ក្រុងប៉ោយប៉ែត ៖ សពពលករខ្មែរប្រុសស្រី៣នាក់ក្នុងចំណោម១៣នាក់ ដែលស្លាប់ដោយគ្រោះថ្នាក់ចរាចរណ៍ជាបន្តបន្ទាប់នៅលើទឹកដីថៃនាចុងខែមេសា កន្លងមក៣លើកក្នុងខេត្ត២ គឺខេត្តប្រាជីនបូរី និងខេត្តឆាក់ឆឺងសៅ ត្រូវបានបញ្ជូនត្រឡប់មកកម្ពុជាតាមច្រកទ្វារអន្តរជាតិប៉ោយប៉ែតកាលពីវេលាម៉ោង៧យប់ថ្ងៃទី១ ឧសភា ។
សពទាំង៣នោះ១-ឈ្មោះឡូយ ឡូផារី ភេទស្រី អាយុ១៦ឆ្នាំ ២- ឈ្មោះយឿន រឿន ភេទប្រុស អាយុ៤៦ឆ្នាំ និង៣-ឈ្មោះចក់ តាក់ ភេទប្រុស អាយុ៣៤ឆ្នាំ ។ សពឈ្មោះឡូយ ឡូផារី និងឈ្មោះយឿន រឿន មានទីលំនៅក្នុងភូមិរោងគោ ឃុំចំណោម ស្រុកមង្គលបុរី ខេត្តបន្ទាយមានជ័យ ឯឈ្មោះចក់ តាក់ មានទីលំនៅក្នុងភូមិបឹងរាំង ឃុំតាឡំ ស្រុកមង្គលបុរី ។
សពជនរងគ្រោះទាំង៣ត្រូវសាច់ញាតិ និងក្រុមគ្រួសារទៅទទួលនៅវត្តបាលិលេយ្យ ស្ថិតក្នុងភូមិក្បាលស្ពាន២ សង្កាត់ប៉ោយប៉ែត ដោយសពត្រូវបូជានៅទីនោះតែម្តង ។
លោកនេត សារី អគ្គកុងស៊ុលខ្មែរប្រចាំខេត្តស្រះកែវ ប្រទេសថៃ ប្រាប់កោះសន្តិភាព ខណៈលោកនាំសពពីថៃមកកម្ពុជាថា សពជនរងគ្រោះជាពលករទាំងអស់មាន១៣នាក់ និងរបួសធ្ងន់ស្រាលជាង៣០នាក់ ប៉ុន្តែអ្នករបួសស្រាលមួយចំនួនត្រូវចេញពីមន្ទីរពេទ្យហើយ ។ នៅសល់អ្នករបួសធ្ងន់មួយចំនួនធំកំពុងបន្តការសម្រាកព្យាបាលនៅក្នុងខេត្ត២ គឺខេត្តឆាក់ឆឺងសៅ និងខេត្តប្រាជីនបូរី ដែលជាកន្លែងកើតហេតុ ។
ជុំវិញការបញ្ជូនសពត្រឡប់មកកម្ពុជាវិញនេះ លោកនេត សារី ប្រាប់ថា សពដែលពុំទាន់ស្គាល់អត្តសញ្ញាណ ឬពុំមានសាច់ញាតិចេញមុខទៅរកពុំទាន់បានបញ្ជូនត្រឡប់មកវិញទេ គឺបន្តតម្កល់នៅឡើយ ដើម្បីរង់ចាំការផ្តល់អត្តសញ្ញាណពីក្រុមគ្រួសារ ឬសាច់ញាតិ ។ ចំពោះដំណោះស្រាយសពទាំង៣នោះ លោកនេត សារី ប្រាប់ថា នឹងដោះស្រាយតាមក្រោយព្រោះពេលនេះអ្នកបើកបររថយន្តបង្កឱ្យមានគ្រោះថ្នាក់ចរាចរណ៍គេចខ្លួនបាត់ទៅហើយ។ ម៉្យាងលោកថា ពលកររងគ្រោះជាពលករខុសច្បាប់ពិបាកទាមទាររកការទទួលខុសត្រូវណាស់។
សពជនរងគ្រោះទាំង៣នាក់នោះ លោកនេត សារី ប្រាប់ថាទទួលរងគ្រោះថ្នាក់ចរាចរណ៍នាថ្ងៃទី២៨ មេសា នៅភូមិវាំងថាឆាង ឃុំវាំងថាឆាង ស្រុកកាប៊ីនបូរី ខេត្តប្រាជីនបូរី ៕
ចែករំលែកព័តមាននេះ