រាជធានីភ្នំពេញ ៖ ឡៅ ស៊ីណាត មកពីក្លឹបកងពលតូចឆត្រយោងលេខ៩១១ នឹងជួបជាមួយជើងខ្លាំងមកពីអាល្លឺម៉ង់ Andreas Matthisas ក្នុងប្រភេទទម្ងន់៦៧គីឡូក្រាម នៅលើសង្វៀនស្ថានីយទូរទស្សន៍ប៉ុស្តិ៍លេខ៣ នាថ្ងៃសៅរ៍ទី៥ ឧសភា ខាងមុខនេះ ខណៈចាន់ រតនា មកពីក្លឹបខេមរៈខ្លាហោះ ជួបជើងខ្លាំងមកពីកូរ៉េ Chungtong Kwang ក្នុងប្រភេទទម្ងន់៥៧គីឡូក្រាម ។
ស៊ីណាត គឺជាជើងខ្លាំងម្នាក់ដែលមានល្បិចប្រយុទ្ធនៅលើសង្វៀនខ្ពស់បំផុត ប៉ុន្តែសម្រាប់ដៃគូប្រកួតរបស់គេវិញអត់មានអ្នកណាស្គាល់ប្រវត្តិច្បាស់ឡើយ គឺគេបានត្រឹមតែដឹងតៗគ្នាថា ជាជើងខ្លាំងគ្រាន់បើ ។ ស៊ីណាត ស្នៀតកែង និងជង្គង់របស់គេពិបាករកគូប្រៀបខ្លាំងណាស់ ចលនាវាយលុកនៅលើសង្វៀនមានភាពរហ័សរហួនគ្រាន់បើ បូករួមទាំងស្នៀតជើង និងស្នៀតកណ្តាប់ដៃទៀត គឺពិបាកទប់ទល់ខ្លាំងណាស់ ប៉ុន្តែការមកប៉ះជើងខ្លាំងមកពីអាល្លឺម៉ង់លើកនេះ មិនអាចធ្វេសប្រហែសបានឡើយ ។ ភាគច្រើនកីឡាករបរទេសមិនសូវមានល្បិចប្រយុទ្ធនៅលើសង្វៀនល្អប៉ុន្មានទេ តែបើនិយាយពីកម្លាំងវិញ គឺខ្លាំងវាយ៥ទឹកពេញមិនងាយហត់ឡើយ ទោះជាយ៉ាងណា ក៏គេមិនទាន់អាចនិយាយទុកមុនបានដែរ មានតែរង់ចាំអ៊ុតមើល លើការប្រកួតថ្ងៃនោះមកដល់សិនទើបអាចដឹងបាន ។
រីឯការជួបគ្នារវាងកីឡាករចាន់ រតនា និងកីឡាករមកពីកូរ៉េវិញ រឹតតែមិនអាចទាយទុកមុនបានថែមទៀត ។ ចាន់ រតនា មានស្នៀតជើងខ្លាំងដូចរន្ទះ អាចទាត់ចេញបានលឿន ហើយខ្លាំង ចំណែកស្នៀតកែងវិញ ក៏សាហាវណាស់ដែរ ប៉ុន្តែគេមិនអាចមើលស្រាលលើជើងខ្លាំងមកពីកូរ៉េម្នាក់នេះបានឡើយ ។ Chungtong Kwang មានស្នៀតកណ្តាប់ដៃល្អអាចវាយចេញបានត្រង់ ហើយខ្លាំងទៀតផង ប៉ុន្តែជើងខ្លាំងម្នាក់នេះអត់មានអ្នកណាស្គាល់ប្រវត្តិប្រកួតច្បាស់លាស់ឡើយ ។ ចាំមើល រតនា ដែលមិនធ្លាប់ភ្លក់រសជាតិនៃការប្រកួតជាលក្ខណៈអន្តរជាតិម្តងណាសោះ លើកនេះគេមានសំណាងល្អ ឬមិនល្អនោះមានតែចាំអ៊ុតមើលលើការប្រកួតថ្ងៃនោះមកដល់សិនប៉ុណ្ណោះ ។
ចំណែកឯគូប្រកួតរវាងកម្ពុជា និងកម្ពុជាវិញ លាប សំណាង មកពីក្លឹបកងពលតូចលេខ៧០ ជួបខុម ពិសិដ្ឋ មកពីក្លឹបអូដឹមកីឡា ។ សាន រាជសីហ៍ មកពីក្លឹបសម្រែករាជសីហ៍បង្ក្រាបគ្រឿងញៀន ជួបសល់ ប៊ុនហូវ មកពីក្លឹបអាស៊ីកីឡា ។ ថា រ៉ាវី មកពីក្លឹបឥន្ទ្រីកីឡាជួប ជឹម សារាត់ មកពីក្លឹបក្រសួងមហាផ្ទៃ ៕
ចែករំលែកព័តមាននេះ