រាជធានីភ្នំពេញ ៖ រយន្តកូរ៉េដឹកអាចម៍ដីចំណុះ២,៥តោន ពណ៌សមួយគ្រឿង ខណៈបើកឡើងផ្លូវលេខ២៧១ ដែលជាផ្លូវចំណោតហើយវាក់នឹងរថយន្តកូរ៉េមួយគ្រឿងទៀត ក៏ចាប់ហ្វ្រាំងឈប់ឱ្យរថយន្តកូរ៉េនោះបើកទៅមុន ស្រាប់តែរអិលថយក្រោយទៅកិនម៉ូតូ២គ្រឿងដែលចតនៅមុខផ្ទះមួយ និងរអិលថយទៅប៉ះទ្វារដែក និងជញ្ជាំងផ្ទះឈើចំនួន២ទៀតដែលនៅជាប់គ្នា ។ ហេតុការណ៍នេះកើតឡើងកាលពីវេលាម៉ោង៤និង៣០នាទីរសៀលថ្ងៃទី១ ឧសភា នៅកែងផ្លូវលេខ២៧១និងផ្លូវលេខ២៥៥ ស្ថិតក្នុងសង្កាត់បឹងសាឡាង ខណ្ឌទួលគោក តែមិនបណ្តាលឱ្យមានមនុស្សរងរបួសទេ ។
ប្រជាពលរដ្ឋនៅកន្លែងកើតហេតុឱ្យដឹងថា រថយន្តកូរ៉េចំណុះ២,៥តោន ពណ៌សនោះដឹកអាចម៍ដីស្តារពីប្រព័ន្ធលូ នៅម្តុំសង្កាត់បឹងសាឡាងយកទៅចាក់នៅសង្កាត់ស្ទឹងមានជ័យ បើកបរដោយបុរសម្នាក់ តាមផ្លូវលេខ២៥៥ ពីលិចទៅកើតឆ្ពោះទៅផ្លូវលេខ២៧១ ដែលជាផ្លូវឡើងចំណោត ។ លុះពេលទៅជិតដល់ផ្លូវកែង ស្រាប់តែមានរថយន្តកូរ៉េ១គ្រឿងទៀតបើកតាមផ្លូវលេខ២៧១ បត់ចុះមកផ្លូវលេខ២៥៥ ក្នុងទិសដៅបញ្ច្រាសទិសគ្នា ។
ដោយសារតែផ្លូវតូចចង្អៀតរថយន្តធំ២មិនអាចចៀសគ្នាបាន ទើបរថយន្តដឹកដីជាន់ហ្វ្រាំងឈប់នៅកន្លែងចំណោត ដើម្បីឱ្យរថយន្តកូរ៉េនោះបើកចុះទៅមុន តែដោយសាររថយន្តដឹកដីធ្ងន់ក៏រអិលថយក្រោយទៅកិនលើម៉ូតូស្តេប ពណ៌ក្រហមលាយខ្មៅមួយគ្រឿង ចតនៅមុខផ្ទះលេខ៥៥ និងកៀបជាប់ម៉ូតូវីវ៉ា ពណ៌ខ្មៅមួយគ្រឿងទៀតចតនៅមុខផ្ទះលេខ១ ។
ប្រភពដដែលបន្តទៀតថា ពេលដែលរថយន្តរអិលថយក្រោយនោះ មានម៉ូតូ១គ្រឿងជិះគ្នា២នាក់ បើកពីក្រោយរថយន្ត ប៉ុន្តែសំណាងល្អពេលរថយន្តរអិលថយក្រោយ អ្នកឃើញហេតុការណ៍បានស្រែកប្រាប់ ទើបអ្នកបើកម៉ូតូនោះគេចទៅខាងស្តាំឡើងទៅផ្លូវលេខ២៧១ផុតទៅ ។ ចំណែករថយន្តរអិលទៅខាងឆ្វេងដៃ ទោះបីជាអ្នកបើកបររថយន្តបានបួងចង្កូត និងជាន់ហ្វ្រាំងអបយ៉ាងណាក៏ដោយ ប៉ុន្តែមិនអាចទប់ឈ្នះ ទើបបណ្តាលឱ្យរអិលសន្សឹមៗថយក្រោយទៅកិនពីលើម៉ូតូស្តេបកល់ជាប់ក្រោមរថយន្ត ហើយកៀបម៉ូតូវីវ៉ាជាប់នឹងជញ្ជាំងផ្ទះ រីឯគូទរថយន្តថយទៅប៉ះនឹងផ្ទះលេខ៥៥ បណ្តាលឱ្យបាក់ជញ្ជាំង និងវៀចទ្វារដែកទ្រេតទៅបោកនឹងជញ្ជាំងផ្ទះមួយទៀតដែលនៅជាប់គ្នា ។
ក្រោយពេលកើតហេតុ ម៉ូតូវីវ៉ាដែលម្ចាស់ឈ្មោះ ម៉ិច សុនី ភេទប្រុស អាយុ២៩ឆ្នាំ ស្នាក់នៅផ្ទះជួលលេខ១ បានរងការខូចខាតច្រើនជាងម៉ូតូស្តេបដែលមានម្ចាស់ឈ្មោះ អឿង ឌី ភេទប្រុស អាយុ៤៧ឆ្នាំ ស្នាក់នៅក្នុងសង្កាត់ទួលសង្កែ ខណ្ឌប្ញស្សីកែវ បានជិះមកលេងផ្ទះប្អូន លុះពេលថ្ងៃក្តៅយកភួយទៅគ្របពីលើ ត្រូវរថយន្តកិននៅជាប់ពីក្រោមកល់ជាប់រថយន្ត ។ ចំណែកផ្ទះលេខ៥៥ដែលនៅកណ្តាលគេខូចខាតច្រើនជាងគេ ម្ចាស់ឈ្មោះ ប៉េង ផាវី ភេទស្រី អាយុ៣៥ឆ្នាំ និងផ្ទះចុងក្រោយគេខូចខាតទ្រេតជញ្ជាំងផ្ទះខាងមុខ ដោយសារទ្វារផ្ទះកណ្តាលទ្រេតទៅលើ ។ ម្ចាស់ផ្ទះក្រោយនេះ ឈ្មោះ ប៉េង ថារឿន ភេទស្រី អាយុ៣៧ឆ្នាំ ។
បន្ទាប់ពីកើតហេតុ ភាគីខាងតំណាងរថយន្តដឹកដីបានចេញមុខធ្វើការដោះស្រាយនៅកន្លែងកើតហេតុ ដោយបានសងសំណងទៅម៉ូតូទាំង២គ្រឿងចំនួន២៥០ដុល្លារ និងផ្ទះលេខ១ចំនួន៥០ដុល្លារ ។ សងផ្ទះលេខ៥៥ ដែលនៅកណ្តាល ហើយខូចខាតច្រើនជាងគេចំនួន៣៨០ដុល្លារ និងផ្ទះចុងក្រោយគេចំនួន៥០ដុល្លារ ៕
ចែករំលែកព័តមាននេះ