រាជធានីភ្នំពេញ ៖ នៅសាលប្រជុំសាលាខណ្ឌដូនពេញនាព្រឹកថ្ងៃទី០២ ឧសភាឆ្នាំ២០១២ក្រុមប្រឹក្សាខណ្ឌ បានបើកកិច្ចប្រជុំសាមញ្ញលើកទី៣៥អាណត្តិទី១ ដើម្បីពង្រឹងការងារសន្តិសុខសណ្តាប់ធ្នាប់និងអនុវត្តភូមិ-សង្កាត់មានសុវត្ថិភាពប្រចាំខែឧសភាឆ្នាំ២០១២ ក្រោមអធិបតីភាពលោកហែម អាន ប្រធានក្រុមប្រឹក្សាខណ្ឌ លោកឯក ឃុនឌឿន អភិបាលរងខណ្ឌ ព្រមទាំងសមាជិក សមាជិកាក្រុមប្រឹក្សាខណ្ឌ ។
លោកហែម អាន បានមានប្រសាសន៍ក្នុងកិច្ចប្រជុំនោះថា ក្រុមប្រឹក្សាខណ្ឌដូនពេញបើកកិច្ចប្រជុំសាមញ្ញលើកទី៣៥ អាណត្តិទី១នាថ្ងៃនេះ គឺដើម្បីពិនិត្យនិងអនុម័តសេចក្តីព្រាងកំណត់ហេតុកិច្ចប្រជុំសាមញ្ញក្រុមប្រឹក្សាលើកទី៣៤ របស់ក្រុមប្រឹក្សាខណ្ឌដូនពេញអាណត្តិទី១ នាថ្ងៃទី២៩ មេសា ឆ្នាំ២០១២ ស្តាប់របាយការណ៍សកម្មភាពការងាររយៈពេល១ខែមេសាឆ្នាំ២០១២របស់រដ្ឋបាលខណ្ឌដូនពេញ និងបញ្ហាផ្សេងៗ។
លោកឈឹម ឌីណា នាយករដ្ឋបាលសាលាខណ្ឌដូនពេញ បានអានរបាយការណ៍សកម្មភាពរយៈពេលមួយខែមេសា ក្នុងនោះមានការងារសន្តិសុខសណ្តាប់ធ្នាប់សាធារណៈ ជាពិសេស ការងារភូមិ-សង្កាត់ មានសុវត្ថិភាពចុះធ្វើការអប់រំផ្សព្វផ្សាយ និងត្រួតពិនិត្យអាវុធជាតិផ្ទុះ និងចុះរដ្ឋបាលពេលយប់ព្រមទាំងរឹតបន្តឹងការអនុវត្តច្បាប់ចរាចរណ៍ផ្លូវគោក។ ចុះកិច្ចប្រតិបត្តិការប្រមូលជនអនាថា អ្នកសុំទាន ក្រុមក្មេងហិតកាវ និងស្ត្រីរកសុីផ្លូវភេទតាមផ្លូវសាធារណៈបញ្ជូនទៅមន្ទីរសង្គមកិច្ចរាជធានីភ្នំពេញ។ ដោយឡែក ក្នុងខែមេសាឆ្នាំ២០១២នេះដែរ សកម្មភាពបទល្មើសព្រហ្មទណ្ឌមានការថយចុះ ហើយករណីប្រើប្រាស់ជួញដូរគ្រឿងញៀនក៏មានការថយចុះដែរ ។
ក្នុងកិច្ចប្រជុំនេះដែរសមាជិកក្រុមប្រឹក្សាបានសំណូមពរដល់សាលាខណ្ឌដូនពេញបន្តការអនុវត្តគោលនយោបាយភូមិ-សង្កាត់មានសុវត្ថិភាពជាចម្បង ហើយសមាជិក សមាជិកាក្រុមប្រឹក្សាក៏បានអនុម័តដោយលើកដៃលើរបាយការណ៍សកម្មភាពការងាររយៈពេលមួយខែ មេសា ដោយ១៣សំឡេងលើ១៣សំឡេង ៕
ចែករំលែកព័តមាននេះ