អតីតកីឡាករប្រដាល់អង់គ្លេសរីកគី ហាតតុនបាននិយាយថា ខ្លួនមើលមិនឃើញចំណុចណាមួយដែលថា កូតតូអាចគេចផុតពីការបរាជ័យក្រោមកណ្តាប់ដៃកីឡាករហ្វ្លយ មេវេដឌ័រនោះទេ។
ហាតតុនបានប្រៀបធៀបកូតតូដែលជាម្ចាស់ខ្សែក្រវាត់ស្ថាប័ន WBAក្នុងប្រភេទទម្ងន់ Junior Middleweightទៅនឹងខ្លួនគេកាលពី៥ឆ្នាំមុនដែលបានសន្លប់ក្នុងទឹកទី១០ក្រោមកណ្តាប់ដៃមេវេដឌ័រ។ ជើងឯកដែលចូលនិវត្តន៍រូបនេះបានបន្តថា៖«ខ្ញុំគិតថាការជួបគ្នារវាងមេវេដឌ័រនិងកូតតូគឺវាមិនខុសពីការប្រកួតរបស់ខ្ញុំជាមួយនឹងមេវេដឌ័រនោះទេ។ ខ្ញុំគិតថា មេវេដឌ័រផ្តួលកូតតូនៅចុងទឹក»។
កាលពីចុងខែកុម្ភៈកន្លងមក អំឡុងការធ្វើសន្និសីទកាសែតផ្សព្វផ្សាយពីការប្រកួត មេវេដឌ័របាននិយាយថា ខ្លួននឹងផ្តួលមីហ្គែល កូតតូ ហើយយកខ្សែក្រវាត់ស្ថាប័ន WBAរបស់គេឱ្យខាងតែបាន។
គេបញ្ជាក់នៅពេលនោះថា៖«សម្រាប់ខ្ញុំចូលរួមការប្រកួតលើកនេះក្នុងនាមជាអ្នកវាយដណ្តើមខ្សែក្រវាត់ តែនេះគឺជាការសាកល្បងមួយផងដែរដើម្បីលើកទឹកចិត្តឱ្យខ្ញុំហ្វឹកហាត់បន្ថែមទៀត។ ខ្ញុំមិនគិតថា ការប្រកួតដណ្តើមខ្សែក្រវាត់បែបនេះកើតឡើងសាជាថ្មីម្តងទៀតទេ។ ការគ្រងតំណែងជើងឯកក្នុងស្ថាប័ននេះរបស់កូតតូនឹងត្រូវបញ្ចប់នៅថ្ងៃទី៥ខែឧសភាខាងមុខ»។ កីឡាករអាមេរិករូបនេះបានបន្តថា៖«ដើម្បីប្រែក្លាយទៅជាអ្នកពូកែជាងគេ យើងចាំបាច់ត្រូវតែប្រកួតជាមួយអ្នកពូកែ។ កូតតូគឺជាកីឡាករដែលពូកែម្នាក់ក្នុងវិស័យកីឡាប្រដាល់បច្ចុប្បន្ននេះ»។
មេវេដឌ័រនឹងឡើងសង្វៀនប្រកួតដណ្តើមខ្សែក្រវាត់ស្ថាប័ន WBAក្នុងប្រភេទទម្ងន់ Super-welterweightពីកីឡាករព័រតូរីកូមីហ្គែល កូតតូនៅថ្ងៃទី៥ខែឧសភា(ត្រូវនឹងថ្ងៃអាទិត្យម៉ោងនៅកម្ពុជា) ចុងសប្តាហ៍នេះ។ ការប្រកួតនេះនឹងត្រូវរៀបចំនៅសង្វៀន MGM Grand Gardenស្ថិតក្នុងទីក្រុងឡាសវេហ្គាសសហរដ្ឋអាមេរិក។
ការឡើងសង្វៀនជាថ្មីរបស់មេវេដឌ័របានកើតឡើងភ្លាមៗបន្ទាប់ពីគណៈកម្មការកីឡារដ្ឋនេវ៉ាដាយល់ព្រមផ្តល់អាជ្ញាប័ណ្ណមួយប្រកួតដល់រូបគេមុននឹងចូលទៅបង្ហាញខ្លួនក្នុងពន្ធនាគារនៅដើមខែមិថុនា ។
មេវេដឌ័រដែលធ្លាប់ប្រកួតឈ្នះ៤២លើកផ្តួលដៃគូឱ្យសន្លប់ចំនួន២៦លើកបានសម្រេចចិត្តជ្រើសរើសយកកីឡាករកូតូតដែលមានឯតទគ្គកម្មប្រកួតឈ្នះ៣៦លើក ចាញ់២ ផ្តួលដៃគូឱ្យសន្លប់២៩លើក ធ្វើជាគូប្រកួតបន្ទាប់ក្រោយពីបរាជ័យចរចាមិនត្រូវគ្នាលើថ្ងៃប្រកួតជាមួយម៉ានី ប៉ាក់គីអាវ។
ថ្លែងកាលពីបញ្ចប់ជំនួបជាមួយគណៈកម្មការរដ្ឋនេវ៉ាដាដើមខែកុម្ភៈមេវេដឌ័របានបញ្ជាក់ថា៖«ខ្ញុំចង់បានកីឡាករប៉ាក់គីអាវសម្រាប់ការប្រកួតនេះ តែគេគ្មានឆន្ទៈពិតប្រាកដ… គេពិតជាមិនចង់ប្រកួតឡើយ។ ខ្ញុំបានផ្តល់ឱ្យគេនូវឱកាសមួយរួចហើយ»។ ការប្រកាសពីការជួបគ្នារវាងមេវេដឌ័រនិងកូតតូនៅពេលនោះបានបញ្ចប់ទាំងស្រុងនូវការស្រមើលស្រមៃដែលថានឹងមានការប្រកួតដ៏ធំមួយរវាងរូបគេ(មេវេដឌ័រ)និងប៉ាក់គីអាវក្នុងខែឧសភា ។
កីឡាករវ័យ២៤ឆ្នាំរូបនេះបានបញ្ជាក់បន្ថែមថា៖«នេះជាការប្រកួតប្រជែងល្អមួយរវាងខ្ញុំនិងរូបគេក្នុងប្រភេទទម្ងន់នេះ តែយ៉ាងណា ការប្រកួតនេះគឺគ្រាន់តែជាប្រភេទនៃការសាកល្បងសម្រាប់ខ្ញុំប៉ុណ្ណោះ ។ កូតតូគឺជាកីឡាករលំដាប់ពិភពលោកម្នាក់ដែលមិនដែលធ្លាប់បង្ហាញឱ្យឃើញជាភស្តុតាងក្នុងនាមជាជើងខ្លាំងម្តងណាឡើយ ។ ខ្ញុំគ្មានការមន្ទិលក្នុងចិត្តទេ»។
ទោះជាយ៉ាងណា កូតតូបានឆ្លើយតបវិញ ថា ៖«ថ្ងៃទី៥ខែឧសភាខ្ញុំនឹងបំបាក់អំនួតរបស់មេវេដឌ័រ។ ខ្ញុំនៅទីនេះដើម្បីប្រកួតជាមួយបណ្តាជើងខ្លាំងក្នុងលោក។ ខ្ញុំមិនដែលគេចពីអ្នកណាម្នាក់ដែលមកបបួល ឬក៏ដណ្តើមខ្សែក្រវាត់ខ្ញុំទេ »។
កូតតូវ័យ៣១ឆ្នាំប្រកួតចុងក្រោយកាលពីខែធ្នូឆ្នាំកន្លងមកបានយកឈ្នះកីឡាករម៉ិចស៊ិកអង់តូនីញ៉ូ ម៉ាហ្គារីតូការពារបានខ្សែក្រវាត់ស្ថាប័នWBAក្នុងប្រភេទទម្ងន់ Super-welterweight។ ចំណែកឯមេវេដឌ័រការប្រកួតចុងក្រោយរបស់គេកាលពីខែកញ្ញាកន្លងទៅបានយកឈ្នះកីឡាករវិចទ័រ អូទីសក្នុងទឹកទី៤ ៕
ចែករំលែកព័តមាននេះ