រាជធានីភ្នំពេញ ៖ រយៈពេល២ថ្ងៃចាប់ពីថ្ងៃទី២៩ដល់ថ្ងៃទី៣០ មេសា ប៉ូលិសប៉ុស្តិ៍ទឹកថ្លា ខណ្ឌសែនសុខ រាជធានីភ្នំពេញ បានចាប់ និងឃាត់ខ្លួនជនសង្ស័យចំនួន៥នាក់ជាមួយនឹងថ្នាំញៀន៥កញ្ចប់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
ជនសង្ស័យ១-ឈ្មោះជិន វីរ័ត្ន ភេទប្រុស អាយុ២០ឆ្នាំ ស្នាក់នៅផ្ទះជួល ផ្លូវលំ ភូមិទ្រា សង្កាត់ស្ទឹងមានជ័យ ខណ្ឌមានជ័យ ជាអ្នកជួញដូរ ២-ឈ្មោះភូ គីហាប់ ភេទប្រុស អាយុ១៦ឆ្នាំ ជាសិស្ស ជាអ្នកប្រើប្រាស់ មានទីលំនៅក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ ឃាត់ខ្លួននៅថ្ងៃទី៣០ មេសា នៅវេលាម៉ោង១០យប់ ៣-ឈ្មោះសៀក ស៊ីណាត ហៅធីង ភេទស្រី អាយុ២៤ឆ្នាំ ជាអ្នកជួញដូរ ៤-ឈ្មោះសុគន្ធ លីដា ភេទស្រី អាយុ២០ឆ្នាំ ជាអ្នករត់តុនៅហាង ជាអ្នកប្រើប្រាស់ អ្នកទាំង២ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ និងឃាត់ខ្លួននៅថ្ងៃទី២៩ មេសា វេលាម៉ោង៣រំលងអធ្រាត្រថ្ងៃទី៣០ មេសា ៥-ឈ្មោះខេន សុផាត ភេទប្រុស អាយុ១៨ឆ្នាំ ជាសិស្ស ជាអ្នកប្រើប្រាស់ មានទីលំនៅក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ ។
លោកម៉ក់ ហុង អធិការនគរបាលខណ្ឌសែនសុខ ឱ្យដឹងថា ការឃាត់ខ្លួនជនសង្ស័យទាំង៥នាក់នោះ រកឃើញថ្នាំញៀនចំនួន៥កញ្ចប់មានប្រភេទម៉ាទឹកកកចំនួន៤កញ្ចប់ និងប្រភេទអំហ្វេតាមីន១កញ្ចប់ ។ ការឃាត់ខ្លួនជនទាំងនេះនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ហើយប៉ូលិសកំពុងតែកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ