State Universityសហរដ្ឋអាមេរិកបាននិយាយថា៖«នេះជាការងារដ៏រំភើបរីករាយ ដ្បិតវាបានបង្ហាញថា សមាសធាតុនេះមានកម្លាំងកាត់បន្ថយជំងឺបង្កឡើងដោយបាក់តេរីក្នុងបរិស្ថាននិងក្នុងអាហាររបស់យើង។ Campylobacterគឺជាបាក់តេរីដ៏សាមញ្ញបំផុតបង្កឱ្យកើតជំងឺពុលអាហារក្នុងសហរដ្ឋអាមេរិក និងក្នុងពិភពលោក»។
អាការៈនៃការឆ្លងបាក់តេរីនេះរួមមាន រាក ឈឺចាប់ក្នុងពោះនិងគ្រុនក្តៅជាដើម។ ការឆ្លងបាក់តេរី Campylobacter កើតឡើងមកពីការទទួលទានសាច់ឆៅ ឬមិនទាន់ឆ្អិន ឬក៏អាហារដែលគ្មានអនាម័យចំអិននៅកន្លែងកខ្វក់។
ដោយឡែកតាមការស្រាវជ្រាមួយផ្សេងពីនេះកាលពីឆ្នាំកន្លងទៅក៏បានបង្ហាញពីអត្ថប្រយោជន៍មើមខ្ទឹមសផងដែរ។ ការស្រាវជ្រាវនោះបានបង្ហាញថា មើមខ្ទឹមសអាចផ្តល់នូវការការពារប្រឆាំងនឹងការបំផ្លាញបេះដូង។ មើមដែលមានរសជាតិឆួលរបស់វាផ្ទុកទៅដោយសារធាតុមួយប្រភេទដែលមានកម្លាំងការពារការបំផ្លាញស្រទាប់បេះដូងដែលអាចនាំទៅរកការគាំងបេះដូង។
តាមការអះអាងរបស់អ្នកវិទ្យាសាស្ត្រ មើមខ្ទឹមសមានផ្ទុកសារធាតុឈ្មោះ Dially Trisulfide។ ពួកគេថា សារធាតុឈ្មោះ Dially Trisulfideនេះបានបញ្ចេញនូវអ៊ីដ្រូសែន ស៊ុលភីត(Hydrogen Sulphide)ដែលការពារស្រទាប់បេះដូងឱ្យរួចផុតពីការបំផ្លាញបាន៦១ភាគរយ ។
ទោះជាយ៉ាងណាក្តីលទ្ធផលនៃការរកឃើញរបស់អ្នកវិទ្យាសាស្ត្រមកពីសាកលវិទ្យាល័យ Emory University School of Medicineសហរដ្ឋអាមេរិកលើកនេះកើតចេញពីការពិសោធលើសត្វកណ្តុរនៅឡើយ។
ក្រៅពីជួយការពារកោសិកាបេះដូងពីការបំផ្លាញ មើមខ្ទឹមសក៏នៅមានអត្ថប្រយោជន៍ជួយកាត់បន្ថយការរលាក ធ្វើឱ្យសម្ពាធឈាមចុះទាបនិងជួយឱ្យកោសិកាទាំងឡាយមានជីវិតរស់បានទៀតផង។
David Lefer សាស្ត្រាចារ្យរបស់សាកលវិទ្យាល័យ Emory University School of Medicineបាននិយាយថា៖«ពួកយើងឥឡូវនេះកំពុងតែសិក្សាជាមួយឱសថសកម្មដែលបញ្ចេញនូវអ៊ីដ្រូសែន ស៊ុលភីត(Hydrogen Sulphide)។ ប្រការនេះអាចឱ្យយើងជៀសវាងនូវភាពចាំបាច់ក្នុងការចាក់បញ្ចូលឱសថចែកចាយស៊ុលភីតនៅក្រៅស្ថានភាពអាសន្ន»។
ឮការសិក្សាកាលពីឆ្នាំ២០១១នោះត្រូវបានចុះផ្សាយនៅក្នុងព្រឹត្តិប័ត្រសមាគមជំងឺបេះដូងអាមេរិក American Heart Associationអំឡុងកិច្ចប្រជុំនៅទីក្រុង Orlandoរដ្ឋផ្លរីដាសហរដ្ឋអាមេរិក៕
ចែករំលែកព័តមាននេះ