រាជធានីភ្នំពេញ ៖ កម្មកររាប់ពាន់នាក់មកពីរោងចក្រនានាក្នុងនិងក្រៅរាជធានីភ្នំពេញ បានជួបជុំគ្នាហែក្បួនតាមការគ្រោងទុកចេញដំណើរពីវត្តភ្នំទៅកាន់រដ្ឋសភា ដើម្បីដាក់ញតិ្តស្នើដល់រដ្ឋសភាជំរុញរដ្ឋាភិបាល ធ្វើយ៉ាងណាឱ្យមានការគោរពច្បាប់ការងារ និងលើកកម្ពស់ជីវភាពកម្មករនិយោជិត ក៏ដូចជាប្រជាពលរដ្ឋទូទៅ ។
លោកជា មុនី ប្រធានសហជីពសេរីកម្មករនៃ ព្រះរាជាណាចក្រកម្ពុជាចេញសេចក្តីថ្លែងការណ៍អបអរសាទរថ្ងៃទី១ ឧសភា ទិវាពលកម្មកម្មអន្តរជាតិឆ្នាំ២០១២ ដោយបានលើកឡើងថា ក្នុងគម្រប់ខួបលើកទី១២៦ ទិវាពលកម្មអន្តរជាតិឆ្នាំ២០១២នេះ មានគោលបំណងធ្វើឱ្យល្អប្រសើរឡើងនូវលក្ខខណ្ឌការងារ និងលើកតម្កើងកម្រិតជីវភាពរបស់កម្មករនិយោជិត ក៏ដូចជាប្រជាពលរដ្ឋទូទៅ ។ ខណៈពេលព្រឹត្តិការណ៍ពិភពលោកប្រារព្ធខួបលើកទី១២៦នៃទិវាពលកម្មអន្តរជាតិ១ឧសភា នៅថ្ងៃទី១ ឧសភា ឆ្នាំ២០១២ លោកជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា បានចេញសេចក្តីថ្លែងការណ៍មួយច្បាប់ដែលបានលើកឡើងនូវសំណើ៩ចំណុចក្នុងគោលបំណងធ្វើឱ្យល្អប្រសើរឡើងនូវលក្ខខណ្ឌការងារ និងលើកកម្ពស់កម្រិតជីវភាពរបស់កម្មករ និងប្រជាពលរដ្ឋទូទៅ ។
សេចក្តីថ្លែងការណ៍បានអះអាងថា អស់រយៈលោកជាច្រើនឆ្នាំមកហើយ អង្គការសហជីព សហគមន៍ និងបងប្អូនកម្មករនិយោជិតបានចូលរួមចំណែកយ៉ាងសកម្មក្នុងការខិតខំលើកកម្ពស់ជំនាញការងារ និងគោរពច្បាប់ ដើម្បីបង្កើនផលិតផលការងារ និងគុណភាពផលិតផលសំដៅបម្រើដល់ការប្រជែងលើទីផ្សារ និងរក្សាស្ថិរភាពដំណើរការរបស់រោងចក្រ សហគ្រាស ។ លទ្ធផលនៃការខិតខំរបស់សហជីព សមាគម ព្រមទាំងបងប្អូនកម្មករនិយោជិត គឺបានជាប្រយោជន៍ផ្ទាល់របស់កម្មករនិយោជិត និងជាផលប្រយោជន៍សង្គម និងប្រជាជាតិទាំងមូល ។
សេចក្តីថ្លែងការណ៍បានបន្តថា នៅក្នុងឱកាសប្រារព្ធពិធីអបអរសាទរទិវាពលកម្មអន្តរជាតិខួបលើកទី១២៦នេះ សហជីពសេរីកម្មករនៃព្រះរាជាណាចក្រកម្ពុជា សូមលើកសំណើមួយចំនួនគោរពជូនថ្នាក់ដឹកនាំនៃស្ថាប័នរដ្ឋ រួមមានព្រឹទ្ធសភា រដ្ឋសភា រាជរដ្ឋាភិបាល តុលាការ នៃព្រះរាជាណាចក្រកម្ពុជា និងសមាគមនិយោជក ដើម្បីបានពិចារណាយកចិត្តទុកដាក់គិតគូរ និងដោះស្រាយដូចខាងក្រោម ៖
១-ជំរុញការបង្កើតការងារមួយដែលមានឯករាជ្យភាព និងមានសមត្ថភាពវិជ្ជាជីវៈឱ្យបានឆាប់រហ័ស ដើម្បីដោះស្រាយវិវាទការងារ ព្រោះអស់រយៈពេលជាង១៥ឆ្នាំហើយ តុលាការការឯកទេសនេះមិនទាន់បង្កើតឡើងឱ្យស្របតាមច្បាប់ស្តីពីការងារនៃព្រះរាជាណាចក្រកម្ពុជានៅឡើយ ។
២-បញ្ឈប់ការរើសអើងគ្រប់រូបភាពចំពោះសិទ្ធិ សេរីភាពសហជីព និងសមាគម ។
៣-ដំឡើងប្រាក់សម្រាប់ការធ្វើដំណើររបស់កម្មករនិយោជិត ឱ្យបានឡើងដល់់ចំនួន១០ដុល្លារអាមេរិកក្នុង១ខែ ក្នុងម្នាក់ ។
៤-កំណត់ឱ្យមានការផ្តល់ប្រាក់ខែសម្រាប់ការស្នាក់នៅរបស់កម្មករនិយោជិតបានចំនួន១០ដុល្លារអាមេរិកក្នុង១ខែក្នុងម្នាក់ ។
៥-បង្កើតការយកចិត្តទុកដាក់គ្រប់គ្រងទីផ្សារជួយឱ្យជីវភាពរស់នៅរបស់កម្មករនិយោជិត ក៏ដូចជាប្រជាពលរដ្ឋទូទៅមានកម្រិតសមរម្យ ស្របតាមបញ្ញត្តិមាត្រា៦៣ នៃរដ្ឋធម្មនុញ្ញព្រះរាជាណាចក្រកម្ពុជា រួមមានជាអាទិ៍ បញ្ចុះតម្លៃប្រេងសាំង និងទប់ស្កាត់ការហក់ឡើងនៃថ្លៃទំនិញសព្វសារពើក្នុងកម្រិតហួសហេតុនៅលើទីផ្សារ ។
៦-លុបបំបាត់អំពើពុករលួយ និងការប្រើប្រាស់កម្លាំងពលកម្មលើកុមារ ។
៧-លុបបំបាត់ការបញ្ឈប់ ឬការព្យួរការងារតំណាងកម្មករនិយោជិតដោយខុសច្បាប់ និងពង្រឹងការអនុវត្តច្បាប់ស្តីពីការងារល្អប្រសើរ ។
៨-បញ្ឈប់ការប្រើប្រាស់អំពើហិង្សាតាមគ្រប់រូបភាពទៅលើកម្មករនិយោជិត ដើម្បីពង្រឹងនីតិរដ្ឋពិតប្រាកដនៅកម្ពុជា ។
៩-ជំរុញការស្រាវជ្រាវសើុបអង្កេត វែកមុខឃាតករដែលបាញ់សម្លាប់លោកជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជា យកផ្តន្ទាទោសតាមច្បាប់ដើម្បីលុបបំបាត់វប្បធម៌នីទណ្ឌភាពនៅកម្ពុជា ។
ទោះបីជាយ៉ាងណា សហជីពសេរីកម្មកររបស់លោក ជា មុនី ក្នុងទិវាពលកម្មអន្តរជាតិថ្ងៃទី១ ឧសភា នៅឆ្នាំនេះមិនបានជួបជុំ ហែក្បួនកម្មករដូចរៀងរាល់ឆ្នាំឡើយ ។ សហជីពកម្មកររបស់លោកជា មុនី ប្តូរយុទ្ធសាស្ត្រពីការស្រែកទាមទារនៅតាមដងផ្លូវ មកជាយុទ្ធសាស្ត្រការទូតតាមយៈចេញសេចក្តីថ្លែងការណ៍ ។ នៅរាជធានីភ្នំពេញ នាព្រឹកថ្ងៃទី១ ឧសភា សហជីពកម្មករមានសមាជិកប្រមាណ៤.០០០នាក់ បានជួបជុំដើរហែក្បួនលើកបដា និងថ្លែងការណ៍មុននឹងដាក់ញត្តិទៅកាន់រដ្ឋសភា ដូចរៀងរាល់ឆ្នាំ ដើម្បីសាទរទិវាពលកម្មអន្តរជាតិថ្ងៃទី១ ឧសភា ខួបលើកទី១២៦ នេះ ។
ក្រុមកម្មករបានចាកចេញពីមុខរដ្ឋសភា នៅវេលាម៉ោង១និង៣០នាទីរសៀលថ្ងៃទី១ ឧសភា ហើយក្រុមមួយថ្មីមកពីបឹងកក់បានបន្តជួបជុំគ្នានៅមុខរដ្ឋសភាដើម្បីតវ៉ាដែរ ៕
ចែករំលែកព័តមាននេះ