រាជធានីភ្នំពេញ ៖ សមត្ថកិច្ចចម្រុះមាននគរបាលក្រសួងមហាផ្ទៃ រាជធានីភ្នំពេញ និងខណ្ឌ ដោយមានការសម្របសម្រួលពីស្ថាប័ន អយ្យការ កាលពីវេលាម៉ោង៦ល្ងាចថ្ងៃទី១ ឧសភា រហូតដល់ម៉ោង៣ទៀបភ្លឺ ឈានចូលថ្ងៃទី២ ឧសភា បានបើកប្រតិបត្តិការបង្ក្រាបក្រុមផលិត និងជួញដូរគ្រឿងញៀនដ៏ធំមួយកក្រើករាជធានីភ្នំពេញ ។ ប្រតិបត្តិការនេះ បានធ្វើឡើងនៅក្នុងខណ្ឌចំនួន៤ គឺខណ្ឌពោធិ៍សែនជ័យ ខណ្ឌសែនសុខ ខណ្ឌមានជ័យ និងខណ្ឌចំការមន និងឃាត់ខ្លួនជនសង្ស័យ១១នាក់ ក្នុងនោះមានជនជាតិវៀតណាម៦នាក់ និងខ្មែរ៥នាក់ មានប្រុស៧នាក់ ស្រី៤នាក់ ដោយធ្វើការដកហូតវត្ថុតាងបានមួយចំនួនធំ ។
ទាក់ទិននឹងប្រតិបត្តិការបង្ក្រាបទីតាំងផលិត និងក្រុមជួញដូរគ្រឿងញៀនខាងលើនេះ ប្រភពព័ត៌មានពីមន្ត្រីសាលាដំបូងរាជធានីភ្នំពេញ បានឱ្យដឹងថា ក្រោយពីទទួលបានព័ត៌មាន និងសេចក្តីរាយការណ៍យ៉ាងជាក់លាក់ពីសមាសភាព និងទីតាំងលួចលាក់ផលិតគ្រឿងញៀននៅក្នុងរាជធានីភ្នំពេញតាមរយៈនាយកដ្ឋានប្រឆាំងភេរវកម្មក្រសួងមហាផ្ទៃ លោកយ៉េត ចរិយា ព្រះរាជអាជ្ញាសាលាដំបូងបានចាត់តាំងព្រះរាជអាជ្ញារង៣រូប ចុះទៅដឹកនាំសមត្ថកិច្ច និងអាជ្ញាធរធ្វើកិច្ចការនេះ ។ ប្រភពបន្តថា សមាសភាពក្រុមចម្រុះចុះបង្ក្រាបទីតាំងផលិត និងក្រុមជួញដូរគ្រឿងញៀននេះ មានលោកសុខ រឿន ព្រះរាជអាជ្ញារង លោកសៀង សុខ ព្រះរាជអាជ្ញារង លោកឯក ឆេងហួត ព្រះរាជអាជ្ញារងតំណាងអយ្យការអមសាលាដំបូង ។ ខាងសមត្ថកិច្ចមានលោកឧត្តមសេនីយ៍ អ៊ុក ហៃសីឡា អនុប្រធាននាយកដ្ឋាននគរបាលប្រឆាំងភេរវកម្មក្រសួងមហាផ្ទៃ លោកឧត្តមសេនីយ៍ទូច ណារ៉ុថ ស្នងការនគរបាលរាជធានីភ្នំពេញ លោកឧត្តមសេនីយ៍បែន រ័ត្ន ស្នងការរង និងជាប្រធានការិយាល័យកណ្តាលនគរបាលប្រឆាំងបទល្មើសនៃស្នងការដ្ឋាននគរបាលរាជធានីភ្នំពេញ ។ លោកឃួង ស្រេង អភិបាលខណ្ឌសែនសុខ លោកវរសេនីយ៍ទោ ម៉ក់ ហុង អធិការខណ្ឌសែនសុខ លោកគិត សុផា អភិបាលខណ្ឌពោធិ៍សែនជ័យ លោកវរសេនីយ៍ទោប៊ន សំអាត អធិការខណ្ឌពោធិ៍សែនជ័យ លោកហ៊ី ណារិន អធិការខណ្ឌមានជ័យ និងលោកហៀង ថារ៉េត អធិការរងខណ្ឌចំការមន ។
ក្នុងបេសកកម្មបង្ក្រាបដ៏ធំនោះ ក៏មានវត្តមានលោកជីវ កេង ប្រធានសាលាដំបូងរាជធានីភ្នំពេញ តាមឃ្លាំមើល និងសង្កេតការណ៍ផ្តល់ជាយោបល់រហូតដល់ទីបញ្ចប់ផងដែរ ។
មន្ត្រីសាលាដំបូងបានឱ្យដឹងទៀតថា ប្រតិបត្តិការបង្ក្រាបគ្រឿង ញៀន១ករណីនេះ បានធ្វើឡើងចំនួន៧គោលដៅ ក្នុងនោះខណ្ឌពោធិ៍សែនជ័យមាន២ គោលដៅ ខណ្ឌសែនសុខមាន២គោលដៅ ខណ្ឌចំការមនមាន២គោលដៅ និងខណ្ឌមានជ័យ មាន១គោលដៅ ។ ទាំង៧គោលដៅនេះ ឃាត់ខ្លួនមនុស្ស១១នាក់ ដកហូតវត្ថុតាងរួមមាន ប្រេងម្រះព្រៅ១២៧ប៊ីដុង សារធាតុផ្សំគ្រឿងញៀនជាង១តោន អាស៊ីដ ម្សៅសច្រើនថង់ ឧបករណ៍ផលិតគ្រឿងញៀន១កំប្លេ ជញ្ជីងថ្លឹងថ្នាំញៀន១គ្រឿង និងសម្ភារវេចខ្ចប់ថ្នាំញៀនមួយចំនួន ។ ប្រភពបន្តថា ករណីខាងលើនេះ ពីដំបូងព័ត៌មានបានធ្លាយចេញមកពីសមត្ថកិច្ចនាយកដ្ឋាននគរបាលប្រឆាំងភេរវកម្មក្រសួងមហាផ្ទៃ ដែលកម្លាំងនាយកដ្ឋាននោះបានតាមប្រមាញ់ជនសង្ស័យ១ក្រុម ដែលជាក្រុមជួញដូរគ្រឿងញៀនរហូតដល់ចំណុចមួយជិតផ្សារអូរដឹម សង្កាត់ចោមចៅ ខណ្ឌពោធិ៍សែនជ័យ ។
ពេលនគរបាលក្រសួងមហាផ្ទៃតាមប្រមាញ់ ជនសង្ស័យទៅដល់ទីនោះ ក៏ត្រូវបាត់ដាន ប៉ុន្តែភ្លាមនោះ ជនសង្ស័យបែរជាត្រូវនគរបាលប៉ុស្តិ៍រដ្ឋបាលសង្កាត់ចោមចៅឃាត់ខ្លួន ទើបកិច្ចការនេះ កើតមានការសហការគ្នាតាំងពីសមត្ថកិច្ចនគរបាលក្រសួងមហាផ្ទៃ សង្កាត់ខណ្ឌ រាជធានីបង្កើតជាគណៈកម្មការចម្រុះមួយដឹកនាំដោយលោកព្រះរាជអាជ្ញារង៣រូប បង្ក្រាបលើក្រុមផលិត និងជួញដូរគ្រឿងញៀន ទាំង៧គោលដៅនេះពេញមួយយប់បានយ៉ាងជោគជ័យ ។ ជនសង្ស័យចំនួន១១នាក់ ត្រូវបានឃាត់ខ្លួននៅខណ្ឌពោធិ៍សែនជ័យ ដើម្បីធ្វើការសាកសួរ និងត្រូវកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ។
ជនសង្ស័យដែលសមត្ថកិច្ចឃាត់ខ្លួនទាំង១១នាក់មាន ១-ឈ្មោះប៊ិន សុភ័ក្រ ភេទប្រុស អាយុ២១ឆ្នាំ មុខរបរបើកបររថយន្តដឹកទឹកបរិសុទ្ធ ស្នាក់នៅភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ ។ ២-ឈ្មោះសាន សម្បត្តិ ភេទប្រុស អាយុ២១ឆ្នាំ ជាសិស្ស ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន ។ ៣-ឈ្មោះឯក ផាន់នី ភេទប្រុស អាយុ២៨ឆ្នាំ ជាអង្គរក្ស ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន។ ៤-ឈ្មោះង្វៀង វឿកថាញ់ ភេទប្រុស អាយុ៦០ឆ្នាំ ជាជនជាតិវៀតណាម ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន ។ ៥-ឈ្មោះង្វៀង ងឹង ភេទស្រី អាយុ២៦ឆ្នាំ ជនជាតិវៀតណាម ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងទី២ ខណ្ឌចំការមន។ ៦-ឈ្មោះង្វៀង ភឿង ភេទស្រី អាយុ៥៦ឆ្នាំ ជនជាតិវៀតណាម ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន ។ ៧-ឈ្មោះធូ តាំ ភេទស្រី អាយុ៣៤ឆ្នាំ ជនជាតិវៀតណាម ស្នាក់នៅផ្ទះលេខ៦៩ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន ។ ៨-ឈ្មោះចូវ យ៉ាងដាំង ភេទប្រុស អាយុ៥៥ឆ្នាំ ជនជាតិវៀតណាម ។ ៩-ឈ្មោះចូវ យ៉ាងថាក់ ភេទប្រុស អាយុ៤១ឆ្នាំ ជនជាតិវៀតណាម (២នាក់នេះស្នាក់នៅមិនពិតប្រាកដ) ។ ១០-ឈ្មោះសេង សទ្ធាសំរិទ្ធ ភេទប្រុស អាយុ២៨ឆ្នាំ ស្នាក់នៅផ្ទះលេខ១៦ ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ។ ១១-ឈ្មោះសេង សុធារ័ត្ន ភេទស្រី អាយុ២៣ឆ្នាំ ជានិស្សិតឆ្នាំទី៤ ស្នាក់នៅផ្ទះលេខ១៦ ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
តាមប្រភពពីប៉ូលិសខណ្ឌពោធិ៍សែនជ័យបានឱ្យដឹងបន្ថែមថា រថយន្តដឹកប្រេងម្រះព្រៅ៣៤ប៊ីដុង និងសារធាតុផ្សំសម្រាប់ផលិតគ្រឿងញៀនជាង១០មុខទៀតត្រូវបានបង្ក្រាប ។ ប្រភពដដែលឱ្យដឹងថា រថយន្តកូរ៉េ១គ្រឿងដឹកប្រេងម្រះព្រៅជាង៣០ប៊ីដុងព្រមទាំងសារធាតុផ្សំសម្រាប់ផលិតគ្រឿងញៀនជាច្រើនទៀត ត្រូវកម្លាំងប៉ូលិសខណ្ឌពោធិ៍សែនជ័យ និងប៉ូលិសប៉ុស្តិ៍ចោមចៅ ដឹកនាំដោយលោកអធិការប៊ន សំអាត ក្រោមបញ្ជាផ្ទាល់ពីលោកអភិបាលខណ្ឌគិត សុផា ព័ទ្ធចាប់បានបន្ទាប់ពីទទួលបានព័ត៌មានរាយការណ៍ពីប្រជាពលរដ្ឋ ។
ការបង្ក្រាបនេះបានធ្វើឡើងកាលពីវេលាម៉ោង៧និង១០នាទីយប់ថ្ងៃទី១ ឧសភា នៅក្នុងភូមិអង្គកែវ សង្កាត់ចោមចៅ ខណ្ឌពោធិ៍សែន ជ័យ ។ រថយន្ត១គ្រឿងនោះម៉ាកហ៊ីយ៉ាន់ដាយ ពណ៌ខៀវ បើកបរដោយបុរសម្នាក់ឈ្មោះ ប៊ិន សុភ័ក្ត្រ អាយុ៣១ឆ្នាំ ស្នាក់នៅផ្ទះជួលក្នុងភូមិខាងលើ ហើយរថយន្តនេះត្រូវគេជួលក្នុងតម្លៃ៣០ដុល្លារ ឱ្យដឹកប្រេងម្រះព្រៅ និងសារធាតុផ្សំសម្រាប់ផលិតគ្រឿងញៀនជាច្រើនមុខទៀត ។
តាមប្រភពព័ត៌មានពីមន្ត្រីប៉ូលិសមួយរូបឱ្យដឹងថា មុននឹងឈានដល់ការចាប់បានរថយន្តមួួយគ្រឿងនេះ គឺកម្លាំងប៉ូលិសខណ្ឌបានធ្វើការស្រាវជ្រាវយូរមកហើយ ទើបតែពេលនេះ លេចឮព័ត៌មានដែលផ្តល់ដោយប្រជាពលរដ្ឋថាបានឃើញរថយន្តទ្រុងសម្រាប់ដឹកទឹកបរិសុទ្ធមួយគ្រឿងដឹកប្រេងម្រះព្រៅ និងសារធាតុផ្សំសម្រាប់ផលិតគ្រឿងញៀនចេញពីឃ្លាំងនៅតាមបណ្តោយផ្លូវលេខ២០០៤ ស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ។ ពេលទទួលបានព័ត៌មានបែបនេះ លោកអធិការប៊ន សំអាត ក្រោមបញ្ជាពីលោកអភិបាលខណ្ឌគិត សុផា បានដឹកនាំកម្លាំងប៉ូលិសប៉ុស្តិ៍ចោមចៅ និងប៉ូលិសខណ្ឌចេញធ្វើសកម្មភាពតាមរថយន្តនោះ ហើយបានប្រទះឃើញដឹកវត្ថុសង្ស័យទៅកាន់ឃ្លាំងមួយនៅក្នុងភូមិអង្គកែវ សង្កាត់ចោមចៅ។
ប្រភពដដែលបានបន្តថា ខណៈនោះកម្លាំងក៏បានទៅដល់ ហើយឡោមព័ទ្ធចាប់ភ្លាមៗតែម្តង រួចនាំយកទៅកាន់ប៉ុស្តិ៍ចោមចៅធ្វើការឆែកឆេរក្នុងទ្រុងរថយន្តនោះជាជំហានដំបូង ក៏ឃើញសុទ្ធតែប៊ីដុងដាក់ប្រេងម្រះព្រៅ និងសារធាតុផ្សំសម្រាប់ផលិតគ្រឿងញៀនជាច្រើនទៀត ។ បន្ទាប់មក សមត្ថកិច្ចខណ្ឌពោធិ៍សែនជ័យដែលពេលនោះលោកអភិបាលខណ្ឌបានចុះទៅពិនិត្យផ្ទាល់ដែរបានបិទប្លុមបេវិញរួចនាំយករថយន្តទៅកាន់សាលាខណ្ឌពោធិ៍សែនជ័យ ដោយមានការយាមកាមយ៉ាងតឹងរ៉ឹងបំផុត ។
ប្រភពដដែលបានបន្តទៀតថា លុះដល់ព្រឹកថ្ងៃទី២ ឧសភា គណៈកម្មការចម្រុះ១ក្រុមរួមមាន លោកឯក ឆេងហួត ព្រះរាជអាជ្ញារងសាលាដំបូងរាជធានីភ្នំពេញ លោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំ ពេញ លោកឧត្តមសេនីយ៍ត្រី បែន រ័ត្ន ស្នងការរងនគរបាលរាជធានីភ្នំពេញ លោកគិត សុផា អភិបាលខណ្ឌពោធិ៍សែនជ័យ លោកសេង គន្ធ លោកហែម ដារិទ្ធិ អភិបាលរងខណ្ឌ លោកប៊ន សំអាត អធិការប៉ូលិសខណ្ឌ រួមទាំងមន្ត្រីក្រោមវាទ និងមន្ត្រីជំនាញពាក់ព័ន្ធផ្សេងៗទៀត បានបើកប្លុមបេរថយន្តត្រួតពិនិត្យវត្ថុទាំងនោះម្តងទៀត ។ ការពិនិត្យឃើញថា នៅក្នុងរថយន្តនោះមានប្រេងម្រះព្រៅចំនួន៣៤ប៊ីដុង ដែលក្នុង១ប៊ីដុងចំណុះ២៥លីត្រ ទម្ងន់៣៣គីឡូក្រាម និងសារធាតុផ្សំជាច្រើនមុខទៀត ដូចជា កំប៉ុងដែកផ្ទុកជាតិ Sodium Methylate ចំនួន៣៤០កំប៉ុង ដបជ័រផ្ទុកទៅដោយសារធាតុ Heyan ចំនួន២៨ដប ។ ដបផ្ទុកសារធាតុ Isooropyl ចំនួន៣២ដប សារធាតុ Hydrochlorid acide ចំនួន១២ដប សារធាតុ Sulfuric acide ចំនួន៧ដប សារធាតុ Me thanol ចំនួន៣៣ដប ដបជ័រទទេចំនួន១៤៦ដប សារធាតុ Amerphous ចំនួន៦ដប សារធាតុ Sodium hydroxide ចំនួន៣ដប សារធាតុ Sodium Borohydroxide ចំនួន៦ដប និងសារធាតុ Merhylammo niumeh lorid ចំនួន២៤ដប ។
លោកទូច ណារ៉ុថ ស្នងការនគរបាលរាជធានីភ្នំពេញ បានថ្លែងថា ខណ្ឌពោធិ៍សែនជ័យ ជាចំណុចទី១ ដែលបង្ក្រាបបាននូវសារធាតុផ្សំសម្រាប់ផលិតគ្រឿងញៀន និងឈានទៅធ្វើការឆែកឆេរទីតាំងផ្សេងៗជាច្រើនទៀតនៅក្នុងរាជធានីភ្នំពេញ ។ ទន្ទឹមនឹងនេះ សមត្ថកិច្ចមានមោទនភាពយ៉ាងខ្លាំង ព្រោះការបង្ក្រាបនេះចំទីតាំងធំ ហើយនេះគឹជាលើកទី៥ ដែលការផលិតគ្រឿងញៀនដ៏ធំនេះ ត្រូវបានបង្ក្រាប ។ លោកស្នងការបានបន្តថា ជោគជ័យខាងលើគឺ ដោយសារបានការសហការល្អពីប្រជាពលរដ្ឋល្អរបស់យើងដែលបានរាយការណ៍ពីទីតាំងផលិតគ្រឿងញៀននេះ ហើយពេលនេះសមត្ថកិច្ចកំពុងស្រាវជ្រាវរកចាប់បក្សពួកបន្តទៀត ទោះបីជាពួកគេរត់គេចទៅប្រទេសណាក៏ដោយ ប៉ុន្តែយើងមានកិច្ចសហប្រតិបត្តិការល្អជាមួយប្រទេសជិតខាង ដូច្នេះមុខសញ្ញាប្រាកដជាគេចមិនរួចឡើយ ។
នៅខណ្ឌសែនសុខ សមត្ថកិច្ចបានឡោមព័ទ្ធឃ្លាំងមួយជាទីតាំងផលិតគ្រឿងញៀន សមត្ថកិច្ចនគរបាលរាជធានីភ្នំពេញដឹកនាំដោយលោកស្នងការ ទូច ណារ៉ុថ លោកបែន រ័ត្ន ស្នងការរង លោកឃួង ស្រេង អភិបាលខណ្ឌសែនសុខ នៅវេលាម៉ោង១០និង១០នាទីយប់ថ្ងៃទី១ ឧសភា បានធ្វើការឡោមព័ទ្ឋនិងគាស់ទ្វារឃ្លាំងគ្មានលេខមួយកន្លែងស្ថិតនៅតាមបណ្ដោយផ្លូវលេខ២០០៤ ក្នុងភូមិស្លែងរលើងសង្កាត់ទឹកថ្លា ខណ្ឌសែនសុខ ដើម្បីឆែកឆេរ ក្នុងនោះសមត្ថកិច្ចរកឃើញថា ឃ្លាំងនេះជាទីតាំងផលិតគ្រឿងញៀនដ៏ធំមួយដែរ ។ ក្នុងប្រតិបត្ដិការឆែកឆេរដែលប្រើរយៈពេលជាច្រើនម៉ោង សមត្ថកិច្ចបានរកឃើញប្រេងម្រះព្រៅចំនួន៤០ប៊ីដុង អាសេតូន ចំនួន១១ប៊ីដុង ទឹកពណ៌សចំនួន៧ប៊ីដុង ម្សៅក្រាមពណ៌សថ្លា ចំនួន១៥ថង់ HYDRO IODIC Acidចំនួន៩ថង់ម្សៅCAUSTC SO DAFLAKES=៩៩ភាគរយ UNN១៨២៣ ចំនួន១ការុងស ម៉ាស៊ីនក្រឡុក(ម៉ូទ័រ)ចំនួន១គ្រឿង ជីឡាវថ្មីពណ៌សចំនួន៣ ចង្ក្រានខ្សែភ្លើងចំនួន៥ ម៉ាសី HEATING MANTLE ចំនួន១គ្រឿង ដបជ័រជ្រុងម៉ាកAMPRPHOUSPHOSPHORUS ចំនួន១ដប កង្ហារចំនួន២គ្រឿង ម៉ូទ័រម៉ាក Panasonic មានជើងចំនួន១គ្រឿង ម៉ូទ័រម៉ាក Miliore ចំនួន១គ្រឿង ម៉ូទ័រស្វានម៉ាក IKA ចំនួន១គ្រឿង ម៉ូទ័រ GAST-១០២៣V2ចំនួន១គ្រឿង ម៉ូទ័រស្វានបញ្ឈរម៉ាក King Star ចំនួន១គ្រឿង ជញ្ជីងនាឡិកាម៉ាកសាយហ្គនចំនួន១គ្រឿង បំពង់កែវចំនួន១ ម៉ាស៊ីនដាក់ក្នុងកេសឈើទ្រវែងចំនួន១ ប៊ីដុងទទេចំនួន៨ និងសម្ភារផ្សេងៗមួយចំនួនទៀត ។ នេះបើយោងតាមរបាយការណ៍របស់អធិការខណ្ឌសែនសុខ ។
លោកម៉ក់ ហុង អធិការនគរបាលខណ្ឌសែនសុខ បានប្រាប់កោះសន្ដិភាពនៅព្រឹកថ្ងៃទី២ឧសភាថា នៅវេលារសៀលសមត្ថកិច្ច នឹងចូលទៅឆែកឆេរផ្ទះល្វែងមួយកន្លែងទៀតនៅផ្លូវ K4B ទល់មុខស្ថានីយទូរទស្សន៍អាស៊ីអាគ្នេយ៍ក្រោយពីសមត្ថកិច្ចចូលឆែកឆេរម្ដងរួចហើយ ហើយរកឃើញសម្ភារផលិតគ្រឿងញៀន និងម្សៅគ្រឿងញៀនមួយចំនួននិងបានប្លុមបេផ្ទះនេះមួយយប់ថែមទៀត ដើម្បីរឹបអូសយកទៅរក្សាទុកជាវត្ថុតាង ។ ចំពោះសម្ភារផលិតគ្រឿង ញៀនខាងលើ សមត្ថកិច្ចបានប្រមូលយកទៅរក្សាទុកនៅស្នងការដ្ឋានរាជធានីភ្នំពេញទាំងអស់ ។
ប្រភពព័ត៌មានឱ្យដឹងថា ម្ចាស់ទីតាំងឈ្មោះប៉េង ចំរ៉ុង ភេទប្រុស អាយុ៦០ឆ្នាំ់ បានជួលឃ្លាំងនេះកាលពីខែកុម្ភៈ ឆ្នាំ២០១២ ក្នុង១ខែតម្លៃ២.៥០០ដុល្លារ និងកុងត្រា១ឆ្នាំ ដោយអ្នកជួលប្រាប់ថាធ្វើអាជីវកម្មលក់ដូរគ្រឿងសំណង់ ។ នៅរសៀលថ្ងៃដដែល សមត្ថកិច្ចក៏បានធ្វើការឆែកឆេរផ្ទះលេខ១៨GJ ផ្លូវ K4B ក្នុងសង្កាត់ទឹកថ្លា រកឃើញប្រេងម្រះព្រៅ៥៣ប៊ីដុង និងជញ្ជីង២គ្រឿង សរុបប្រេងម្រះព្រៅដែលចាប់រឹបអូសបានក្នុងខណ្ឌសែនសុខមានប្រមាណជាង៩០ប៊ីដុង ។
នៅខណ្ឌចំការមន និងខណ្ឌមានជ័យ ដែលមានទីតាំង៣កន្លែងគ្រោងផលិតគ្រឿងញៀនដែរនោះ ក៏ត្រូវបានឆែកឆេរនៅចន្លោះម៉ោង១១ដល់ម៉ោង១២យប់ផងដែរ ក្នុងថ្ងៃតែមួយ ។ នៅខណ្ឌចំការមនទីតាំង១ ស្ថិតនៅផ្ទះលេខ៤៤២ ផ្លូវលេខ៣១០ សង្កាត់បឹងកេងកងទី២ ត្រូវគេបន្លំភ្នែកបើកក្រុមហ៊ុន KHNT Gold លក់មាសពេជ្រ តែគេដាក់ទូលក់គ្រឿងកាឡៃបំភាន់ភ្នែក និងទីតាំង១ទៀតនៅក្បែរផ្សារសុវណ្ណា ជាកន្លែងស្តុក ។ ចំណែកមួយកន្លែងទៀតនៅខណ្ឌមានជ័យ គឺនៅភូមិដំណាក់ធំ ជិតអង់តែនវិទ្យុ ។
មន្ត្រីផ្លូវការបាននិយាយថា នៅទីតាំងទាំង៧ ដែលបានរកឃើញគឺជាកន្លែងរៀបចំសម្រាប់ការផលិតទាំងអស់ ។ តាមទំហំនៃការបង្ក្រាបនេះបង្ហាញថា គឺជាគម្រោងការដ៏ធំមួយដែលស្មានមិនដល់ ហើយក៏មានទ្រង់ទ្រាយធំជាងក្រុមផលិតគ្រឿងញៀនដែលបានបង្ក្រាបកន្លងមកផងដែរ ៕
ចែករំលែកព័តមាននេះ