កីឡាករស្វ៊ីសស្ទែននីឡាស វ៉ារិនកាបានសម្តែងក្តីរីករាយជាខ្លាំងបន្ទាប់ពីរូបគេបានយកឈ្នះជុំទី២ប្រកួតតឺន្នីសកម្មវិធី Estoril Tennis Openដែលរៀបចំធ្វើនៅតំបន់ Oeirasជាយក្រុង Lisbonប្រទេសព័រទុយហ្គាល់ កាលពីថ្ងៃទី២ឧសភាកន្លងមកនេះ ។
វ៉ារិនការបំបាក់កីឡាករអេស្ប៉ាញ Ivan Navarroក្នុងលទ្ធផល៧-៦និង៦-១ឈានចូលជុំទី៣ដោយក្តីរីករាយ។ រដូវកាលនេះ វ៉ារិនកាមិនទាន់យកឈ្នះពានជើងឯកណាមួយលើទីលានដីក្រហមនៅឡើយទេ គឺគ្រាន់តែឈានចូលដល់វគ្គពាក់កណ្តាលផ្តាច់ព្រ័ត្រចំនួន២លើកប៉ុណ្ណោះ។ ចំណែកក្នុងកម្មវិធី Monte Carlo Mastersកន្លងមក គេបានឆ្លងចូលដល់ត្រឹមវគ្គ១/៤ផ្តាច់ព្រ័ត្រប៉ុណ្ណោះ។
ថ្លែងបន្ទាប់ពីដណ្តើមបានជ័យជម្នះលើក នេះ កីឡាករលំដាប់ទី២២រូបនេះបញ្ជាក់ថា៖ «អាកាសធាតុក្នុងថ្ងៃនេះពិតជាមិនអំណោយផលទាល់តែសោះ។ មានខ្យល់និងភ្លៀង។ គូប្រកួតរបស់ខ្ញុំមានបទពិសោធន៍ច្រើនក្នុងការប្រកួតនៅទីនេះ។ សិតទី១ពិតជាយ៉ាប់ខ្លាំងណាស់ តែសំណាងល្អដែលខ្ញុំឈ្នះការប្រកួត។ បន្ទាប់ពីឈ្នះសិតទី១ សិតទី២ខ្ញុំយកឈ្នះយ៉ាងរំភើយ។ ឈ្នះការប្រកួតលើកនេះពិតជាសំខាន់ខ្លាំងណាស់»។
ឡើងទៅជុំទី៣ក្នុងពេលជាមួយគ្នានោះផងដែរ គឺកីឡាករបារាំងរីឆាដ ហ្គាសហ្គេត។ ហ្គាសហ្គេតបានឆ្លងផុតជុំទី២ក្រោយពីឈ្នះកីឡាករអ៊ីតាលី Paolo Lorenzi ក្នុងលទ្ធផល៦-១និង៦-១។ ហ្គាសហ្គេតគឺជាកីឡាករម្នាក់ដែលធ្លាប់បានឈានចូលដល់វគ្គផ្តាច់ព្រ័ត្រកម្មវិធីនេះកាលពីឆ្នាំ២០០៧។នៅឆ្នាំនេះគេទទួលបរាជ័យចំនួន៨លើកនៅក្នុងការប្រកួតសរុប១២លើក។ គេបាននិយាយថា៖«វាជាលទ្ធផលល្អមួយសម្រាប់ខ្ញុំ។ ខ្ញុំមិនអាចតវ៉ាបានទេ។
ខ្ញុំធ្លាប់មកប្រកួតនៅវគ្គផ្តាច់ព្រ័ត្រនៅទីនេះបានម្តងហើយ ដូច្នេះខ្ញុំដឹងយ៉ាងច្បាស់ពីស្ថានភាពទីលានប្រកួត ។ ខ្យល់មិនមែនជាបញ្ហាសម្រាប់ខ្ញុំទេ។ ខ្ញុំមិនយល់ទាស់ប្រកួតក្នុងពេលមានខ្យល់បក់ខ្លាំងនោះទេ។ ខ្ញុំចូលចិត្តធ្វើការងារអ្វីមួយដោយមានខ្យល់»។
ចំណែកលទ្ធផលនៃការប្រកួតឯកត្តជនផ្នែកនារីវិញ កីឡាការិនីម៉ារីយ៉ា គីរីឡឹនកូដែលជាម្ចាស់ពាននេះកាលពីឆ្នាំ២០០៨បានធ្លាក់ចេញពីកម្មវិធីប្រកួតក្រោយពីបរាជ័យក្រោមថ្វីដៃនាង Karin Knappមកពីប្រទេសអុីតាលីក្នុងលទ្ធផល ១-៦,៦-១និង៧-៥។
គីរីឡឹនកូនៅឆ្នាំនេះមិនទាន់បានយកឈ្នះពានជើងឯកកម្មវិធីណាមួយនៅឡើយទេ។ កាលពីប្រកួតនៅទីក្រុងប៉ាត់តាយ៉ា ប្រទេសថៃខែកុម្ភៈកន្លងមក នាងដណ្តើមបានត្រឹមចំណាត់ថ្នាក់លេខ២ប៉ុណ្ណោះ។ បរាជ័យលើកនេះធ្វើឱ្យនាងបាត់បង់ឱកាសជាថ្មីម្តងទៀតហើយ ។
លទ្ធផលនៃការប្រកួតឯកត្តជនផ្សេងទៀតមានដូចជា កីឡាការិនីចិន Jie Zhengបរាជ័យក្រោមថ្វីដៃនាង Galina Voskoboeva ក្នុងលទ្ធផល៦-៤និង៦-១ ខណៈកីឡាការិនីអ៊ីតាលី Roberta Vinciឈ្នះកីឡាការិនីម្ចាស់ផ្ទះ Maria Joao Koehlerក្នុងលទ្ធផល៦-២និង៦-០។ ស្របពេលជាមួយគ្នានោះ កីឡាការិនអេស្តូនី Kaia Kanepiបានពន្លត់នូវក្តីសង្ឃឹមរបស់កីឡាការិនីអាមេរិក Vania Kingក្រោយពីបានយកឈ្នះក្នុងលទ្ធផល៦-៣និង៦-៤។
កីឡាការិនីឆែក Petra Cetkovskaយកឈ្នះកីឡាការិនីអង់គ្លេស Heather Watsonក្នុងលទ្ធផល៦-៣និង៦-១ខណៈ កីឡាការិនីរុស្ស៊ី Nadia Petrova យកឈ្នះកីឡាការិនីអូស្ត្រាលីក្នុងលទ្ធផល៧-៦ ។ កីឡាការិនីអេស្ប៉ាញ Carla Suarez Navarroចូលរួមរីករាយជ័យជម្នះទៅជុំបន្តផងដែរបន្ទាប់ពីបានបំបាក់ស្លូវេនៀ Polona Hercogក្នុងលទ្ធផល៦-៤និង៣-០ ៕
ចែករំលែកព័តមាននេះ