ក្រុងប៉ោយប៉ែត ៖ ជនសង្ស័យប្រុស-ស្រី៣នាក់ ត្រូវកម្លាំងប៉េអឹមក្រុងឃាត់ខ្លួននឹងឆែកឆេរបន្ទប់ជួល កាលពីវេលាម៉ោងជិត៥ល្ងាចថ្ងៃទី១ ឧសភា នៅភូមិប្រជាធម្មខាងលិច សង្កាត់ប៉ោយប៉ែត ពីបទសង្ស័យចែកចាយថ្នាំញៀន ។
ជនសង្ស័យទាំង៣នាក់ ១- ឈ្មោះ លី ឆៃយ៉ា ភេទប្រុស អាយុ២៨ឆ្នាំ ជាអ្នករត់ម៉ូតូឌុប ស្នាក់នៅក្នុងភូមិកើតហេតុ ២- ឈ្មោះ ឈុំ ឆានិន អាយុ២៧ឆ្នាំ ជាប្រពន្ធ និង៣- ឈ្មោះ ប៉ិច សុគន្ធា អាយុ២៩ឆ្នាំ ជាជាងកាត់ដេរ ស្នាក់នៅក្នុងភូមិកើតហេតុ ។ ជាមួយការឃាត់ខ្លួននិងឆែកឆេរបន្ទប់ជួលជនសង្ស័យទាំង៣ខាងលើសមត្ថកិច្ចបានរកឃើញថ្នាំញៀនប្រភេទម៉ាទឹកកកចំនួន២កូនថង់នៅជាប់ខ្លួន និងក្នុងបន្ទប់ជួលរបស់ប្តីប្រពន្ធ រួមទាំងថង់សម្រាប់វេចខ្ចប់មួយចំនួនផងដែរ ។ ឯក្នុងបន្ទប់ជួលរបស់ឈ្មោះ ប៉ិច សុគន្ធា ខណៈធ្វើការឆែកឆេរពុំបានរកឃើញវត្ថុតាងអ្វីទេ ប៉ុន្តែដោយសារមានការពាក់ព័ន្ធជាមួយជនសង្ស័យប្តីប្រពន្ធខាងលើ ទើបកម្លាំងប៉េអឹមធ្វើការឃាត់ខ្លួន ។
ក្នុងអំឡុងនៃការឆែកឆេរខាងលើ គេឃើញវត្តមានអាជ្ញាធរភូមិ ក្នុងនោះមានទាំងប៉ូលិសប៉ុស្តិ៍សង្កាត់ប៉ោយប៉ែតផងដែរ ។ ក្រៅពី
ជនសង្ស័យ និងវត្ថុតាងជាថ្នាំញៀនព្រមទាំងឧបករណ៍សម្រាប់សេព ថង់សម្រាប់វេចខ្ចប់កម្លាំងប៉េអឹមក៏បាននាំយកម៉ូតូធុនសេ១២៥មួយគ្រឿងពីកន្លែងកើតហេតុទៅទុកនៅទីបញ្ជាការប៉េអឹមក្រុង ។
លោកហម ម៉ុត មេបញ្ជាការប៉េអឹមក្រុងប៉ោយប៉ែត បានប្រាប់ថា ជនសង្ស័យទាំង៣ មានជាប់ពាក់ព័ន្ធក្នុងករណីចែកចាយថ្នាំញៀន ហើយក្រោយការសួរនាំ និងធ្វើកំណត់ហេតុពួកគេត្រូវបានបញ្ជូនទៅទីបញ្ជាការប៉េអឹមខេត្តដើម្បីចាត់ការតាមនីតិវិធី ៕
ចែករំលែកព័តមាននេះ