ខេត្តកែប ៖ កាលពីថ្ងៃទី២៩ ខែមេសា ឆ្នាំ២០១២ លោកចម បូរិទ្ធ ប្រធានក្រុមការងារចុះជួយឃុំអង្កោល និងជាតំណាងលោកទេសរដ្ឋមន្ត្រី ចម ប្រសិទ្ធ ប្រធានក្រុមការងារគណៈកម្មាធិការកណ្តាលចុះជួយខេត្តកែប និងលោកប្រធានក្រុមការងារចុះជួយភូមិទួលសាងាំ រួមដំណើរដោយមន្ត្រីក្រុមការងារជាច្រើនរូបទៀត បានអញ្ជើញជួបសំណេះសំណាលជាមួយសមាជិក-សមាជិកាបក្ស និងដើម្បីត្រួតពិនិត្យបញ្ជីបច្ចុប្បន្នភាពសមាជិកគណបក្សប្រជាជនកម្ពុជានៅភូមិទួលសាងាំ ឃុំអង្កោល ស្រុកដំណាក់ចង្អើរ ។
បន្ទាប់ពី លោក ទិន បេន អនុប្រធានគណៈកម្មាធិការបក្សឃុំអង្កោលរាយការណ៍អំពីលទ្ធផលការងារដែលគណបក្សឃុំសម្រេចបានកន្លងមក និងរបាយការណ៍ស្តីពីផែនការរួមឆ្ពោះទៅកាន់ការបោះឆ្នោតក្រុមប្រឹក្សាឃុំ-សង្កាត់អាណត្តិទី៣ របស់គណបក្សប្រជាជនកម្ពុជាឃុំអង្កោល រួចមក លោក ចម បូរិទ្ធ និងលោក ហេង ណន បានវាយតម្លៃខ្ពស់ចំពោះសមាជិក-សមាជិកាបក្សទាំងអស់ដែលបានខិតខំបំពេញការងារនៅក្នុងមូលដ្ឋានបានល្អប្រសើរ និងដណ្តើមបានជោគជ័យជាបន្តបន្ទាប់ក្នុងការបោះឆ្នោតកន្លងមក ។
លោកសង្ឃឹមជឿជាក់ថា ឃុំអង្កោលពិតជាបន្តដណ្តើមបានជោគជ័យក្នុងពេលបោះឆ្នោតក្រុមប្រឹក្សាឃុំ-សង្កាត់ អាណត្តិទី៣ ដែលនឹងប្រព្រឹត្តទៅនៅថ្ងៃទី៣ ខែមិថុនា ឆ្នាំ២០១២ និងការបោះឆ្នោតជ្រើសតាំងតំណាងរាស្ត្រនីតិកាលទី៥ នាឆ្នាំ២០១៣ ខាងមុខ ដើម្បីបន្តការគាំទ្របេក្ខភាពសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា សម្រាប់អាណត្តិទី៥និងអាណត្តិក្រោយៗទៀត ។
លោក ហេង ណន បានក្រើនរំលឹកដល់សមាជិក-សមាជិកាបក្សទាំងអស់ ត្រូវបន្ត និងត្រូវត្រៀមលក្ខណៈឱ្យបានគ្រប់គ្រាន់ដើម្បីចូលរួមក្នុងយុទ្ធនាការឃោសនាបោះឆ្នោត និងនាំគ្នាទៅបោះឆ្នោតជូនគណបក្សប្រជាជនកម្ពុជា ឱ្យបានគ្រប់ៗគ្នាដើម្បីបន្តការងារដឹកនាំ កសាង និងអភិវឌ្ឍន៍ប្រទេសកម្ពុជា ឱ្យកាន់តែមានការរីកចម្រើនជាបន្តទៀត ។
ក្នុងឱកាសនោះ លោក ចម បូរិទ្ធ និងលោក ហេង ណន បាននាំយកអំណោយអនុស្សាវរីយ៍របស់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់សមាជិក-សមាជិកាដែលបានចូលរួមចំនួន៧០០នាក់ ក្នុងម្នាក់ៗទទួលបានសារុង១, អាវយឺត១, មួក១ និងឧបត្ថម្ភគណៈកម្មាធិការបក្សឃុំអង្កោល ថវិកាចំនួន៨០ម៉ឺនរៀល ៕
ចែករំលែកព័តមាននេះ