ខេត្តកំពង់ឆ្នាំង ៖ បុរសម្នាក់បានរងរបួសធ្ងន់ក្នុងហេតុការណ៍រន្ទះបាញ់មួយដែលបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១ ឧសភា នៅចំណុចជិតខ្ទមស្រែរបស់គាត់ស្ថិតក្នុងភូមិដំណាក់ខ្លុង ឃុំក្រាំងស្គា ស្រុកទឹកផុស ខណៈដែលបុរសរងគ្រោះកំពុងស្ថិតនៅលើចុងត្នោតត្រូវរន្ទះបាញ់ចុងត្នោតឆេះទាំងមនុស្ស ស្លឹក និងធាងត្នោតធ្លាក់មកដីកម្ពស់ជាង១០ម៉ែត្រ ។
ស្រ្តីជាប្រពន្ធជនរងគ្រោះឈ្មោះសោម អ៊ុន អាយុ៤០ឆ្នាំ បានរៀបរាប់ថា ប្តីគាត់ដែលរងគ្រោះដោយរន្ទះបាញ់នេះឈ្មោះផៃ អេង អាយុ៤៧ឆ្នាំ ។ គ្រួសារគាត់មានកូន២នាក់និងមានទីលំនៅក្នុងភូមិ-ឃុំជិតកន្លែងកើតហេតុ ហើយជារៀងរាល់ថ្ងៃប្តីគាត់តែងឡើងត្នោតយកទឹកមករម្ងាស់ស្ករចំនួន២០ដើម ។ នៅថ្ងៃកើតហេតុ ប្តីគាត់បានឡើងត្នោតជិតរួចទៅហើយគឺឡើងបាន១៨ដើមនៅសល់២ដើមទៀត ស្រាប់តែមេឃងងឹតរកកលភ្លៀងប៉ុន្តែប្តីគាត់ថាមិនភ្លៀងទេ សល់២ដើមទៀតឡើងឱ្យហើយមុនធ្លាក់ភ្លៀង។ ពេលនោះប្តីគាត់កំពុងស្ថិតនៅលើចុងត្នោតដែលមានចម្ងាយពីខ្ទមស្រែប្រមាណ៣០០ម៉ែត្រស្រាប់តែរន្ទះបាញ់ចុងត្នោតដែលប្តីគាត់កំពុងនៅឆេះចុងត្នោតនិងឆេះទាំងប្តីគាត់ធ្លាក់មកដីដែលមានកម្ពស់ជាង១០ម៉ែត្រ បណ្តាលឲ្យរងរបួសធ្ងន់ ត្រូវដឹកយកទៅមន្ទីរពេទ្យខេត្តជាបន្ទាន់ ។
នៅមន្ទីរពេទ្យគេឃើញជនរងគ្រោះរលាកពេញមួយកំណាត់ចង្កេះចុះក្រោម និងគ្រាំគ្រាពេញខ្លួនកំពុងស្ថិតក្នុងការសង្គ្រោះបន្ទាន់ ៕
ចែករំលែកព័តមាននេះ