ខេត្តប៉ៃលិន ៖ អ្នករត់ម៉ូតូឌុបម្នាក់ត្រូវជនមិនស្គាល់អត្តសញ្ញាណប្រើល្បិចឱ្យឌុបដើររកមើលដីអស់រយៈពេល២ថ្ងៃ បន្ទាប់មកចោរនោះឱ្យជនរងគ្រោះទៅមើលដីដែលគេថា បានទិញនៅផ្លូវឡើងទៅទឹកធ្លាក់ភ្នំខៀវ ។ ដោយចាញ់កលល្បិចចោរឱ្យផឹកស្រាបៀរដែលមានជាតិថ្នាំសណ្តំ ធ្វើឱ្យម្ចាស់ម៉ូតូវង្វេងស្មារតីនិយាយមិនកើត រួចចោរយកម៉ូតូម៉ាកឌ្រីម សេ១២៥ ស៊េរី២០១១ ដែលទើបទិញបានរយៈពេល៤ថ្ងៃទៅបាត់ ។
ម្ចាស់ម៉ូតូឈ្មោះមុំ នឿន ហៅតាដំបងគ្រញូង អាយុ៥១ឆ្នាំ ជាអ្នករត់ម៉ូតូឌុប ប្រពន្ធឈ្មោះឡាយ ហៀង អាយុ៣១ឆ្នាំ ជាអ្នកលក់ខោអាវនៅផ្សារសាមគ្គី(ប៉ាហ៊ី) រស់នៅភូមិអូរតាពុកលើ សង្កាត់ទួលល្វា ក្រុងប៉ៃលិន ។ ហេតុការណ៍នេះកើតឡើងកាលពីវេលាម៉ោង៣និង៥១នាទីរសៀល ថ្ងៃទី១ ឧសភា ២០១២ នៅផ្លូវឡើងទៅទឹកធ្លាក់ភ្នំខៀវ សង្កាត់អូរតាវ៉ៅ ក្រុងប៉ៃលិន ។
ស្ត្រីជាប្រពន្ធឱ្យដឹងថា នៅមុនថ្ងៃកើតហេតុប្តីរបស់នាងឌុបបុរសម្នាក់មិនស្គាល់អត្តសញ្ញាណមានអាយុប្រមាណ២០ឆ្នាំ ពាក់អាវស ខោស សក់វែង និងស្វិតដៃខាងឆ្វេង ។ ជននោះជួលឱ្យប្តីនាងឌុបទៅលេងនៅកាស៊ីណូផ្សារព្រំ រហូតដល់ម៉ោង៩យប់ថ្ងៃដដែលទើបត្រឡប់មកវិញ ។ លុះព្រឹកឡើងថ្ងៃទី១ ឧសភា បុរសរូបនោះទូរស័ព្ទឱ្យប្តីនាងដែលតែងតែឈរចាំដឹកម៉ូយនៅក្បែរផ្សារឱ្យឌុបទៅមើលដីមួយកន្លែងដែលគេទិញនៅម្តុំទឹកធ្លាក់ភ្នំខៀវ ។ ពេលប្តីរបស់នាងឌុបទៅដល់គោលដៅ ស្រាប់តែជនល្មើសល្បួងឱ្យផឹកស្រាបៀរដែលដាក់ថ្នាំសណ្តំ ។ ប្តីរបស់នាងវង្វេងវង្វាន់ស្មារតី និយាយមិនរួច ត្រូវជននោះយកម៉ូតូជិះទៅបាត់ស្រមោល ។
ស្ត្រីដដែលបន្តទៀតថា ក្រោយពីជិះម៉ូតូយកទៅបាត់ប្តីរបស់នាងបានដឹងខ្លួនមួយភាំងៗក៏ខំប្រឹងដើរចុះមកក្រោម ។ ពេលដល់កន្លែងអ្នកយាមផ្លូវនៅរមណីយដ្ឋានទឹកធ្លាក់ភ្នំខៀវ ឃើញប្តីរបស់នាងមានសភាពមិនប្រក្រតីគេក៏ទូរស័ព្ទហៅសមត្ថកិច្ចឱ្យទៅដឹកយកទៅបន្សាបជាតិថ្នាំនៅមន្ទីរពេទ្យបង្អែកខេត្ត ។
គ្រូពេទ្យបានចាក់ថ្នាំបន្សាបរួចហើយ តែប្តីនាងនៅតែមិនទាន់ធូរស្រាល ប្រហែលជាជនល្មើសដាក់ថ្នាំសណ្តំលាយជាមួយថ្នាំពុលអ្វីម៉្យាង ។ នាងបានបញ្ជូនប្តីទៅព្យាបាលបន្តនៅមន្ទីរពេទ្យខេត្តបាត់ដំបង ។អ្នករត់ម៉ូតូឌុបនិយាយថា ចាត់ទុកជាសំណាងខ្លាំងណាស់ដែលជនរងគ្រោះមិនត្រូវចោរសម្លាប់ដោយគ្រាន់តែដាក់ថ្នាំសណ្តំរួចយកម៉ូតូទៅបាត់ ព្រោះនៅផ្លូវឡើងទៅទឹកធ្លាក់ភ្នំខៀវឆ្ងាយពីភូមិប្រហែល៥គីឡូម៉ែត្រ ហើយស្ងាត់ខ្លាំងណាស់មិនសូវមានមនុស្សម្នាទៅមកទេ។ បុរសនោះបើចោរសម្លាប់ក៏ពិបាករកសាកសពឃើញដែរ ។
នៅល្ងាចថ្ងៃដដែលនាយប៉ុស្តិ៍រដ្ឋបាលសង្កាត់អូរតាវ៉ៅបានទទួលពាក្យបណ្តឹងពីស្ត្រីជាប្រពន្ធជនរងគ្រោះ ហើយប្រាប់ឱ្យក្រុមសមត្ថកិច្ចនៅតាមដងផ្លូវរង់ចាំស្ទាក់ចោរ និងពិនិត្យមើលម៉ូតូដែលមានភិនភាគដូចម្ចាស់រាយការណ៍ ដើម្បីចាប់ចោរយកទៅផ្តន្ទាទោសតាមច្បាប់ ៕
ចែករំលែកព័តមាននេះ