រាជធានីភ្នំពេញ ៖ សាកលវិទ្យាល័យមេគង្គកម្ពុជា បានសហការជាមួយគណៈកម្មាធិការសិទ្ធិមនុស្សកម្ពុជារៀបចំពិធីអប់រំផ្សព្វផ្សាយសិទ្ធិមនុស្ស និងការចូលរួមផ្តល់មតិលើសេចក្តីព្រាងនៃសេចក្តីថ្លែងការណ៍សិទ្ធិមនុស្សអាស៊ានកាលពីថ្ងៃទី២ ឧសភា នៅសណ្ឋាគារភ្នំពេញ ក្រោមអធិបតីភាពលោកឱម យ៉ិនទៀង ប្រធានគណៈកម្មាធិការសិទ្ធិមនុស្សកម្ពុជា ។
កិច្ចប្រជុំផ្សព្វផ្សាយនេះ មាននិស្សិត និងសាស្ត្រាចារ្យចូលរួមចំនួនជាង៥០០នាក់ ដែលមកពីបណ្តាសាកលវិទ្យាល័យមួយចំនួនក្នុងរាជធានីភ្នំពេញ។
លោកអ៊ិច សេង សាកលវិទ្យាធិការ សាកលវិទ្យាល័យមេគង្គកម្ពុជាថ្លែងថា កន្លងមកសាកលវិទ្យាល័យមេគង្គបានសហការជាមួយគណៈកម្មាធិការសិទ្ធិមនុស្សកម្ពុជាពិនិត្យស្ថានភាពសិទ្ធិមនុស្សនៅតាមពន្ធនាគារនានាទូទាំងព្រះរាជាណាចក្រកម្ពុជាដើម្បីអប់រំផ្សព្វផ្សាយអំពីសិទ្ធិមនុស្សជាមូលដ្ឋាន ហើយកិច្ចការនេះក៏បានបន្តធ្វើនៅតាមវិទ្យាល័យនានា សាលាគរុកោសល្យភូមិភាគ និងមន្ទីរអប់រំតាមរាជធានីខេត្ត-ក្រុង ។
លោកអ៊ិច សេង បញ្ជាក់ថា មានតែសាកលវិទ្យាល័យមេគង្គមួយទេ ដែលបានបើកវគ្គបណ្តុះបណ្តាលថ្នាក់បរិញ្ញាប័ត្រជាន់ខ្ពស់ជំនាញសិទ្ធិមនុស្សក្រោមកិច្ចសហការជាមួយសាកលវិទ្យាល័យ Southerm Cross ប្រទេសអូស្ត្រាលី ហើយកិច្ចប្រជុំជាច្រើនស្តីពីបញ្ហាសិទ្ធិមនុស្សត្រូវបានរៀបចំធ្វើឡើងជាបន្តបន្ទាប់ ។
ជំនួបធំលើកទីមួយធ្វើឡើងនៅថ្ងៃទី១៥ ខែមីនា ឆ្នាំ២០១២ ដែលមានកិច្ចសហការរៀបចំធ្វើដោយវិទ្យាស្ថានខ្មែរសម្រាប់សហប្រតិបត្តិការ និងសន្តិភាព (CICP) ជាមួយស្ថានីយទូរទស្សន៍អាស៊ីអាគ្នេយ៍ នៅសាកលវិទ្យាល័យកម្ពុជា ។ ជំនួបលើកទីមួយនេះ មានអ្នកចូលរួមមកពីអង្គការសង្គមស៊ីវិល និងយុវជនកម្ពុជាប្រមាណជិត២.០០០នាក់ ។ ការចែករំលែកព័ត៌មានទីពីរ គឺនៅក្នុងសន្និសីទសង្គមស៊ីវិល និងវេទិកាប្រជាជនអាស៊ាន ថ្ងៃទី២៨-២៩-៣០ មីនា នៅសាលសន្និសីទចតុមុខ ដែលមានការចូលរួមពីក្រុមអង្គការសង្គមស៊ីវិល និងប្រជាជនចំនួនជាង១.០០០នាក់ មកពីប្រទេសជាសមាជិកអាស៊ានទាំង១០ ។
កិច្ចប្រជុំលើកនេះមានគោលបំណងសំខាន់ៗចំនួន៣គឺ ១- អប់រំផ្សព្វផ្សាយសិទ្ធិមនុស្សដល់ស្រទាប់យុវជនកម្ពុជា ២-ចែករំលែកព័ត៌មានអំពីការវិវឌ្ឍនៃកិច្ចការសិទ្ធិមនុស្សអាស៊ាន ជាពិសេសក្នុងឆ្នាំ២០១២ ដែលកម្ពុជាជាប្រធានអាស៊ាន និង៣-ប្រមូលមតិយោបល់ពីអ្នកពាក់ព័ន្ធលើការរៀបចំព្រាងសេចក្តីថ្លែងការណ៍សិទ្ធិមនុស្សអាស៊ាន ។
ចំណុចដែលទាក់ទាញការចាប់អារម្មណ៍ខ្លាំងក្នុងកិច្ចប្រជុំលើកនេះមានជាអាទិ៍ ១-តុល្យភាពរវាងសិទ្ធិ និងកាតព្វកិច្ច ២-ដំណើរការនៃការរៀបចំសេចក្តីថ្លែងការណ៍សិទ្ធិមនុស្សអាស៊ាន ៣-ការបកស្រាយរបស់គណៈកម្មាធិការសិទ្ធិមនុស្សកម្ពុជាលើករណីមួយចំនួនដែលរងការចោទប្រកាន់ថា មានការរំលោភសិទ្ធិមនុស្ស ៕
ចែករំលែកព័តមាននេះ