រាជធានីភ្នំពេញ ៖ កាលពីពេលថ្មីៗកន្លងទៅនេះ នៅសណ្ឋាគារណាហ្គាវើលមានរៀបចំសន្និសីទសារព័ត៌មានប្រកាសបើកការប្រកួតបាល់ទះពានរង្វាន់លីអូ Leo Cup National Volleyball ២០១២ ដោយមានការអញ្ជើញចូលរួមពីលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោកឧត្ដមសេនីយ៍ទោ វុធ ផល្លី ប្រធាននាយកដ្ឋានស្ថិតិ និងលិខិតឆ្លងដែន អនុប្រធានសហព័ន្ធកីឡាបាល់ទះកម្ពុជា លោកឡាក់ សំអាត អគ្គនាយកនៃអគ្គនាយកដ្ឋានកីឡាក្រសួងអប់រំ អនុប្រធានសហព័ន្ធកីឡាបាល់ទះកម្ពុជា លោកគ្រីទីណាន់ គូណាភើមសិរិ នាយកផ្នែកទីផ្សារប្រចាំតំបន់នៃក្រុមហ៊ុន Boonrawd Trading International ដែលជាក្រុមហ៊ុនផលិត និងចែកចាយស្រាបៀរ Leo លោកជៀម ស្រ៊ុន នាយកចាត់ការទូទៅនៃក្រុមហ៊ុន CP & A Trading Internationalភ្ញៀវជាតិ និងអន្ដរជាតិព្រមទាំងកីឡាករជម្រើសជាតិបាល់ទះកម្ពុជាជាដើម ។
ថ្លែងក្នុងឱកាសនោះ លោកគ្រីទីណាន់ បានឱ្យដឹងថា ឆ្លងកាត់ការសិក្សាផ្នែកទីផ្សារជាច្រើនឆ្នាំ បានបញ្ជាក់ពីការនិយមចូលចិត្ដរបស់ប្រជាពលរដ្ឋខ្មែរ ។ កីឡាបាល់ទះ គឺជាកីឡាមួយប្រភេទដែលទទួលការនិយមចូលចិត្ដយ៉ាងខ្លាំង ទើបបានពិភាក្សាជាមួយលោកជៀម ស្រ៊ុន ក្នុងការឧបត្ថម្ភដល់សហព័ន្ធដើម្បីរៀបចំការប្រកួតកីឡារបាល់ទះដ៏ធំ និងជាប្រវត្ដិសាស្ដ្រ ដែលពុំធ្លាប់កើតមានឡើងជាមួយទឹកប្រាក់ពានរង្វាន់ជ័យលាភីក្រុមជើងឯក ៤០លានរៀល។
នៅក្នុងសុន្ទរកថាស្វាគមន៍ និងបើកកម្មវិធីប្រកួត លោកឡាក់ សំអាត អគ្គនាយកនៃអគ្គនាយកដ្ឋានកីឡា និងជាអនុប្រធានសហព័ន្ធកីឡាបាល់ទះកម្ពុជា បានមានប្រសាសន៍ថា ដោយទទួលបានការអនុញ្ញតពីលោកនាយឧត្ដមសេនីយ៍ អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា ក្នុងការរៀបចំកីឡាបាល់ទះពានរង្វាន់លីអូឆ្នាំ២០១២ ក្នុងគោលបំណងលើកស្ទួយការប្រកួតថ្នាក់ជាតិឆ្ពោះទៅកាន់ការប្រកួតអន្ដរជាតិបង្កើនសមត្ថភាព និងបទពិសោធន៍ដល់កីឡាករទូទាំងប្រទេស និងជាឱកាសមួយដែលបានជ្រើសរើសកីឡាករថ្មីៗចូលជាក្រុមជម្រើសជាតិនាពេលខាងមុខ បណ្ដុះគំនិតដល់មហាជនខ្មែរឱ្យងាកពីអំពើអបាយមុខមកគាំទ្រ និងលេងកីឡាវិញ។
គួរបញ្ជាក់ថា ការប្រកួតកីឡាបាល់ទះពានរង្វាន់ Leo ឆ្នាំ២០១២ បែងចែកការប្រកួតជម្រុះជា៥ភូមិភាគ គឺភូមិភាគរាជធានីភ្នំពេញមានជាអាទិ៍រាជធានីភ្នំពេញ ខេត្ដកណ្ដាល កំពង់ស្ពឺ ព្រៃវែង ស្វាយរៀង ទទួលពាក្យសុំចូលរួមប្រកួតនៅថ្ងៃទី១២ ឧសភា នៅសហព័ន្ធកីឡាបាល់ទះកម្ពុជា ព្រមទាំងប្រកួតជម្រុះពីថ្ងៃទី១៣ដល់ថ្ងៃទី១៩ឧសភា នៅទីលានបាល់ទះកីឡដ្ឋានស្ដាតចាស់។ ភូមិភាគខេត្ដបាត់ដំបង មានជាអាទិ៍ ខេត្ដបាត់ដំបង ប៉ៃលិន បន្ទាយមានជ័យ ពោធិ៍សាត់ កំពង់ឆ្នាំង ទទួលពាក្យសុំចូលរួមប្រកួតនៅថ្ងៃទី២៧ ឧសភា នៅទីលានបាល់ទះសាលាគរុកោសល្យភូមិភាគបាត់ដំបង ព្រមទាំងប្រកួតជម្រុះពីថ្ងៃទី២៨ ឧសភា ដល់ថ្ងៃទី២ មិថុនា។ ភូមិភាគខេត្ដសៀមរាប មានជាអាទិ៍ ខេត្ដសៀមរាប កំពង់ធំ ព្រះវិហារ ឧត្ដរមានជ័យ ទទួលពាក្យសុំចូលរួមប្រកួតនៅថ្ងៃទី៩ មិថុនា នៅទីលានបាល់ទះក្លឹប SC ខេត្ដសៀមរាប ព្រមទាំងប្រកួតជម្រុះពីថ្ងៃទី១១ ដល់ថ្ងៃទី១៦ មិថុនា។ភូមិភាគខេត្ដកំពង់ចាម មានជាអាទិ៍ ខេត្ដកំពង់ចាម ស្ទឹងត្រែង រតនគិរី មណ្ឌលគិរី ទទួលពាក្យសុំចូលរួមប្រកួតថ្ងៃទី២៤ មិថុនា នៅទីលានបាល់ទះក្លឹបកីឡាខេត្ដកំពង់ចាម ព្រមទាំងប្រកួតជម្រុះពីថ្ងៃទី២៥ដល់ថ្ងៃទី៣០ មិថុនា ។ ភូមិភាគខេត្ដព្រះសីហនុ មានជាអាទិ៍ ខេត្ដព្រះសីហនុ កោះកុង កំពត កែប និងខេត្ដតាកែវ ទទួលពាក្យសុំចូលរួមប្រកួតថ្ងៃទី៨ កក្កដា នៅទីលានបាល់ទះក្លឹបកីឡាជើងទឹកក្រុងព្រះសីហនុ ព្រមទាំងប្រកួតជម្រុះពីថ្ងៃទី៩ ដល់ថ្ងៃទី១៤ កក្កដា។
នេះជាការប្រកួតក្នុងលក្ខណៈមហាជនទូទាំងប្រទេស ហេតុដូច្នេះហើយប្រជាពលរដ្ឋខ្មែរជាពិសេសអ្នកស្នេហាកីឡាបាល់ទះដែលមានសមាជិកក្រុមពី១០ទៅ១២នាក់អាចចុះឈ្មោះចូលរួមប្រកួតជាមួួយសហព័ន្ធ ក៏ដូចជានៅតាមទីកន្លែង និងកាលបរិច្ឆេទដែលបានបញ្ជាក់ខាងលើ ក្រុមដែលមកមុនទទួលនូវសិទ្ធិពិសេសក្នុងការប្រកួតមុន ។ ការប្រកួតកីឡាបាល់ទះពានរង្វាន់លីអូក្នុងដំណាក់កាលទី២ នឹងធ្វើការប្រកួតពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រនៅរាជធានីភ្នំពេញនៅថ្ងៃទី៥ សីហា។ សូមប្រជាពលរដ្ឋខ្មែរចូលរួមប្រកួត និងទស្សនាដើម្បីលើកកម្ពស់សមត្ថភាព និងទឹកចិត្ដក៏ដូចជាកេរ្ដិ៍ឈ្មោះកីឡាបាល់ទះកម្ពុជា ៕
ចែករំលែកព័តមាននេះ