ក្រុងប៉ោយប៉ែត ៖ ស្ត្រីខ្មែរជាអ្នកជ្រែអីវ៉ាន់អាវគីប (ជជុះ) ចេញចូលដីថៃម្នាក់ ត្រូវបានកម្មកររបស់គយថៃប្រចាំនៅច្រកទ្វារអន្តរជាតិខ្លងលឹក ស្រុកអារញ្ញ ខេត្តស្រះកែវ ឈមនឹងច្រកអន្តរជាតិប៉ោយប៉ែត វាយឱ្យរបួសបែកបបូរមាត់ ព្រោះតែជម្លោះរឿងថ្លឹងអីវ៉ាន់ កាលពីវេលាម៉ោង៣ និង៤៤នាទីរសៀលថ្ងៃទី២ ឧសភា ២០១២ ក្បែរផ្សាររុងក្លឿ ដោយសារតែកម្មកររបស់គយថៃយកទម្ងន់អីវ៉ាន់អ្នកផ្សេងមកបញ្ចូលក្នុងទម្ងន់អីវ៉ាន់របស់នារីរងគ្រោះ ។
ស្ត្រីរងគ្រោះឈ្មោះលន់ សុភាព ហៅបុង អាយុ៣៤ឆ្នាំ ជាអ្នកជ្រែអីវ៉ាន់ខោអាវគីប (ខោអាវជជុះ) មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។ បញ្ហាកើតឡើង គឺផ្តើមចេញពីរឿងថ្លឹងទម្ងន់នេះឯង ដោយកម្មកររបស់គយថៃថ្លឹងខោអាវគីបឱ្យស្ត្រីរងគ្រោះអស់ហើយ ប៉ុន្តែរទេះទំនិញខោអាវគីបអ្នកផ្សេងទៅតាមក្រោយ បែរជាកម្មករគយថៃនោះកត់ទម្ងន់ចូលក្នុងចំនួនរបស់ស្ត្រីរងគ្រោះ លុះធ្វើការតវ៉ាថា មិនមែនជារបស់ខ្លួន ក៏ត្រូវកម្មកររបស់ គយថៃ ឈ្មោះអេ ភេទប្រុស វាយមួយដៃឱ្យបែកបបូរមាត់ខាងឆ្វេងហូរឈាមតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ