ខេត្តកណ្តាល ៖ យុវនារីម្នាក់បានរងរបួសបាក់ស្មងជើងខាងឆ្វេង ហើយត្រូវបានគេបញ្ជូនទៅសង្គ្រោះនៅមន្ទីរពេទ្យកាល់ម៉ែត ឯរាជធានីភ្នំពេញ ដោយសារគ្រោះថ្នាក់ម៉ូតូបុកគ្នា កាលពីវេលាម៉ោង១និង១០នាទីរសៀលថ្ងៃទី២ ឧសភា នៅតាមបណ្តោយផ្លូវលេខ២១ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ។
នារីរងគ្រោះដែលរងរបួសបាក់ស្មងជើងត្រូវបានគេស្គាល់ថាឈ្មោះ គឹម ប៉ាក់ឡុង អាយុ១៩ឆ្នាំ ជាសិស្ស មានទីលំនៅក្នុងឃុំកោះអន្លង់ចិន ស្រុកស្អាង ជាអ្នកបើកបរម៉ូតូម៉ាកអាយខនពណ៌លឿងលាយខ្មៅ ។ ចំណែកម៉ូតូ១គ្រឿងទៀតម៉ាកគុបមូលសេ៥០ ពណ៌ទឹកប៊ិច បើកបរដោយយុវជនម្នាក់ឈ្មោះ ម៉ៅ កុសល្យ អាយុ២០ឆ្នាំ មានទីលំនៅភូមិកោះខែល ឃុំកោះខែល ស្រុកស្អាង ជាអ្នកលក់កាសែត រងរបួសស្រាល ។
បើតាមសាក្សីឃើញហេតុការណ៍បានឱ្យដឹងថា មុនដំបូងគេឃើញអ្នកបើកម៉ូតូគុបមូលចូលចាក់សាំងនៅកន្លែងដេប៉ូសាំង បន្ទាប់ពីចាក់សាំងរួចហើយ បានបើកម៉ូតូចេញតាមផ្លូវលេខ២១ ពីជើងទៅត្បូង ។ ខណៈពេលបើកឆ្លងផ្លូវចេញទៅខាងស្តាំដៃរបស់ខ្លួន ស្រាប់តែមានម៉ូតូម៉ាកអាយខនមួយគ្រឿងបើកបញ្ច្រាសទិសគ្នាមកបុកជាមួយម៉ូតូគុបចំពីមុខពេញទំហឹង បណ្តាលឱ្យម៉ូតូទាំង២គ្រឿងដួលបែកបាក់ខូចខាតមួយចំនួន រីឯនារីម្នាក់ដែលបើកម៉ូតូអាយខនបានរងរបួសបាក់ស្មងជើងខាងឆ្វេងត្រូវគេបញ្ជូនទៅសង្គ្រោះនៅមន្ទីរពេទ្យកាល់ម៉ែត ឯរាជធានីភ្នំពេញ ។ ម៉ូតូទាំង២គ្រឿង ត្រូវបានប៉ូលិសយកមករក្សាទុកនៅអធិការដ្ឋានក្រុងតាខ្មៅ ៕
ចែករំលែកព័តមាននេះ