ខេត្តកំពង់ឆ្នាំង ៖ លោកឧបនាយករដ្ឋមន្ត្រីយឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ កាលពីព្រឹកថ្ងៃទី៣០ ខែមេសា បានអញ្ជើញជាអធិបតីភាពក្នុងពិធីប្រគល់ដែនឡូត៍នេសាទជូនទៅសហគមន៍នេសាទគ្រប់គ្រង និងដាំកូនឈើព្រៃលិចទឹក ។ ពិធីនេះបានប្រព្រឹត្តធ្វើនៅក្នុងបរិវេណវត្តកំពង់អុស ភូមិកំពង់អុសឃុំកំពង់អុស ស្រុកជលគិរី ដោយមានការអញ្ជើញចូលរួមពីលោកទូច ម៉ារីម អភិបាលខេត្តកំពង់ឆ្នាំង លោកណៅ ធួក ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល មន្ត្រីអ្នកមុខអ្នកការជាច្រើនរូប ប្រជាពលរដ្ឋ និងសិស្សានុសិស្សយ៉ាងច្រើនកុះករ ។
លោកទូច ម៉ារីម មានប្រសាសន៍ថា រាជរដ្ឋាភិបាលបានលុបឡូត៍ទាំងអស់នៅជុំវិញបឹងទន្លេសាប ។ ដោយឡែកនៅខេត្តកំពង់ឆ្នាំងមានឡូត៍ចំនួន១២ត្រូវបានលុបផងដែរ ដែលឡូត៍ទាំងនោះមានជាង៤៥ពាន់ហិកតា ។ ឡូត៍នេសាទដែលបានកាត់ចេញ គឺ៧៨ភាគរយបានប្រគល់ជូនប្រជាពលរដ្ឋនេសាទជាលក្ខណៈគ្រួសារ និង២២ភាគរយត្រូវបានដាក់បញ្ចូលជាដែនអភិរក្សធនធានជលផល ។ ក្នុងរយៈពេល៣ខែកន្លងទៅ គឹបានបង្ក្រាបបទល្មើសនេសាទចំនួន១៧៨ករណី ។
លោកណៅ ធួក បានមានប្រសាសន៍ថា ដើម្បីធានានិរន្តរភាពពូជមច្ឆជាតិ យើងបានរក្សាទុកដែនឡូត៍នេសាទមួយចំនួនជាតំបន់ដែនអភិរក្សធនធានជលផល ហើយក្នុងនោះឡូត៍នេសាទមួយចំនួនត្រូវបានប្រគល់ជូនប្រជាពលរដ្ឋ ប៉ុន្តែការនេសាទរបស់បងប្អូនត្រូវនេសាទតាមច្បាប់ដែលបានកំណត់ ដូចមានចែកក្នុងប្រកាសលេខ១២៩ របស់ ក្រសួងកសិកម្ម ។ បងប្អូនមិនត្រូវនេសាទល្មើសច្បាប់ដូចជា ប្រើឧបករណ៍ឆក់ អួនស្បៃមុង ឬអួនក្រឡាញឹកឡើយ និងមិនត្រូវកាប់បំផ្លាញព្រៃលិចទឹកដែលជាជម្រកដ៏មានសារសំខាន់សម្រាប់ត្រីពងកូននោះទេ ។ ដូចថ្ងៃនេះ យើងនាំគ្នាដាំព្រៃលិចទឹក គឺជាការបំផុសដល់ក្មួយៗឱ្យចេះស្រឡាញ់ និងការពារព្រៃលិចទឹកតទៅថ្ងៃមុខ ។
លោកឧបនាយករដ្ឋមន្ត្រីយឹម ឆៃលី បានមានប្រសាសន៍ផ្តាំផ្ញើដល់សហគមន៍នេសាទដែលបានឡូត៍នេសាទ ត្រូវខិតខំការពារក្នុងដែនឡូត៍របស់ខ្លួនឱ្យបានល្អប្រសើរ មិនត្រូវឱ្យមានបទល្មើសនេសាទកើតឡើងក្នុងដែនរបស់ខ្លួនគ្រប់គ្រងឡើយ ។ ពីដើមម្ចាស់ឡូត៍នេសាទគេការពារបាន ដូច្នេះយើងក៏ត្រូវការពារឱ្យបានដូចគេដែរ ពេលនេះអំណាចបានធ្លាក់មកលើដៃយើងហើយ យើងត្រូវចេះគ្រប់គ្រង បើបណ្តោយឱ្យមានបទល្មើសកើតឡើងគឺដូចបំផ្លាញខ្លួនឯង ។
លោកឧបនាយករដ្ឋមន្ត្រីបញ្ជាក់ថា យើងបានដោះលែងអ្នកទោសចំនួន៨៤នាក់ ដែលមានទោសល្មើសនេសាទ ប៉ុន្តែកាលនោះយើងមិនទាន់លុបឡូត៍ ឯចាប់ពីពេលនេះទៅ តែល្មើសច្បាប់គឺមានទោសតាមច្បាប់ស្តីពីជលផលជាពុំខានឡើយ ៕
ចែករំលែកព័តមាននេះ